Joepeso 4 - Baibuli I Leb Kumam 2013

Ribere me Kom i Kirisito

¹ Pi mano, ango ngat kame abedo mabus pi Rwot, angangao wu pi bedo iepone me kuo kame upere kede lwongo kame kolwongo wu iye.

² Mwolerenu di ikounu bedo jo kame dire, kede jo kame kanyakino kop me jo icegun kede amara,

³ di iketunu cunyu pi gwoko aribakin kame Tipo mio i mulem kame ribo wu karacel.

⁴ Kom tie acel doko Tipo da tie acel, bala kame gen kame Rubanga olwongo wu iye da tie acel.

⁵ Rwot tie acel, yei tie acel, batisimu tie acel,

⁶ Rubanga da tie acel, en ngat kame ebedo Papa me jo dedede, en Rwot me jo dedede, etio i jo dedede, doko etie i jo dedede.

⁷ Do komio ngat acelacel kikom wa winyo di lubere kede rom me giamia ka Kirisito.

⁸ Pi mano, iwandik kacil waco be, “Kakame eoto kede okwidu, etero ekodet me mabus; en eko mino giamia but jo.”

⁹ Nan do kop kame waco be “en eoto malo” dwong mere nyo? Mano dwong mere be, en ber kong oudo egeo bino piny.

¹⁰ Ngat acel kame obino piny nono en kame ooto kakabor kalamo malo, tetekeny ebed tie i gi dedede.

¹¹ Giamia kame emio gin ige be, emio jo mogo odoko joor, mogo inabin, mogo jo kame tuco ejiri, mogo jokwat, kede mogo jopwony.

¹² En etimo man pi iiko jokacil pi timo tic mere, pi gero ekodet me jokirisito, kame obedo kom Kirisito.

¹³ Man bino timere paka tuno di wan odokunu jo acel i yei kede i ngec wa i kom Wot ka Rubanga, di do wan okounu doko jo kocato kame cal acala kede Kirisito.

¹⁴ Pi mano, kur doko wan obedunu idwe kame buko me yamo me pwony dedede wiro wi wa tetuni kede tetuca, pi kite kame jo ngolo ne wa kede rieko, kede pi diru gi me angalo.

¹⁵ Do akaka manono, pi yamo kop me ateni kede amara, wan miero obedunu jo kame tie dongo i yore dedede i Kirisito, en ngat kame ebedo wi wa.

¹⁶ Adulion dedede me kom oribakin karacel i kom en, doko gin kitude karacel pi amorito kame en etie kede. Kame adul acelacel tie tic kiber, kimio kom dongo di eko doko tek pi amara.

Kuo Anyen i Kirisito

¹⁷ Nan ango amoko kitek i Rwot be, miero wun doko kur ibedunu bala jo kalikame Iyudayan, pien tam gi kony mere li.

¹⁸ Gin kili kede niang, doko gin kibedo jo kalikame nywako kuo kame wok kibut Rubanga pi kwina piny kede pi epali gi.

¹⁹ Gin do lewic likame mako gi, omio kijalere i mit me lewic, doko kitie kede eranga me timo epone me tim areco dedede.

²⁰ Manono likame gikame wun isiaonu i kom Kirisito.

²¹ Pien ateteni iwinyunu kop i kome, doko kopwonyo wu ateni kame tie i Kirisito.

²² Wun do miero ikwanyunu tenge ekite wu acon, en kuo wu acon kame oudo odubere pi angalo me mit mere.

²³ Miunu tam wu kede cunyu lokere dok nyen,

²⁴ di ikounu ngapere kede ekite me kuo anyen, kame kocweo di lubere kede cal ka Rubanga, i kuo me ateni kopoore kede kacil.

²⁵ Pi mano, miero ikwanyunu angalo tenge, di wan dedede okounu donyo yamo kop me ateni kede jokio wa, pien wan dedede obedunu adulion me kom acel.

²⁶ Ka ililo, kur lilo ni teri i dub, doko kur imako lilo i cunyi piny yuluyul.

²⁷ Kur imi Sitani kare.

²⁸ Jokuwo miero wek kuwo; do akaka manono wek kitim tic kede cing gi i yore aber, tetekeny kiko twero kwanyo giamia me konyo jocan.

²⁹ Kur di dogu yamo kop moro arac, do kwanyo kenekene kop kame gero jo bala kame mitere, tetekeny kop kame iyamunu mi winyo but jo kame tie winyo.

³⁰ Kur imiunu Tipo Kacil ka Rubanga ud wangcuny; piento en nono kame ebedo alama kame moko be ceng me alako wu bino tuno.

³¹ Kwanyunu tenge cuny akec dedede, kede lilo, kede gero, kede lok, kede dubo nying jo, karacel kede cuny arac dedede.

³² Do bedunu jo kame mwol kede jo icegun, kame cuny gi ber, kame sasiro jo icegun bala kite kame Rubanga osasiro wuda kede i Yesu Kirisito.