Iswilia 18 - Baibuli I Leb Kumam 2013

Iner Amako Josaseredoti

¹ “Josaseredoti Jolebi, Jolebi dedede likame bino bedo kede iner moro me lobo me Isirael. Gin kibino kuo kede giamia kede giayala kame komio Rwot.

² Gin likame kibino bedo kede lobo kobedo mergi amako gi bala jo me ikekon apat; girgi amako gi en bedo josaseredoti ka Rwot, bala kame Rwot otieko cikere kede.

³ “Kame kotie mino giayala me diang amoto oromo, kopoore mino josaseredoti ekwakwa, itinyo kede jamini me yie bala iner gi.

⁴ Doko da kopoore mino gi engano acako cek i poti, dul me agege me bwini, me mo me olibeti, kede yer me romini kame konyaro me agege.

⁵ Pien Rwot Rubanga wu oyero Jolebi kikom jo me ikekon apat dedede pi bedo jo kame timo nen tic bala josaseredoti pi kare lung.

⁶ “Ka Ngalebi moro oyai ki bomba wu moro me Isirael, di eko ot karamoro kame Rwot oyero ne, kakame cunye omito,

⁷ en etwero timo tic mere ki kanono bala ngasaseredoti ka Rwot, bala Jolebi apat kame timo tic gi kanono.

⁸ Eda ebino udo cam arom aroma kede josaseredoti apat, do etwero gire kano gikame jo me ture cwao ne.

Ikwenyar i kom Lubo Tim me Atekerin Apat

⁹ “Kame itununu i lobo kame Rwot Rubanga wu bino mino wu, likame ipoorenu lubo tim ingorijij me atekerin atie kunono.

¹⁰ Likame ngatamoro kibutu poore wango wode amoto nyare kede mac bala giayala, arabo tic kede teko me yamere pi tuco kope me anyim, arabo lamo gagi, arabo ngingico jamini mogo di eko tuco ne jo winyo aber amoto arac kame kitie kede, arabo timo tim me jwok,

¹¹ arabo uco ilwitia i kom jo, penyo yamere amoto jwogi, arabo penyo tipere me jo oto.

¹² Ngat kame timo akodi gi nogi cuny Rwot likame mito neno; tim ingorijij nogo en komio Rwot Rubanga wu tie riamo atekerin apat ki kakame wun itienu ot iye.

¹³ Poore ibedunu jo kame winyo dwan Rwot Rubanga wu atwal atwala.”

Cikere me Cwano Enabi

¹⁴ Musa oko waco be, “Atekerin kame wun iyapununu lunyo lobo gi pi bedo meru lubo kop me jo kame tio kede teko me yamere pi tuco kope me anyim, kede kope me jo angingico jamini mogo di kiko tuco ne jo winyo aber amoto arac kame kitie kede, do Rwot Rubanga wu likame yei ne wu timo gi nogi.

¹⁵ Do en ebino cwano ne wu enabi kacal bala ango, kowok ki diere me jo wun; wun ipoorenu winyo kop mere.

¹⁶ “I ceng kame oudo icokerenu kede i moru me Sinai, wun bin ikounu kwano be likame bobo imitunu medo winyo dwan Rwot Rubanga wu, akadi neno mac me tie mere, pien oudo itienu kede lworo be manono bino mino itounu.

¹⁷ Aso, Rwot oko waco nango be, ‘Gikame gin kipenyo tie kakare.

¹⁸ Ango abino cwano negi enabi kame cal bala in, kame bino wok ki diere me jo gin; ango abino keto kope na i dog enabi nono, di en eko bino yamo ne jo gi dedede kame ango acike iye.

¹⁹ En ebino yamo i nyinga, do ngat kalikame bino winyo kop mere, ango abino mine alola.

²⁰ Do enabi moro kame bino yamo i nying rubangan apat, arabo kame bino cuko waco kop moro i nyinga do di udo likame ango acike iye, enabi nono bino to.’

²¹ “Cengemogo wun ibinunu penyere be, ‘Benyo benyo kame wan osobolo ngeno kede kope kalikame Rwot en kowaco?’

²² Wun ibinunu ngeno gi kaman: ka enabi moro owaco kop moro i nying Rwot, do di kop nono likame oko cobere, manono udo likame obedo kop kame Rwot en owaco, enabi nono udo opwakuno kop nono kede wie kene, kur ibedunu kede lworo iye.