Iswilia 29 - Baibuli I Leb Kumam 2013

Isikan ka Rwot kede Jo me Isirael i Lobo me Moab

¹ Magi en gikame mitere pi gwoko isikan kame Rwot ociko ne Musa pi timo kede jo me Isirael i lobo me Moab, medo i wi isikan kame oudo en egeo timo kede gi i moru me Sinai.

² Musa oko lwongo jo dedede me Isirael di eko waco negi be, “Wun inenunu kede wangu gi dedede kame Rwot otimo i lobo me Misiri, ne Parao kede jotic mege kede ne lobo nono dedede.

³ Wun inenunu can adongodongo, gianena kede giaura kame Rwot otimo.

⁴ Do tuno tin Rwot likame omio wu iniangunu i kuo kame ibeunu iye.

⁵ Rwot obedo telo wu i wi tim nan oromo mwakini ot ongwon, do igoen wu likame oti, doko amukai wu da likame dud gi ocamere.

⁶ Wun oudo iliunu kede mugati me acama, akadi bwini amoto kongo me amata, do Rwot oko pito wu tetekeny ingeunu be en ebedo Rwot Rubanga wu.

⁷ Aso kakame wan otununu kede kan, Abaka Sikon me Kesibon kede Abaka Og me Basan oko wokun pi yi kede wa, do wanunu okounu bwono gi.

⁸ Wan okounu mano lobo gi di oko popoko ne jo me ekeko ka Ruben, Gad kede dul me jo me ekeko ka Manase.

⁹ Pi manono, poore ilubunu kiber kope me isikan noni, tetekeny gi dedede kame itimunu twer cobere kiber.

¹⁰ “Tin wun dedede itienu cungo i nyim Rwot Rubanga wu, jotel kede joadongo wu, cuo dedede me Isirael,

¹¹ idwe wu, mon wu kede jokumbor kame bedo i diere wu di kitimo ne wu tic me mwodo yen kede weko pii.

¹² Tin wun itienu kan pi donyo i isikan kame Rwot Rubanga wu tie timo kede wu kede pi yei timo gikame isikan nono mito,

¹³ tetekeny Rwot mok wu pi bedo jo mege, di en eko bedo Rubanga wu, bala kame bin ecikere kede but joakwari wu, Aburaam, Isaka kede Yakobo.

¹⁴ Likame Rwot tie timo isikan noni kede gikame mitere iye kede wan kenekene, wan jo kame tin otienu cungo kan i nyime,

¹⁵ do etie time kede wanunu dedede karacel kede ikwae wa me kare me anyim da.

¹⁶ “Wun iyutununu ekite me kuo kame wan oudo otienu iye i Misiri, kede epone kame obinunu kede di ongolunu diere me atekerin apat.

¹⁷ Wun inenunu jamini gin kame neno rac, gin caljwogi kobedo yen kede ingaroi kame kopao, arabo siliba amoto saabu kame kotwako.

¹⁸ Miero inenunu be likame tie icuo moro, dako moro, arabo jo me paco moro kame tin tie cungo kan, kame bino lokere tenge kibut Rwot Rubanga wa di eko donyo woro rubangan me atekerin apat. Akodi ngat nono cal bala alias kame aloti mere tie kede kwir arac di ekec.

¹⁹ Nenunu be likame tie ngatamoro kan tin kame winyo kwongere me isikan noni, di en eko lokere waco kene be gi dedede bino bedo nen kiber, akadi di en ebed kede epali di eko donyo timo gikame cunye mito. Manono bino kelo can i kom jo dedede, jo abeco kede jo areco di rom aroma.

²⁰ Rwot likame bino sasiro dano kacal kamanono, do en ebino riamo kede gero agwai ka Rwot, di can kame kowandiko i itabu noni ko bino poto i kome tuno di Rwot otieko muducaro en atwal atwala.

²¹ Rwot bino yeke tenge kikom jo me ikekon dedede me Isirael, di eko keto can i kome, di lubere kede ilam dedede kame kowandiko i itabu me iswil noni.

²² “Lwak me kare me anyim, idwe kame bino lubo cen ngei wu, karacel kede jokumbor kame wok ki pinye aboco, bino neno kite kame Rwot odudubo kede lobo wu kede can kame eketo iye.

²³ Poti mege bino bedo kede lobo kame kony mere li, lobo kame salupa kede munyo otieko umo; likame tie gimoro kame kobino pito iye, likame tie gimoro kame bino tui iye, akadi lum da likame bino dongo iye. Lobo wu nono bino bedo bala bomban me Sodoma kede Gomora, bala Adama kede Seboim, kame bin Rwot odudubo kakame ebedo kede gero agwai.

²⁴ Di do wi lobo lung ko bino penyere be, ‘Pinyo komio Rwot otimo ne lobo no gikame cal kamano? Nyo komio enyuto twon gero kacal kamano?’

²⁵ Adwokini me peny nono ko bino bedo be, ‘Etimere kamanoni pien jo ka Rwot oturo isikan kame Rwot Rubanga ka joakwari gi otimo kede gi kakame ewoto gi kede ki lobo me Misiri.

²⁶ Gin kilokere donyo woro rubangan mogo kalikame lem gin kingeo, rubangan kame Rwot likame onyuto negi pi woro.

²⁷ Manono oko mino Rwot obedo kede wangcuny i kom lobo nono di eko mino can dedede kame kowandiko i itabu noni opoto iye.

²⁸ Rwot oko bedo kede twon lilo kede gero di eko puputo gi ki lobo gi, di eko uco gi i lobo me kumbor, kakame nan kitie iye.’

²⁹ “Tie gimogo kame Rwot Rubanga wa omungo; do en enyuto Iswilia mege but wan kede ikwae wa, pi lubo kope mege i kare lung.”