Iswilia 32 - Baibuli I Leb Kumam 2013

¹ “Okwe malo cik yiti, ango ayaro yamo; piny ida cik yiti i winy kope kame wok ki doga.

² Pwony na bino bedo cal bala kot awo, ebino bedo bala toyo abido wi lobo; kope na bino bedo bala kot awo i kom amel, kibino bedo bala kot abwongo yen apwodi titino.

³ Ango abino pako nying Rwot, abino mino Rubanga wa dwongo!

⁴ “Rwot en ngagwok wu atek bala lela, en etimo gi dedede kiber kede i yore kopoore; en ebedo Rubanga kame genere, doko eli kede tim moro arac, en etimo gi kopoore kede me ateni.

⁵ Do wun likame ibedunu jo kame genere bute, likame pwodi itienu idwe mege, wun ibedunu lwak kotieko dubere kede kalikame tie kede tim me ateni.

⁶ Benyo, kom epone nono en kame wun iterunu kede Rwot, wun jo aming kame wi wu likame tio? Mam en ebedo papa wu, ngat kocweo wu, ngat komio wu idokunu ateker?

⁷ “Yutununu kare kasek, kare ariki; penyunu papi wu di gin kiko waco ne wu gi kotimere, penyunu jo oti di gin kiko bino waco ne wu kope me kare kokato.

⁸ Ngamalo Twal bin omio buli ateker acelacel lobo mere amake; en bin epopoko jo di eko cibo ikor ne atekerin; bin eko mino ateker acelacel rubanga mere,

⁹ do eko yero ikwae ka Yakobo pi bedo jo mege.

¹⁰ “En eudo gi di kitie irim i wi tim, kabedo koling kame yamo buko iye kitek. En eko donyo gwoko gi, bala kame en koto egwoko kede tong wange.

¹¹ Rwot cal bala ekokom atie gwoko ode, ekokom kame por wire i malo i wi idwe mege; en eyararo bwome di eko mako gi kiber; kamanono da Rwot ogwoko jo mege me Isirael likame kipoto.

¹² Rwot otelo jo mege en kene abongo rubanga moro me kumbor konye.

¹³ “En oudo emio gi pugo kabedere atie bala imukuran, di kiko camo gikame ocek i poti; kiudo mokic i lela, doko olibeti oko dongo negi kabedo atie engaro engaro.

¹⁴ Rwot opito gi kede cak me doke kede me diegi; oudo kitie kede romini, diegi kede doke kocwe; emio gi engano apwot kede bwini aber kalamo.

¹⁵ “Wun jo ka Rubanga itiekunu udo mulem di ikounu jemo ne; icweunu, idokunu jo isikit di komu meny pien icamunu kitek; wun itiekunu weko Rubanga ngat kocweo wu, itiekunu dagi ngalak wu atek.

¹⁶ Imiunu nyeko omako Rubanga pien idonyunu woro rubangan me atekerin apat; imiunu cunye owang pi caljwogi kame neno rac.

¹⁷ Imiunu giayala but jwogi do likame but Rubanga, rubangan mogo kame joakwari wu likame bin ngeo, rubangan apwodi obino abina kalikame bin joakwari wu oworo.

¹⁸ Wi wu otieko wil i kom ngalak katek kobedo toto wu, likame iyutununu Rubanga ngat kobedo papa wu.

¹⁹ “Kakame Rwot oneno kede manoni, cunye oko wang, di eko dagi idwe mege awobe kede anyira.

²⁰ En eko waco be, ‘Ango abino jalo gi, di ako bino neno gikame bino timere negi; pien gin kibedo lwak kotieko bilor, idwe kalikame genere.

²¹ Gin kimio nyeko omaka pi gin woro rubangan me abe akony gi li, kimio cunya owang pi gin woro caljwogi. Pi manono, ango abino mino nyeko mako gi i kom ateker akony mere li, abino cwano negi ateker me jomingo pi wango cuny gi.

²² Gero na bino bedo cal bala mac aliel, ebino wango jame dedede atie i wi lobo; ebino tuno piny i kabedo me jo oto, di eko wango kiton agangeta me acakini me dud mori.

²³ “ ‘Abino cwano negi can apapat di lubere aluba, abino gwegweo tongini na me emal pitipit i kom gi.

²⁴ Kibino totoun pi kec kede lieto me piny; kibino totoun pi tuwo areco. Abino cwano leini ager suro gi, kede twole atie kede kwir ager kakao gi.

²⁵ Kame kitie ooko, kobino neneko gi kede epima; kame kitie i ude gi, lworo en abino neneko gi. Awobe kede anyira gi bino totoun, idwe adot kede jo oti kame lwar tie i wi gi da likame bino bwot.

²⁶ Oudo aparo be koto amuducaro gi atwal atwala, di ako mino nying gi rweny atwal ki diere me jo.

