Iswilia 8 - Baibuli I Leb Kumam 2013

Lobo Aber kame bino doko me Jo me Isirael

¹ “Cik dedede kame ango atie mino wu i ceng katin miero iketunu cunyu lubo gi, tetekeny ibedunu kuo di wel wu ko meede di ikounu ot gamo lobo kame Rwot bin ocikere di ekwongere be ebino mino joakwari wu.

² Yutununu kite kame Rwot Rubanga wu obedo telo wu kede i wi tim pi mwakini ot ongwon kame okato. En oudo emito mino wun idokunu jo kame mwolere, en komio en ebedo cwano ne wu pekini pi tamo wu, tetekeny en engei gikame tie i cunyu, arabo ibinunu lubo cik mege amoto li.

³ Pi mino wun mwolere, en bin emio wu ikanyunu kec di eko pito wu kede emana, gikame wun arabo joakwari wu oudo likame ngeo. En bin etimo manono tetekeny wun iniangunu be jo likame kuo kede cam kenekene, do jo kuo kede kope dedede kame Rwot waco.

⁴ Igoen wu likame oti, doko da tienu likame opopongun i kare me mwakini ot ongwon nogi dedede.

⁵ Mito ingeunu be, bala kame nganywal bitaro kede atin pi riene, kamanono da Rwot Rubanga wu timo ne wu.

⁶ Pi mano, lubunu cik ka Rwot Rubanga wu di ibedunu i kuo kame iswilia mege mito, doko poore ibedunu kede lworo bute.

⁷ Pien Rwot Rubanga wu tie tero wu i lobo aber, lobo kame tie kede icileta, ataneko kede pie kame gugunya wok ki piny i aditot kede ki wi mori;

⁸ lobo kame ceko engano kede mawele, anyakini me olok, epigi, pomagurunet kede olibeti, doko mokic da tie iye.

⁹ En ebedo lobo kalikame kec bino mako wu iye, arabo bedo kede rem me gimoro. Kide mege tie kede nyonyo ayon doko ikarununu kunyo nyonyo kopa i imukuran mege.

¹⁰ Ibinunu cam di ikounu yeng di ikounu pwono Rwot Rubanga wu pi lobo aber kame en emio wu.

Ikwenyar pi weko bedo kede Awilawic i kom Rwot

¹¹ “Mito igwokerenu kur wi wu wil kede Rwot Rubanga wu i yore me weko lubo cik kede iswilia mege kame tin ango atie mino wu.

¹² Kame do wun itiekunu bedo tie kede cam dedede kame imitunu, di ikounu gero ude abeco kame ibedunu iye,

¹³ kede ka do doke wu, romini kede diegi wu oko nyai, kede siliba kede saabu wu da oko doko tot, karacel kede jamini dedede kame wun itienu kede oko meede,

¹⁴ kur iwakerenu di wi wu ko wil kede Rwot Rubanga wu ngat kokwanyo wu ki lobo me Misiri, kakame oudo ibedunu iye ipasoi.

¹⁵ En ngat kame bin etelo wu beo ki twon wi tim kame kelo lworo, kakame bin ekiliton kede twole ager tie iye; piny kotuo kalikame iudo iye pii, do en eko mino pii omol owok ne wun ki lela kakatek.

¹⁶ I wi tim kunono en bin epito wu kede emana, cam kalikame joakwari wu bin ngeo. En bin ecwao ne wu pekini pi mino wun mwolere kede pi tamo wu, tetekeny i atiekini en emi wu winyo di ikounu udo jamini abeco.

¹⁷ Pi mano, poore igwokerenu kur ngatamoro wac i cunye be, ‘Twer na kede teko na en komio ango abaro.’

¹⁸ Do poore iyutununu be Rwot Rubanga wu en kame mio wun twer me udo abar, tetekeny en ecob isikan mere kame bin en ekwongere kede but joakwari wu, bala kame pwodi etie timo kede tuno tin.

¹⁹ Ka wun wi wu oko wil kede Rwot Rubanga wu di ikounu donyo lubo rubangan apat pi timo tic negi di iworunu gi, ango akwenyaro wu tin be ateteni Rwot bino muducaro wu.

²⁰ Ka wun idagunu lubo kop kame Rwot Rubanga wu waco, en ebino muducaro wu bala atekerin kame en eyaro muducaro ki nyimu.