Joepeso 1 - Baibuli I Leb Kumam 2013

Amot

¹ Baluwa kowok kibut Paulo, ngat kame Rubanga olwongo i mit mere pi bedo ngaor ka Kirisito Yesu. But jokacil kame tie Epeso, kame genere i Kirisito Yesu.

² Kisa kede mulem kame yai kibut Rubanga Papa wa kede Rwot Yesu Kirisito bed butu.

Winyo me Cuny kame wan Oudo i Kirisito

³ Pak bed but Rubanga, ngat kame obedo Papa me Rwot wa Yesu Kirisito, en ngat kame emio wa i Kirisito winyo dedede me cuny kame tie i malo.

⁴ En riki eyero wa i Kirisito pi amara mere di pwodi likame kogeo cweno piny, pi wan bedo jokacil kame li kede raco moro i nyime.

⁵ Rubanga oudo otieko yero wan sek pi doko idwe mege pi Yesu Kirisito, di lubere kede bero me mit mere,

⁶ tetekeny wan opak kisa mere me deyo kame en emio wa abongo cul moro i Wode kame en emaro.

⁷ I remo mere, wan oudunu alako kede isasir ki dub, di lubere kede abar me kisa mere

⁸ kame en emio wa di dwong. I rieko kede i ngec mere dedede,

⁹ Rubanga otieko mino wa ongeo mung me mit mere, di lubere kede iik mere aber kame yomo cunye, kame en oudo egeo moko sek i Kirisito.

¹⁰ Aso, iik noni, kame en ebino cobo kame kare kopoore otuno, en iik me coko giacwea dedede kame tie i malo kede i wi lobo karacel i Kirisito.

¹¹ Doko da wan otieko doko jokacil pi Kirisito, bala kame en oudo egeo moko kede sek di lubere kede iik mere, en ngat kame emio gi dedede cobere bala kame en emito,

¹² tetekeny wanunu jo me agege me bedo kede gen i Kirisito, wek opakunu deyo ka Rubanga.

¹³ Wuda i Kirisito itiekunu winyo kop me ateni, kame obedo ejiri me alako wu, di ingei wun yei Kirisito oko mino wu alama kame obedo Tipo Kacil, kame oudo kocikere pi mino.

¹⁴ Manoni moko be wan obinunu udo gikame Rubanga ocikere iye, en lako wa di okounu doko jo mege, pi pako deyo mere.

Ilega ka Paulo

¹⁵ Ango atieko winyo yei wu i kom Rwot Yesu kede amara wu but jokacil dedede. Pi mano,

¹⁶ ango likame aweko mino Rubanga pwoc piru, doko ango ayutuno wu kame atie ilega.

¹⁷ Ango akwao be, Rubanga ka Rwot wa Yesu Kirisito, Papa won deyo mi wu Tipo me rieko kede me nyutere ka Rubanga, pi mino wu ngene odocon,

¹⁸ tetekeny pi bedo kede tam kame niang, wek ingeunu gen kame itienu kede pi lwongo mere, kede abar me deyo kame en eciko pi mino jo mege,

¹⁹ kede twer mere kame dwong dwongo kalikame wacere kame tie tic i but wan jo kame oyei, di lubere kede tic me twer mere kame dwong.

²⁰ Rubanga bin oketo twer noni i tic i Kirisito, kakame eyaruno en kede kikom jo oto, di eko mine ebedo i bade tetu cam i kabedo kame tie i malo.

²¹ En etie malo kalamo apugan dedede, akarunikin dedede, twer dedede, kede loc dedede, doko en etie malo kalamo nying dedede kame kocako, likame i kare kanataman kenekene, do kiton i kare kame bino bino da.

²² Rubanga otieko mino Kirisito twer i kom gi dedede, di oko mine telo wi jame dedede pi ekodet me jokirisito,

²³ kame obedo kome, kame pongo en ngat kame pongo gi dedede i kabedo dedede.