Iswilia 26 - Baibuli I Leb Kumam 2013

Giayala me Cam Acako Cek i Poti

¹ “Ka itununu i lobo kame Rwot Rubanga wu bino mino wu pi doko meru, di ikounu bedo iye,

² ngat acelacel bino kwanyo dul moro me cam acako cek i poto mere, eko keto i ebukit di eko tero kakame Rwot bino yero pi jo wore kiye.

³ In ibino ot but ngasaseredoti atie i wang tic i esawa nono, di iko waco ne be, ‘Tin ango atuco i nyim Rwot Rubanga na be, ango atieko donyo i lobo kame bin en ecikere but joakwari wa be ebino mino wa.’

⁴ “Ngasaseredoti bino gamo ebukit ki cingi di eko cibe i nyim alutari ka Rwot Rubanga ni.

⁵ Di do in iko bino waco kope gi be: ‘Kwaru na oudo obedo dano me Aram kame oudo kokobo akokob kede bedo; bin en eoto Misiri kede jo me ode di kiko bedo kuno bala jokumbor. Oudo wel gi nonok twatwal kakame kioto kede kuno, do gin kiko doko ateker adwong di tek.

⁶ Kakame jo me Misiri oko donyo tero wa kede kirac di kitidilo wa i yore me mino wa timo tic atek,

⁷ wan oko kok but Rwot, en Rubanga ka joakwari wa; Rwot oko winyo koko wa di eko neno can, peko kede adiadia kame oudo otie iye.

⁸ Rwot oko woto wa ki Misiri kede twer kede teko mere. En etimo gianena kede giaura di eko mino jamini kame kelo lworo otimere.

⁹ En eko kelo wa tuno kan di eko mino wa lobo alac di mio noni.

¹⁰ Nan ango akelo ne Rwot gikame emia ki lobo noni, en cam kocako cek i poto na.’ “Di do in iko cibo ebukit nono i nyim Rwot Rubanga ni di iko wore.

¹¹ Di do in karacel kede Jolebi kede jokumbor abedo kede wu ikounu camo ebaga me amio kame Rubanga omio odi.

¹² “Ingei buli mwakini adek ipoore mino acel me tomon me cam kame ipuro but Jolebi, jokumbor, idwe kic kede apuserun, tetekeny gida kikaruno bedo tie kede cam aromo gi i ikodeta wu dedede kame gin kitie iye.

¹³ Di do in iko bino waco ne Rwot Rubanga ni be, ‘Likame tie dul moro me acel me tomon me gikame obedo meri kotieko dong i oda; ango atieko mine but Jolebi, jokumbor, idwe kic kede apuserun, bala kame in itieko ciko na kede be atimi. Ango likame adagi lubo cik ni moro amako kop i kom kwanyo acel me tomon me gikame apuro, doko da likame wia owil kede moro kikom gi.

¹⁴ Ango likame acamo moro kiye i kare kame atie koko kede dano moro oto, likame akwanyo moro kiye ki oda di oudo atie kede pwokere, doko da likame ayalo moro kiye but jo oto. Ango atieko lubo kop nin Rubanga na di atimo gi dedede kame in iciko na pi timo.

¹⁵ Ngoloro piny i kabedo ni kacil, ki malo, di iko mino jo ni me Isirael winyo; mi da winyo i kom lobo alac di mio kame imio wa, bala kame oudo icikere kede but joakwari wa.’

Jo ka Rwot Kamake

¹⁶ “I ceng me tin Rwot Rubanga wu ciko ne wu pi lubo cik kede iswilia mege dedede; aso lubunu gi kiber kede cunyu kede kuo wu lung.

^17-18 Tin wun itucunu di iyeunu be Rwot bino bedo Rubanga wu. Wun icikerenu be ibinunu lubo yote mege, di igwokunu iswilia mege kede di itimunu gi dedede kame en eciko ne wu. Pi manono, Rwot da oko yei be wun ibinunu bedo jo mege kamake.

¹⁹ En ebino mino ibedunu ateker kame kopako, kame ngere kede kame koworo kalamo atekerin apat dedede kame en ecweo. Ibinunu bedo jo ka Rwot Rubanga wu, bala kame en etieko ciko.”