Iswilia 27 - Baibuli I Leb Kumam 2013

Kowandiko Iswilia ka Rubanga i kom Kide

¹ Di Musa oko cungo karacel kede joadongo me Isirael di eko waco ne jo me Isirael be, “Gwokunu cik dedede kame ango atie mino wu tin.

^2-4 Nan wun iyapununu ngolo ecilet me Yorodan di ikounu donyo i lobo alac di mio kame Rwot Rubanga wu ocikere pi mino wu. En ebedo Rubanga kame joakwari wu bin woro. Cucuto ka itiekunu donyo i lobo nono, otunu i moru me Ebal di ikounu cibo kide are kunono, di ikounu puco kom gi kede emina atar. Di do ikounu wandiko i kom gi iswilia kede pwony nogi dedede.

⁵ Ibinunu gero alutari me yalo Rwot Rubanga wu kanono. Ibinunu gere kede ingaroi kalikame leb nyonyo moro me ayon obilo pano.

⁶ Ipoorenu gero ne Rwot Rubanga wu alutari kede kide kalikame kopao, di ikounu bino wango i wie giayala but Rwot Rubanga wu;

⁷ doko da ibinunu mino giayala me nywak di ikounu camo ringo nono di ilelunu i nyim Rwot Rubanga wu.

⁸ Miero inenunu be iwandikunu kope me iswilia nogi i kide nogo di kisomere kiber.”

⁹ Di Musa, oko cungo karacel kede josaseredoti Jolebi, di eko waco ne jo be, “Cikunu yitu, wun jo me Isirael. Tin wun itiekunu doko jo ka Rwot Rubanga wu.

¹⁰ Pi manono, ipoorenu winyo Rwot Rubanga wu, di ilubunu cik kede iswilia mege kame ango atie mino wu tin.”

Ilam i Wi Jo kalikame bino Lubo Iswilia

¹¹ I ceng nono Musa oko waco ne jo me Isirael be,

¹² “Kame itiekunu ngolo ecilet me Yorodan, jo me ikekon ka Simeon, Lebi, Yuda, Isakar, Yosepu, kede Benjamin bino ot cungo i wi moru me Gerisim pi winyo kope amako udo winyo.

¹³ Di jo me ikekon ka Ruben, Gad, Aser, Sebulun, Dan kede ekeko ka Naputali ko ot cungo i wi moru me Ebal pi winyo kope amako ilam.

¹⁴ Di Jolebi ko bino yamo kede dwan amalo kaman:

¹⁵ “ ‘Ilam ka Rubanga mak dano kame bino pano kidi, yat amoto twako nyonyo moro pi cweno caljwogi, di eko donyo wore i mung; pien Rwot cunye dagi caljwogi.’ “Jo dedede ko bino dwoko be, ‘Amen!’

¹⁶ “ ‘Ilam ka Rubanga mak dano kalikame tie kede wor but papa mere amoto toto mere.’ “Jo dedede ko bino dwoko be, ‘Amen!’

¹⁷ “ ‘Ilam ka Rubanga mak dano kame nyiko wang ikor me lobo ka ngakio mere.’ “Jo dedede ko bino dwoko be, ‘Amen!’

¹⁸ “ ‘Ilam ka Rubanga mak dano kame ngalo emuduk lubo yongayo arwenye.’ “Jo dedede ko bino dwoko be, ‘Amen!’

¹⁹ “ ‘Ilam ka Rubanga mak dano kame tie kede tim kalikame poore but jokumbor, idwe kic, kede apuserun.’ “Jo dedede ko bino dwoko be, ‘Amen!’

²⁰ “ ‘Ilam ka Rubanga mak dano kame buto kede dako ka papa mere di eko mino papa mere lewic.’ “Jo dedede ko bino dwoko be, ‘Amen!’

²¹ “ ‘Ilam ka Rubanga mak dano kame buto kede le moro.’ “Jo dedede ko bino dwoko be, ‘Amen!’

²² “ ‘Ilam ka Rubanga mak dano kame buto kede amin mere me papa gi kede acel amoto me toto gi kede acel.’ “Jo dedede ko bino dwoko be, ‘Amen!’

²³ “ ‘Ilam ka Rubanga mak dano kame buto kede toto me dako mere.’ “Jo dedede ko bino dwoko be, ‘Amen!’

²⁴ “ ‘Ilam ka Rubanga mak dano kame neko ngawote i mung.’ “Jo dedede ko bino dwoko be, ‘Amen!’

²⁵ “ ‘Ilam ka Rubanga mak dano kame gamo cul pi neko ngatamoro ali kede kop.’ “Jo dedede ko bino dwoko be, ‘Amen!’

²⁶ “ ‘Ilam ka Rubanga mak dano kalikame bino lubo iswilia kede pwony ka Rubanga.’ “Jo dedede ko bino dwoko be, ‘Amen!’