Iswilia 16 - Baibuli I Leb Kumam 2013

Ebaga me Kalamo

¹ “Tedunu Ebaga me Kalamo i duwe me Abib pi mino Rwot Rubanga wu wor, pien i duwe nono en kame Rwot Rubanga wu okwanyo wu kede iwor ki Misiri.

² Ibinunu ot kabedo kame Rwot Rubanga wu oyero me wore di ikounu ngolo oromo, diel arabo diang wu bala giayala but Rwot Rubanga wu.

³ Miero kur icamenu kede mugati moro kame arup tie iye. Ibinunu camo mugati kame kotimo abongo arup pi ceng kanyaare, mugati kame kolwongo be mugati me neno can, pien bin wun iyaunu ki Misiri awakawaka. Ibinunu timo kamanono tetekeny pi kare me kuo wu lung ibedunu di iyutununu ceng kame bin iyaunu kede ki lobo me Misiri.

⁴ Arup moro kur bed tie i lobo wu dedede pi ceng kanyaare; doko kur ringo moro me le kame ingolunu otieno me ceng me agege but tuno odiko.

⁵ “Miero kur ingolunu giayala moro me Ebaga me Kalamo i kabedo moro me bomban wu kame Rwot Rubanga wu tie mino wu.

⁶ Do poore ingolenu i kabedo kame Rwot Rubanga wu bino yero me wore. Kanono kenekene en kame poore ingolunu iye giayala me Ebaga me Kalamo, otieno di ceng tie donyo, manono en esawa kame bin wun iyaunu kede ki Misiri.

⁷ Tedenu di ikounu came i kabedo kame Rwot Rubanga wu bino yero; oru mere di ikounu dok i miere wu.

⁸ Ibinunu camo mugati kame kotedo abongo arup pi ceng kanyape, di i ceng me kanyaare mere ikounu cokere pi woro Rwot Rubanga wu, doko kur itimunu tic moro i ceng nono.

Ebaga me Kac

⁹ “Ibinunu maro sabitin kanyaare cako i ceng kame igeunu kede kac,

¹⁰ di ikounu tedo Ebaga me Kac pi mino wor but Rwot Rubanga wu. Ibinunu kelo but Rwot giamia bala kame cunyu mito di lubere kede winyo kame en etieko mino wu.

¹¹ Bedunu kede kilel i nyim Rwot Rubanga wu, wun karacel kede idwe wu, ipasoi kede apasoi wu, Jolebi kame bedo i bomban wu, jokumbor, idwe kic kede apuserun kame bedo kede wu. Timunu manoni i kabedo kame Rwot Rubanga bino yero me wore.

¹² Yutununu be wuda bin ibedunu ipasoi i Misiri, aso miero iketunu cunyu lubo cik nogi.

Ebaga me Kimere

¹³ “Poore itedunu Ebaga me Kimere pi ceng kanyaare i kare kame itiekunu coko kede cam wu ki poti, kede ka itiekunu biino olok wu.

¹⁴ Bedunu kede kilel i ebaga nono, wun karacel kede idwe wu, ipasoi kede apasoi wu, Jolebi, jokumbor, idwe kic, kede apuserun kame bedo i bomban wu.

¹⁵ Tedunu ebaga noni pi ceng kanyaare pi mino wor but Rwot Rubanga wu, i kabedo kame en ebino yero. Poore ibedunu kede kilel pien Rwot Rubanga wu bino mino wu winyo i cam dedede kame ipurunu kede i gi dedede kame wun itimunu.

¹⁶ “Cuo dedede kame tie i diere wu poore ot tien adek buli mwaka, pi woro Rwot i kabedo kame en ebino yero. Poore kioti i kare magi: i kare me Ebaga me Kalamo, i kare me Ebaga me Kac, kede i kare me Ebaga me Kimere. Likame kibino ot i nyim Rwot kede cing gi nono;

¹⁷ ngat acelacel bino tero giamia mere bala kame en ekaruno, di lubere kede winyo kame Rwot otieko mine.

Apugan Kopoore

¹⁸ “Poore iyerunu jotel kede jotic kame konyo gi kikom jo me ikekon wu dedede, i bomban dedede kame Rwot Rubanga wu tie mino wu. Gin poore kingol kope ne jo kakare.

¹⁹ Gin miero kur kitotolo ngolo kop kakare, arabo kinyut apokapoka but jo; doko miero kur kiyei gamo cemusana, pien cemusana umo wang jo, kiton wang jo ariek di eko mino gi likame kingolo kop kakare ne jo kame li kede raco moro.

²⁰ Timunu ne jo gi dedede i yore kopoore, tetekeny igamunu lobo kame Rwot Rubanga wu tie mino wu di ikounu dong bedo iye.

²¹ “Kame itimunu alutari ne Rwot Rubanga wu, kur isipunu epir moro me yat me woro rubanga Asera i ngete.

²² Doko kur isipunu kidi moro me awora, pien Rwot Rubanga wu dagi gi.