Joepeso 2 - Baibuli I Leb Kumam 2013

Yai ki To tuno i Kuo

¹ Oudo wun itounu pi turo iswil kede pi dub,

² gikame oudo obedo ekite me kuo wu, di ilubunu ekite me kuo me piny kan, kede di ilubunu ngapug kame lo tipere kame tie i wi yamo, en tipo kame nataman pugo jo kame dagi winyo kop ka Rubanga.

³ Wada i kare moro oudo ocalunu kede gin i mit me kom wa, di olubunu mit me kom wa kede tam wa. Pi mano, iekite me kuo me kom, wan oudo obedunu jo kame poore pi udo lilo ka Rubanga bala jo apat dedede.

⁴ Do Rubanga, ngat kame opong kede cuny me kisa, pi amara mere adwong but wa,

⁵ omio bed bala wan oudo bin otounu pien oudo oturunu iswil mere, en eko mino wa obedunu kuo karacel kede Kirisito. Wun kolako wu pi kisa ka Rubanga.

⁶ En eyaruno wa karacel kede en di eko mino wa obedunu karacel kede en i kabedo kame tie i malo i Kirisito Yesu,

⁷ tetekeny i kare kame bino bino, en enyut ne wa abar kalikame wacere me kisa mere pi bero kame enyuto ne wa i Kirisito Yesu.

⁸ Pien kisa ka Rubanga en komio kolako wu pi bedo kede yei. Man likame wun en kame itimunu, do etie giamia ka Rubanga;

⁹ likame etimere pi tice wu me wek ngatamoro wakere iye.

¹⁰ Kite kame nataman wan otienu iye noni obedo tic me cing Rubanga. En ecweo wa kamanoni i Kirisito Yesu pi timo tice kabeco kame en oudo egeo iiko sek pi wan timo.

Bedo Jo Acel i Kirisito

¹¹ Aso, yutununu ekite kame oudo itienu kede, wun jo kalikame ibedunu Iyudayan i anywali wu, wun jo kame jo kame lwongere be “kokepo” lwongo wu be “jo kalikame kokepo”, kepere kame obedo gikame neeno kame cing dano timo i ringokom.

¹² I kare nono kuo wu oudo opokere kede Kirisito, oudo itienu ooko me ateker me Isirael, doko oudo likame koribo wu i isikan kame cungo i cikere ka Rubanga, kede oudo ibedunu i piny kan abongo gen kede abongo ngeno Rubanga.

¹³ Do nan i Kirisito Yesu, wun jo kame oudo ngoce iborunu kede Rubanga, remo ka Kirisito nan otieko mino wu idokunu iyapiyapi kede en.

¹⁴ Pien Kirisito en kame okelo ne wa mulem; pi kome kame koguro, en eribo wan jo me ikodeta are odoko jo acel, doko etieko turo gikame oudo poko wa, en ading kame oudo tie i diere wa.

¹⁵ En etieko kwanyo Iswil kede cik kame oudo tie iye, tetekeny ecwei ateker acel kanyen kame oribere karacel i en, akaka atekerin are, iepone noni, en ekelo mulem.

¹⁶ Pi to mere i kom musalaba, en edwoko wan atekerin are dedede i nywak bobo kede Rubanga i kom acel, man oko mino ading ojik.

¹⁷ Aso, Kirisito oko bino di eko pwonyo kop kame kelo mulem butun jo kame oudo iborunu kede Rubanga, kede da but jo kame oudo iyapiyapi kede Rubanga;

¹⁸ pien i Kirisito, wanunu dedede okarununu tuno but Papa i Tipo acel.

¹⁹ Pi mano, wun doko likame pwodi itienu jo kame kokwia, kame obedo jokumbor, do wun itienu jo me ateker acel kede jokacil, doko da ibedunu jo me i ot ka Rubanga,

²⁰ kame kogero i wi acakini kobedo joor kede inabin, di Kirisito Yesu en kame obedo kidi kame pire tek i gedo nono.

²¹ Gedo lung cungo ribakin karacel i Kirisito, di en eko dongo edoko tempulo kacil i Rwot.

²² Wuda i Kirisito kotie gero wu pi doko kakame Rubanga bedo iye i Tipo mere.