Iswilia 12 - Baibuli I Leb Kumam 2013

Kabedo Acel me Woro Rubanga

¹ “Magi en iswilia kede cik kame poore iketunu cunyu lubo i lobo kame Rwot Rubanga ka joakwari wu tie mino wu pi bedo iye pi kare lung kame ibinunu bedo kuo kede i wi lobo.

² I lobo kame itienu ot iye nono, poore imuducarunu kabedere kame atekerin kame wun itienu mano lobere gi oudo woro iye rubangan gi, malo i wi mori, i wi imukuran, kede i dud yen koduko.

³ Mumukunu alutarin gi, ngingidunu ipirin me kide kame gin kiworo, wangunu cal ka Asera rubanga gi, di ikounu tongotongo iretunu piny cal me rubangan gi, tetekeny imiunu nying gi rwenyi ki kabedere gi.

⁴ “Likame ibinunu woro Rwot Rubanga wu iepone kame jo nogo woro kede rubangan gin.

⁵ Do wun ibinunu ot woro Rwot Rubanga wu i kabedo acel kame en ebino yero pi jo ot wore iye, kikom adulion kame jo me ikekon wu bedo iye. Kunono en kame wun ibinunu ot iye

⁶ pi mino giayala awanga kede giayala angola wu, acel me tomon wu kede giamia wu apat, giamia wu kame icikerenu pi mino but Rwot, giamia kame imiunu pi mit me cunyu, kede giamia me idwe kao me doke, diegi kede romini.

⁷ Kunono i nyim Rwot Rubanga wu en kame wun karacel kede jo me ude wu ibinunu cam di ikounu bedo kede kilel pi winyo kame Rwot Rubanga wu omio wu i gi dedede kame itimunu.

⁸ “Kame kare nono otuno, kur itimunu bala kame nan ibedunu timo. Tuno nataman wan obedunu woro Rubanga bala kame cuny wa mito,

⁹ pien wun pwodi likame itununu i lobo kame Rwot Rubanga wu tie mino wu, kakame ibinunu bedo iye kede mulem.

¹⁰ Kame wun ingolunu ecilet me Yorodan di ikounu donyo bedo i lobo kame Rwot Rubanga wu bino mino wu pi doko meru, kede ka en emio wu iweunu ki cing jokwor kame oluko wu di do inapakinunu,

¹¹ wun ibinunu tero gi dedede kame ango aciko ne wu, kabedo kame Rwot oyero me wore. Ibinunu tero giayala awanga kede giayala angola wu, acel me tomon wu kede giamia wu apat, kede giamia wu kame icikerenu pi mino but Rwot.

¹² Di ikounu kilel i nyim Rwot Rubanga wu, wun karacel kede idwe wu awobe kede anyira wu, ipasoi kede apasoi wu, kede Jolebi kame bedo i bomban wu; pien Jolebi likame kobino poko negi lobo kame mako gin.

¹³ Gwokerenu kur imiunu giayala awanga wu i kabedo moro kenekene kame ibinunu yero.

¹⁴ Do kenekene ibinunu yalo gi i kabedo acel kame Rwot bino yero ki adulion me jo me ikekon wu. Kunono kenekene en kame ibinunu mino iye giayala awanga wu, doko kunono en kame ibinunu timo iye gi dedede kame ango aciko ne wu.

¹⁵ “Do wun ikarununu ngolo di ikounu camo leini wu i karamoroni kenekene kame wun ibedunu iye. Wun iromunu camo leini atot bala kame imitunu di lubere kede kite kame Rwot omio wu kede. Jo dedede romo camo gi, jo kopwokere kede jo kalikame opwokere, bala kame icamunu kede atil arabo amiem.

¹⁶ Do miero kur icamunu remo; poore ionyenu piny bala pii.

¹⁷ Miero kur icamunu i miere wu acel me tomon me kal wu, bwini kede mo me olibeti, idwe kao me doke, diegi kede romini wu, arabo gimoro kame icikerenu pi mino but Rwot, amoto giamia kame wun imiunu pi mit me cunyu, arabo giamia ace apat.

¹⁸ Poore icamunu magonogi i nyim Rwot Rubanga wu i kabedo kame en eyero me wore, wun karacel kede idwe awobe wu kede idwe anyira wu, ipasoi kede apasoi wu, kede Jolebi kame bedo i bomban wu, di itienu kede kilel i nyim Rwot Rubanga wu pi gi dedede kame itimunu.

¹⁹ Miero inenunu be igwokerenu likame ijalunu Jolebi, pi kare dedede kame ibedunu kede i lobo wu.

²⁰ “Ka Rwot Rubanga wu onyao adul kame wun ibedunu iye, bala kame en ecikere pi timo, di dano moro ko mito camo ringo, en eromo camo ringo esawa moroni kenekene bala kame cunye mito.

²¹ Ka kabedo kame Rwot Rubanga wu oyero me wore bor twatwal, dano romo ngolo diang mere, diel mere arabo oromo mere moro kame Rwot omie, di eko camo ringo mere i paco, bala kame ango atieko ciko ne wu.

²² Ngatamoroni, kame opwokere arabo kalikame opwokere romo camo ringo nono bala kame etwero camo kede atil arabo amiem.

²³ Kenekene kur icamunu ringo di pwodi remo tie iye, pien kuo tie i remo; pi mano, miero kur icamunu kuo karacel kede ringo.

²⁴ Kur icamenu; poore ionyenu piny bala pii.

²⁵ Poore kur icamenu tetekeny gi dedede bed ne wu kiber kiton ne ikwae wu, pien wun itimunu gikame poore i nyim Rwot.

²⁶ Do poore iterunu giayala wu kede giamia wu kame icikerenu pi mino but Rwot i kabedo kame Rwot oyero.

²⁷ Ibinunu mino giayala awanga wu, ringo karacel kede remo, i wi alutari ka Rwot Rubanga wu; remo me giayala wu apat mege ibinunu onyo i nget alutari ka Rwot Rubanga wu, do ringo gi itwerunu camo.

²⁸ Gwokerenu i kope nogi dedede kame ango aciko ne wu tin, tetekeny wun karacel kede ikwae wu ibedunu kiber nakanaka, pien udo itienu timo gikame ber kede kopoore i nyim Rwot Rubanga wu.

Ikwenyar i kom Woro Caljwogi

²⁹ “Rwot Rubanga wu bino muducaro atekerin atie i nyimu i kare kame wun itienu suro kede lobo gi, di wun ikounu mano lobo gin ikounu donyo bedo iye.

³⁰ Do i ngei Rwot muducaro atekerin nogo, poore igwokerenu kur cunyu wai wu timo gikame gin kitimo; kur ipenyunu kop moro i kom rubangan gin be, ‘Atekerin nogi oudo woro rubangan gin benyo? Wada omito timo kamanono.’

³¹ Kur iworunu Rwot Rubanga wu iepone kame gin kiworo kede mergi, pien gin kiworo rubangan gin kede tim areco kame Rwot dagi. Gin kiwango kiton idwe gi da me yalo rubangan gi.

³² Wun miero iketunu cunyu lubo gi dedede kame ango aciko ne wu; kur imedunu gimoro iye arabo ikwanyunu gimoro tenge kiye.”