²⁷ Do ako bedo kede lworo be jokwor gi bino wango cunya; cengemogo kibino wakere di kiwaco be gin en kame kibwono jo me Isirael, do likame ango.’

²⁸ “Isirael obedo ateker kame jo mege likame wi gi tio; gin kili kede niang atwal atwala.

²⁹ Ka koto oudo kitie kede niang, oudo koto kiniang gikomio jokwor gi obwono gi; oudo koto kigeo ngeno sek gikame oudo bino timere i kom gi.

³⁰ Ngakwor acel kenekene obwono jo tutumia acel me Isirael, kom jokwor are kenekene obwono gin jo tutumia tomon. Manoni oudo twero timere benyo benyo, ka ngalak gi atek bala lela oudo likame ocato gi, ka Rwot oudo likame ojalo gi?

³¹ Pien rubangan ka jokwor gi likame tek bala Rubanga gin, akadi jokwor gi da ngeo manoni.

³² Gin kireco bala jo me Sodoma kede Gomora, kical bala olok kame pige me nyige mere kec,

³³ bwini mere kec bala kwir me twol, eriaria bala kwir me ipom.

³⁴ “Rwot yamo be, ‘Gikame ango atieko iiko pi timo ne jo me Isirael kede jokwor gi ango akano i cunya; atie gwoke kiber bala gi me wel.

³⁵ Pien ceng kame ango abino timo kede onyanga di ako mino gi alola iyapi tuno! Tien gi bino getar, di can me epone dedede ko poto negi.’

³⁶ Pien Rwot kisa bino make i kom jo mege, di eko ngolo kop be kili kede raco moro, ka eneno be teko gi otiek, di do likame tie ngatamoro kodong kuo, epasoit arabo dano kalikame epasoit.

³⁷ Di en eko bino penyo jo mege be, ‘Rubangan gi kara tie tuai, gin rubangan atek kame gin kiringo ot gwokere but gi?

³⁸ Wun imiunu gi giayala me kakamio, kede ikounu mino gi bwini me amata. Ber gin kibin kikonyu; ber gin kigwoku.

³⁹ “ ‘Miero ingeunu be ango kena en abedo Rubanga; likame tie rubanga moro acal bala ango. Ango atwero neko, doko amio kuo; ango awanakino dano doko da atwero cange; doko likame tie ngatamoro atwero lako dano ki cinga.

⁴⁰ Ango atingo cinga malo di ako kwongere be: Bala kame ateteni ango akuo kede nakanaka,

⁴¹ ka apeno leb epima na di meny di cinga oko make pi timo kop kame ango angolo, abino timo onyanga i kom jokwor na; abino culo jo adaga kede alola.

⁴² Imalia na bino pwokere kede remo me jokwor na, remo me jokwor kame aneko kede kame amako. Epima na bino neneko gin dedede, jo kame yer wi gi odongo di bocoboco.’

⁴³ “Pakunu jo mege wun atekerin dedede, piento en ebino culo kwor me jotic mege kame koneko; en ebino timo onyanga i kom jokwor mege, di eko bino lonyo lobo ka jo mege ki dub kame gin kitimo.”

⁴⁴ Musa kede Yosua wot ka Nun oko waco ne jo kope katie i wer noni tetekeny kiwinyi.

Kope me Ajikini kame Musa Omio

⁴⁵ Kakame Musa otieko waco kede kope nogi ne jo dedede me Isirael,

⁴⁶ en eko waco negi be, “Ketunu i cunyu kope kame tin aciko ne wu; miunu gi but idwe wu bala cik tetekeny gin kikaruno bino lubo kiber pwony ka Rubanga.

⁴⁷ Pien manoni likame obedo kop me tukotuko, do ebedo kop amako kuo wu kikokome. Ka ilubunu gi ibinunu kuo pi kare alac i lobo kame itienu ngolo ecilet me Yorodan di ikounu ot bedo iye pi doko meru.”

⁴⁸ I ceng nono Rwot oko waco ne Musa be,

⁴⁹ “Oti i moru me Abarim i lobo ka Moab, kame pimere kede bomba me Jeriko; iko yito i wi moru me Nebo di iko neno lobo me Kanan, lobo kame ango ayaro mino jo me Isirael pi bedo mergi.

⁵⁰ In ibino to i wi moru kunono, bala kite kame omini Aaron oto kede i wi moru me Kor.

⁵¹ Pien in kede Aaron likame ilubunu cik na i nyim jo me Isirael. Kakame oudo itienu kede i pii me Meriba, i nget bomba me Kades, kame tie i wi tim me Sin, wun likame ibedunu kede wor buta i nyim jo na.

⁵² In ibino neno lobo nono ki kakabor, do likame ibino donyo iye, en lobo kame ango atie mino jo me Isirael.”