Iswilia 24 - Baibuli I Leb Kumam 2013

Gonyo Nyom kede Medo Nyomere

¹ Musa oko Meede kede mino iswilia kaman. “Ka dano moro onyomo dako di do i cen mere dako nono likame oko yomo cunye, pien tie gimoro arac kame en eudo i kom dako nono; aso di do en eko wandiko ne baluwa me riame, di eko mine baluwa nono i cinge, di do eko riame ki ture,

² ka dako nono oko ot di eko nyomere kede icuo ace,

³ di icuo nono da bobo cunye oko dagi dako nono, di en eko wandiko ne baluwa me riame, di eko mine baluwa nono i cinge, di do eko riame ki ture; arabo oter be cware me are oko to.

⁴ Akodi dako nono cware me agege ca likame doko sobolo dwoke pi doko dako mere, pien udo dako nono otieko pwokere; manono obedo gikame Rwot dagi. Likame ipoorenu munao lobo kame Rwot Rubanga wu bino mino wu kede dub kacal kamanono.

Iswilia Ace

⁵ “Ka icuo pwodi onyomere anyoma, likame kopoore cwane tenge ot i yi, arabo ot timo tic moro ace me abumenti. Miero kong weke ebed paco pi mwaka acel pi yomo cuny dako mere.

⁶ “Ka ikopao giri moro but dano moro, kur imie esingao kidi mere me riego alos, pien manono udo icego ne yongayo kame epoore kuo kede.

⁷ “Ka komako ngatamoro di okwalo dano wad gi me Isirael di eko tere ot bedo epasoit, arabo di eko cate bala epasoit, ngat nono kopoore neko. Epone noni en kame ibinunu kwanyo kede gikarac acal kamanono ki diere wu.

⁸ “Ka ngatamoro tie kede tuwo arac me delkom, miero enen be etimo gi dedede kame ngasaseredoti Ngalebi bino waco ne, bala kame ango atieko ciko negi.

⁹ Yutununu gikame Rwot Rubanga wu bin otimo ne Miriamu kakame iyaunu kede ki Misiri di itienu ot.

¹⁰ “Ka ikopao giri moro but dano ace, likame ipoore ot donyo i ode pi gamo gikame epoore singao.

¹¹ In ibino kuro ki ooko di dano kame in ikopao giri nono donyo i ot omo ni gikame epoore singao ni.

¹² Ka dano nono ngacan, kur ibut kede egoe kame en esingao nin;

¹³ miero idwoke esuka mere di likame pwodi ceng odonyo, tetekeny ekaruno um kede di en eko bino kwano ni winyo. Manono bino mino cuny Rubanga bedo yom i komi.

¹⁴ “Likame ipoore dagi culo epakasit moro angacan amoto kame piny oloo, akadi di en ebedo dano me Isirael amoto ngakumbor moro abedo i bomba me lobo wu.

¹⁵ Miero inen be iculo gi buli ceng di pwodi likame ceng odonyo, pien gin kijocan, doko cul nono en kame kipoore kuo kede; aso ka li gin kibino bedo kede koko i komi but Rwot, di do in iko bino bedo kede raco.

¹⁶ “Likame kopoore neko jonywal pi dub me idwe gi, doko da likame kopoore neko idwe pi dub me jonywal gi; kobino neko dano pi dub mere kame en kikome etimo.

¹⁷ “Kur iterunu jokumbor kame bedo kede wu arabo idwe kic i yore kalikame poore; kur iter egoe me apuserut pi bedo gikame en esingao pi banya.

¹⁸ Yutununu be oudo wun ibedunu ipasoi i Misiri di Rwot Rubanga wu oko lako wu ki kuno; manono en komio ango amio wu cik noni.

¹⁹ “Ka in ioto i poto nyaro engano di wi oko wil kede abunge moro kame itieko nyaro, likame ipoore dok i poto ot ome; manono bino dong ne jokumbor, idwe kic kede apuserun, tetekeny Rwot Rubanga ni mi winyo i gi dedede kame in itimo.

²⁰ Ka ioto i poto ngwedo anyakini me olibeti tien me agege, kur bobo i dok i poto ngwedo anyakini kodong; magonogo poore dong ne jokumbor, idwe kic kede ne apuserun.

²¹ Ka ioto i poto ngwedo olok ni tien me agege, kur bobo i dok i poto tien me are pi ngwedo anyakini kodong; magonogo poore dong ne jokumbor, idwe kic kede ne apuserun.

²² Yutununu be oudo wun ibedunu ipasoi i Misiri; manono en komio ango amio wu cik noni.