Iswilia 17 - Baibuli I Leb Kumam 2013

¹ “Miero kur iyalunu but Rwot Rubanga wu twon arabo oromo kame tie kede peko moro i kome, pien manono Rwot Rubanga wu dagi.

² “Ka cengemoro ibinunu udo dano moro i diere wu, dako arabo icuo, kame tie i bomba wu moro kame Rwot Rubanga wu tie mino wu, kame timo gikarac i nyim Rwot Rubanga wu, doko di eturo isikan mere

³ di eoto timo tic ne rubangan apat doko eworo gi arabo eworo ceng, duwe amoto acerin, gikame cik ka Rwot gengo,

⁴ ka iwinyunu kop kame cal kamanono, ngingicunu en kiber. Ka etie kop me ateni be gikarac noni tie timere i Isirael,

⁵ ibinunu tero dano kotimo gikarac nono ooko i erute di ikounu didipo en kede kide tuno neke.

⁶ Kobino neko dano nono ka ijurak are arabo adek omio ijura i kome; miero kur konek dano moro pi kop me mujura acel kenekene.

⁷ Ijurak en kame bino cako lwomo kidi me dipo dano nono, di do jo apat dedede ko lubo; kite nono en kame ibinunu kwanyo kede gikarac noni ki diere wu.

⁸ “Ka okelo i ekiko wu kope me pido mogo atek, kalikame ngangolkop me bomba wu karuno ngolo, bala kope kame mako nek kame kopelauno timo kede nek me akangas, kope kame mako poko jamini arabo kope me asurasura, poore iterunu gi kabedo kame Rwot Rubanga wu bino yero me wore.

⁹ Terunu kope nogo but josaseredoti, gin Jolebi kede but ngangolkop kame tie i wang tic i kare nono, di gin kiko ngolo ne wu kop nono.

¹⁰ Miero wun itimunu gi dedede kame gin kibino waco ne wu.

¹¹ Miero itimunu gikame gin kiwaco di lubere kede kite kame gin kigonyo ne wu kede iswil, arabo iyeunu kop kame gin kingolo; kur iparaunu tenge kiye.

¹² Ngatamoro kame mito timo epali me dagi lubo kop me ngangolkop arabo kop me ngasaseredoti kame tie i wang tic ka Rwot Rubanga wu, miero neke. Ibinunu kwanyo rac noni i Isirael iepone noni.

¹³ Jo dedede bino winyo gikame kotimo nono di kiko bedo kede lworo, doko likame tie ngatamoro kame ko bino bobo timo epali kacal kamanono.

Kope amakere kede Abaka

¹⁴ “Kame wun do itiekunu tuno i lobo kame Rwot Rubanga wu tie mino wu, di itiekunu mane ikounu donyo bedo iye, di do ikounu mito bedo kede abaka bala atekerin apat koluko wu,

¹⁵ miero inenunu be abaka kame ibinunu keto pi pugo wu obedo dano kame Rwot Rubanga wu en koyero. Ngat kame ibinunu keto nono miero bed dano wu kikokome; kur iketunu ngakumbor pi bedo abaka wu.

¹⁶ Akadi kamanono da, abaka miero kur bed kede asigiran amake kame tot, arabo edwok jo Misiri pi ot wilo asigiran; pien Rwot otieko waco be jo mege likame bobo bino dok kunono.

¹⁷ Abaka miero kur dur mon atot, pien manono romo loko cunye tenge kibut Rwot; doko da miero kur ebar twatwal.

¹⁸ Kame en do etieko bedo i wi kom mere me ajakanut, en miero ebed tie kede itabu me iswilia ka Rubanga, kame kowandiko ne di cal kede gikame tie i itabu me iswilia kame josaseredoti Jolebi en kame gwoko.

¹⁹ En ebino bedo kede itabu nono di esome pi kare me kuo mere lung, tetekeny epwonyere lworo Rwot Rubanga mere, di eketo cunye lubo kope dedede me iswilia kede cik nogo.

²⁰ Manoni bino mino likame etingere bala en eber kalamo jo icegun me Isirael, doko likame eko bino parao tenge ki lubo cik ka Rwot. Di en kede ikwae mege kiko bino pugo Isirael pi kare alac.