Iswilia 9 - Baibuli I Leb Kumam 2013

Jo Odagi Lubo Kop ka Rubanga

¹ “Winyunu wun jo me Isirael! Ceng atin wun iyapununu ngolo ecilet me Yorodan pi ot mano lobo me atekerin adongodongo di kitek kalamo wun. Bomban me atekerin nogo dongodongo di kocelo gi kede apama kame tuno i edou.

² Jo me atekerin nogo da kikom gi bocoboco di kitek, ikwae me itucio me jo kame kolwongo be Anakim, kame wun ingeunu. Wun itiekunu winyo di kowaco kop i kom gi be likame tie ngat kame karuno bwono gi.

³ Pi mano, poore tin wun ingeunu be Rwot Rubanga wu en kame bino ngolo ecilet etelo ne wu yongayo bala mac kame wango piny. En ebino tieko teko gi di eko bwono gi ki nyimu, tetekeny wun iriamunu gi tenge di ikounu muducaro gi awakawaka, bala kame bin en ecikere kede butu.

⁴ “Kame Rwot Rubanga wu otieko riamo gin tenge ki nyimu, kur iwacunu kenu kenu be, ‘Rwot okelo wa gamo lobo noni di eko doko merwa pien wan obedunu jo kopoore.’ Li ba, Rwot oyaro riamo atekerin nogo tenge ki nyimu pien gin kitimo gikareco.

⁵ Likame pien wun ipoorenu arabo ibedunu jo abeco en komio itienu ot gamo lobo gin di eko doko meru; do pien gin kitimo gikareco en komio Rwot Rubanga wu oyaro riamo gin tenge ki nyimu, kede pien Rwot Rubanga wu mito cobo cikere kame en bin etimo di ekwongere but joakwari wu, Aburaam, Isaka, kede Yakobo.

⁶ Pi mano, poore wun ingeunu be Rwot Rubanga wu likame tie mino wun lobo aber noni pien wun ibedunu jo kopoore. Li ba, wun ibedunu joepali.

⁷ “Yutununu, doko poore wi wu kur wil kede kite kame bin imiunu Rwot olilo kede i wi tim. Wun ibedunu jemo ne Rwot cako ki ceng kame bin iyaunu kede ki Misiri paka wun tuno kan.

⁸ Akadi i moru me Sinai wun bin imiunu Rwot cunye owang; imiunu Rwot cunye owang kede wu di eko mito muducaro wu.

⁹ I kare kame bin ango ayito kede i wi moru pi gamo kide abatal kame kowandiko i kom gi kope me isikan kame bin Rwot otimo kede wu, ango bin ako dong i wi moru kunono pi ceng ot ongwon; likame bin acamo arabo amato gimoro.

¹⁰ Di Rwot oko bin mina kide are nogo kame en kikome ewandiko i kom gi kope dedede kame bin en ewaco ne wu ki dier mac i ceng kame bin wun icokerenu kede i moru.

¹¹ I atiekini me ceng ot ongwon nogo Rwot bin oko mina kide abatal are nogo kame bin en ewandiko iye kope me isikan mere.

¹² “Di do Rwot oko waco na be, ‘Yai malo, ot piny awakawaka, pien jo ni kame in ikwanyo ki Misiri otieko dubere, doko kitieko timo gikarac. Gin ajoto kitieko parao tenge ki gikame ango aciko gi be kitimi, di kiko timo cal pi gin woro.’

¹³ “Rwot oko medo waco na be, ‘Ango atieko ngeno be jogi ateteni obedo joepali.

¹⁴ Wek ango kede gin tetekeny amuducaro gi di ako mino nying gi rweny ki wi lobo; di ango ako bino mino in kede ikwae ni idokunu ateker atek doko di edwong kalamo gin.’

¹⁵ “Aso, ango ako yai malo di ako wok piny di mac oudo tie liel i wi moru; oudo ango amako i cinga tuni tuni kide abatal are kame oudo owandiko i kom gi kope me isikan.

¹⁶ Di ango ako neno be wun oudo ajoto itiekunu parao tenge iwekunu timo gikame Rwot Rubanga wu oudo ociko ne wu, di ateteni ikounu timo dub bute di timunu cal me roya kede nyonyo pi wun woro.

¹⁷ Aso, ango bin ako uco kide abatal are nogo piny di ako ngingido gi i nyimu kanono.

¹⁸ Di ango bobo ako riebere piny i nyim Rwot, pi ceng ot ongwon; likame acamo arabo amato gimoro. Ango atimo manono pi dub kame wun oudo itimunu di ikounu mino Rwot cunye owang.

¹⁹ Ango bin abedo kede lworo i kom lilo kame oudo Rwot tie kede i komu. Rwot oudo cunye owang kede wu kitek omio oudo emito muducaro wu; do en bobo eko winyo kop na.

²⁰ Rwot oudo cunye owang i kom Aaron kitek; oudo eromo neke, do ango ako kwano Rwot pire i kare nono da.

²¹ Di do ango bin ako kwanyo gikame wun oudo itimunu nono, roya me nyonyo, kame bin okelo ne wun dub, di ako wange kede mac. Di do ako nyonyoto en di ako riege edoko dupudupu, ako uce i pii kame mol wok ki wi moru.

²² “Wun bobo da bin imiunu Rwot cunye owang i komu i kare kame bin itienu kede Tabera, Masa, kede Kibirot Kataba.

²³ Kakame bin Rwot oko cwano wu kede ki Kades Barenea be iotunu imakunu lobo nono kame en oudo etie mino wu, wun bin ikounu jemo ne; likame bin iketunu gen wu bute arabo lubo kop mere.

²⁴ Wun ibedunu jemo ne Rwot cako i kare kame ango angeo wu kede.

²⁵ “Ango bin ako buto piny ariebacuny i nyim Rwot pi ceng ot ongwon, pien oudo Rwot otieko iikere pi muducaro wu.

²⁶ Ango ako kwano Rwot di awaco be, ‘Okwe Rwot Rubanga, kur imuducaro jo ni, jo kame in bin ilako ki Misiri kede teko kede twer ni adwong.

²⁷ Yutuno genere me jotic ni, Aburaam, Isaka kede Yakobo; kur ipar pi epali ka jogi, gikareco gi kede dub gi.

²⁸ Aso ka li, jo me lobo kame bin ikwanyo wa kiye bino waco be in oudo likame ikaruno tero jo ni i lobo kame bin in icikere iye be ibino mino gi, kede pien cunyi oudo dagi gi, en komio in itero gi ioto neneko gi i wi tim.

²⁹ Do gin kibedo jo nin obe kame in iyero pi bedo megi, jo kame bin in ikwanyo ki Misiri kede twer ni adwong kede teko.’