Iswilia 20 - Baibuli I Leb Kumam 2013

Iswilia amako Yi

¹ “Ka iotunu pi yi kede jokwor wu, di ikounu neno asigiran kede cabalan me yi, kede isirikalen atot kalamo megu, kur ibedunu kede lworo i kom gi; pien Rwot Rubanga wu tie kede wu, ngat kame bin owoto wu ki lobo me Misiri.

² Di pwodi likame icakunu yi, ngasaseredoti bino ot anyim di eko ber yamo kede isirikalen.

³ En ebino waco negi be, ‘Winyunu wun jo me Isirael! Tin wun iyarunu yi kede jokwor wu. Kur cunyu poti, doko da kur ibedunu kede lworo amoto mielkom pirgi.

⁴ Pien Rwot Rubanga wu tie upere kede wu; en ebino yi kede jokwor wu piru di eko mino wu ibwonunu gi.’

⁵ “Di jodongo me isirikalen ko waco negi be, ‘Benyo, tie ngatamoro apwodi ogero ode nyen? Poore edok paco mere pien cengemogo etwero to i yi di dano apat en kame ko bino timo itok me kwero ode nono.

⁶ Benyo, tie ngatamoro kopuro olok do pwodi likame ebilo camo anyakini mere? Poore edok paco mere pien cengemogo etwero to i yi di dano apat en kame ko lunyo cako camo anyakini me olok mere.

⁷ Benyo, tie ngatamoro konero dako do pwodi likame enyomo? Poore edok paco mere, pien cengemogo etwero to i yi di dano apat en ako bino nyomo dako nono.’

⁸ “Jodongo nogo doko da bino meede waco ne isirikalen be, ‘Benyo tie ngatamoro alwor arabo kame kome otieko to? Poore edok i paco mere, pien cengemogo ebino mino kom jowote da to bala mere.’

⁹ Kame jodongo me isirikalen otieko yamo kede isirikalen, jotel me ikodeta atitino me isirikalen bino cako tic gi.

¹⁰ “Ka iotunu pi yi i bomba moro di ikounu noke, ber kong cakunu cwano negi kop amako gin rieno cing gi abongo yi moro timere.

¹¹ Ka gin kiko yei kop me anapakin kame wun icwaunu negi, di kiko rieno cing gi, jo dedede me bomba nono bino doko mabus butu di ikounu donyo dino gi tetek timo ne wu tic.

¹² Do ka gin kidagi jalere butu i yore me mulem, di kiko cako yi kede wu, wun ibinunu lukaro bomba nono di ikounu sure.

¹³ Ka Rwot oko mino bomba nono i cingu, ibinunu neko cuo dedede atie iye.

¹⁴ Do itwerunu tero mon kame imakunu, idwe, doke kede jamini apat dedede kame iyakunu. Ibinunu yomo cunyu kede jamini kame iyakunu kibut jokwor wu, jamini kame Rwot Rubanga wu omio wu.

¹⁵ Gi noni en kame ibinunu timo i kom bomban atie kakabor kede lobo kame wun itienu ot bedo iye.

¹⁶ “Do ka imaunu bomba moro i lobo kame Rwot Rubanga wu tie mino wu pi bedo meru, ipoorenu neko gi dedede awei.

¹⁷ Ipoorenu neko pitipit jo dedede kame tie i bomban nogo bala kame Rwot Rubanga wu otieko ciko: jo Kiti, jo Amor, jo Kanan kede jo Perisi, jo Kibi kede jo Yebu.

¹⁸ Timunu kamanoni tetekeny gin kur kipwonyu timo gikame neno rac kame gin kitimo i esawa me woro rubanga gi, di manono ko mino itimunu dub but Rwot Rubanga wu.

¹⁹ “Ka ilukarunu bomba moro, di itienu yi pi mito mane, kur itotongunu yen anyako anyakini, akadi bed bala yi nono otero kare alac. Wun camunu anyakini gi do kur itotongunu gi, pien yen likame obedo jo me tetekeny ilukarunu gida.

²⁰ Itwerunu gire dudubo yen kalikame kocamo anyakini gi; itwerunu totongo gi me gero madala me yito kalamo apama pi donyo mako bomba kame tie yi kede wu, tuno wun mane.