Iswilia 19 - Baibuli I Leb Kumam 2013

Bomban kame Jo Ringo Ot Gwokere iye

¹ “Kame Rwot Rubanga wu otieko muducaro atekerin kame en ebino mino wu lobo gi, di do wun ikounu lunyo bedo i bomban kede i ude gi,

² ibinunu poko bomban adek i lobo kame Rwot Rubanga wu bino mino wu pi doko meru.

³ Ibinunu maro tien me lobo nono di ikounu poke i adulion adek, di dul acelacel ko bedo tie kede bomba moro kiyapiyapi kede jo mege, tetekeny ngatamoro koneko dano twero ringo ot gwokere iye.

⁴ Ka ngatamoro oneko dano kalikame lem edingere kede i akangas, en etwero ringo ot gwokere i bomba acel kikom magonogo.

⁵ Opor be, ka jo are ooto tongo yen i abum, di ngat acel oko wiro le pi koto tongo yat, di wi le oko pute ki pur mere di eko dipo dano ocelu di eko to; nganek nono twero ringo i bomba acel kikom magonogo pi laro kuo mere.

⁶ Do ka bomba tie acel kenekene atie kakabor, manono bino mino ngacul kwor me dano kame koneko nono bino wapo nganek kede twon gero, di cengemogo eko make i yongayo di eko neke. Aso di dano nono likame poore aneka, piento lem en likame edingere kede dano kame eneko nono, manono gire obedo akangas.

⁷ Pi manono, ango aciko wu be, pokunu bomban adek pi kop nono.

⁸ “Ka Rwot onyao lobo wu, bala kame bin ecikere kede but joakwari wu be ebino timo, di eko mino wu lobo lung kame bin en ecikere but joakwari wu be ebino mino wu,

⁹ ibinunu doko medo yero bomban adek. En ebino mino wu lobo nono ka wun ilubunu kiber cik dedede kame tin ango atie mino wu, kede ka wun imarunu Rwot Rubanga wu di itimunu gikame en emito.

¹⁰ Ibinunu medo bomban nogo tetekeny kur konek jo kalikame tie kede raco moro i lobo kame Rwot Rubanga wu bino mino wu pi doko meru, pien manono bino mino ibedunu tie kede raco me timo nek.

¹¹ “Do ka dano dingere kede ngatamoro, di eko ot pwono kure di eko sure paka neke, di eko ringo ot gwokere i bomba acel kikom magonogo,

¹² joadongo me bomba me nganek nono lem bedo iye bino mino ooto ome di oko mine i cing jo kame poore culo kwor me dano kame en eneko, tetekeny konek eda.

¹³ Kur inyutenu cuny me kisa; ipoorenu kwanyo raco ki lobo me Isirael, raco me onyo remo me dano kalikame tie kede kop moro, tetekeny gi dedede bed ne wu kiber.

Ikor Kasek

¹⁴ “I lobo kame Rwot Rubanga wu bino mino wu, likame ipoorenu nyiko kide kame joakwari otieko cibo me poko ikor me lobo me dano acelacel kede ngakio mere.

Iswilia amako Mino Ijura

¹⁵ “Mujura acel kenekene likame twero mino kowaco be ateteni dano otimo gimoro arac; miero ijurak are arabo adek en amok kop nono.

¹⁶ Ka dano moro acunye rac omio pido me abe i kom ngawote,

¹⁷ gin jo are nogo dedede atie kede piem kibino ot i nyim Rwot, i nyim josaseredoti kede jongolkop atie i wang tic i kare nono.

¹⁸ Jongolkop bino ngingico kop nono odocon; ka kiko udo be dano nono otero pido me abe i kom dano me Isirael ngawote,

¹⁹ kopoore mino dano ngapido me abe nono alola kame oudo koto kopoore mino dano kame en epido, ka koto kop oloe. Epone nono en kame ibinunu kwanyo kede raco nono i diere wu.

²⁰ Jo apat bino winyo di lworo ko mako gi, di likame bobo ngatamoro kikomu ko bino timo gi kacal kamanoni.

²¹ Kur inyutenu cuny me kisa: kuo koculo kede kuo, wang koculo kede wang, lak koculo kede lak, tien koculo kede tien.