Iswilia 34 - Baibuli I Leb Kumam 2013

To ka Musa

¹ Musa bin oko yai ki ebar me Moab di eko yito i wi moru me Nebo, di eko kato i okwidu mere kakame kolwongo be Moru me Pisiga, kakame pimere kede Jeriko. Rwot oko nyuto ne lobo lung, cako ki Gilead tuno Dan;

² lobo me Naputali lung; lobo me Epuraimu kede Manase; lobo dedede me Yuda tuno i nam adwong atie tetu tim;

³ Negeb kede elet kobedo aditot me Jeriko, en bomba me tugo, paka tuno Soar.

⁴ Rwot oko waco ne Musa be, “Man en lobo kame bin ango acikere but Aburaam, Isaka kede Yakobo be abino mino ikwae gi. Ango atieko mini inene kede wangi, do likame in ibino ngolo loka nono.”

⁵ Aso, Musa ngat koudo obedo ngatic ka Rwot oko to kunono i lobo me Moab, bala kame Rwot oudo otieko ciko.

⁶ Oko bin yike i aditot kame tie i lobo me Moab, kakame pimere kede Betepeor, do tuno tin likame tie ngat kame ngeo kakame koyike iye kikokome.

⁷ Musa oto di etie kede mwakini me dongo tol acel kede ot are. Wange oudo pwodi likame odoko col, doko oudo pwodi etie kede teko.

⁸ Jo me Isirael oko koko Musa i elet me Moab pi ceng ot adek, di do kiko jiko koke.

⁹ Yosua wot ka Nun oko pong kede rieko pien Musa oudo oketo cinge i wie. Di jo me Isirael oko donyo lubo kop mere di kitimo gikame Rwot oudo ociko ne Musa.

¹⁰ Cako i kare nono, likame pwodi enabi moro obedo tie i Isirael kame cal bala Musa, ngat kame Rwot oudo ngeo wang i wang.

¹¹ Ka itamo pi gianena kede giaura kame Rwot oudo ocwao Musa timo i lobo me Misiri, ne Parao kede jotic mege dedede kede lobo mere dedede, likame tie ngatamoro kame twero porere kede en.

¹² Likame pwodi tie ngatamoro kotieko timo tice me twer kede tice akelo lworo, bala kame bin Musa otimo i nyim jo me Isirael.