Iswilia 11 - Baibuli I Leb Kumam 2013

Dwongo ka Rwot

¹ “Poore imarunu Rwot Rubanga wu di ilubunu iswilia kede cik mege nakanaka.

² Mito wun tin kong iparunu kop i kom gikame Rwot otimo ne wu pi rieno wu, piento en bin erieo wun, do likame idwe wu. Wun en kame bin inenunu dwongo ka Rwot, twer mere kede teko mere,

³ kede jamini me aura kame en bin etimo but Parao, abaka me Misiri, kede ne piny mere dedede.

⁴ Wun bin inenunu gikame Rwot otimo ne isirikalen me Misiri, asigiran kede cabalan gi, kite kame en bin emio kede pii me Nam Akwar omwonyo gin kede atwal, di gin bin kitie wapo wun.

⁵ Wun ingeunu gikame Rwot bin otimo ne wu i wi tim di pwodi likame itununu kan;

⁶ kede gikame en bin etimo ne Datan kede Abiram, awobe ka Eliab dano me ekeko ka Ruben. Wun bin inenunu kite kame Rubanga omio lobo oyabere kede i dier jo me Isirael di eko mwonyo gin karacel kede jo me ude gi, iemai gi, jotic kede leini kame gin bin kitie kede dedede.

⁷ Wun bin inenunu kede wangu jamini dedede adongodongo kame Rwot bin otimo.

Winyo kame Jo bino Udo i Lobo kame Kocikere Pire

⁸ “Poore ilubunu cik dedede kame tin ango atie mino wu, tetekeny ibedunu kede teko me ot mano lobo kame itienu ngolo ecilet pi ot donyo iye di eko doko meru,

⁹ kede tetekeny ibedunu pi kare kalac i lobo kalac di mio nono, lobo kame Rwot bin okwongere pire but joakwari wu be ebino mino but gin kede ikwae gi.

¹⁰ Lobo kame nataman wun iyapununu donyo iye pi mane di eko doko meru likame cal bala lobo me Misiri kame wun iyaunu iye; kakame bin ipitunu iye kodere wu di ikounu timo teko onyo negi pii pi li me kot.

¹¹ Do lobo kame wun itienu ngolo ecilet pi ot mano di eko doko meru obedo lobo kame tie kede mori kede aditoto kame kot cwei iye.

¹² En lobo kame Rwot Rubanga wu gwoko, cako ki ageini me mwaka tuno i atiekini mere.

¹³ “Pi mano, lubunu cik kame tin ango atieko mino wu; marunu Rwot Rubanga wu di itimunu ne tic kede cunyu dedede kede kuo wu lung.

¹⁴ Ka itimunu kamanono, en ebino mino kot cwei i lobo wu i kare kame kot mitere iye, kot me agege kede kot me are, tetekeny ibedunu tie kede cam, bwini kede mo me olibeti,

¹⁵ kede lum ne doke, diegi kede romini wu. Ibinunu bedo tie kede cam dedede kame imitunu.

¹⁶ Miero igwokerenu kur mit me cunyu mi wu iparaunu tenge kibut Rwot di ikounu lokere timo tic ne rubangan apat di iworunu gi.

¹⁷ Ka itimunu kamano, cuny Rwot bino wang i komu di eko gengo kot cwei, di lobo ko tuo likame ekaruno ceko cam; di do wun ikounu to awakawaka i lobo aber kame Rwot tie mino wu.

¹⁸ “Poore iketunu kope na nogi i cunyu kede i kuo wu. Tweunu gi i ngut cingu kede i tur nyimu pi bedo gianena kame poo wi wu.

¹⁹ Pwonyunu idwe wu i kom gi. Tatamunu kop i kom gi ka itienu i paco kede ka itienu tenge, ka itienu buto kede ka iyaunu ki kabuto.

²⁰ Wandikunu gi i kom ipirin me ikekon wu kede i kom irutei wu.

²¹ Timunu kamanono tetekeny wun karacel kede idwe wu ibedunu atwal i lobo kame Rwot bin okwongere pire but joakwari wu be ebino mino gi pi bedo mergi pi kare lung.

²² Poore iketunu cunyu lubo cik nogi dedede kame tin ango atie mino wu; marunu Rwot Rubanga wu, timunu gi dedede kame en eciko ne wu, kede mokunu i kome,

²³ di en eko bino riamo tenge atekerin nogo dedede ki nyimu, di wun ikounu mano lobo me atekerin adongodongo di kitek kalamo wun.

²⁴ Kabedere dedede kame tienu bino nyono bino doko meru; Lobo wu bino cakere ki wi tim kame tie i bad tetu piny tuno tetu malo i mori me Lebanon, kede ki ecilet me Eupurate kame tie i bad tetu kide tuno i nam kame tie i bad tetu tim.

²⁵ Kabedere dedede kame wun ibinunu tuno iye i lobo nono, Rwot Rubanga wu bino mino jo dedede bedo kede lworo atek i komu bala kame en etieko cikere pi timo; likame tie ngatamoro kame bino karuno cungo i nyim wu pi yi kede wu.

²⁶ “Nenunu, tin ango atie keto i nyim wu winyo kede ilam.

²⁷ Ibinunu udo winyo ka ilubunu cik ka Rwot Rubanga wu kame tin ango atie mino wu;

²⁸ ibinunu udo ilam ka likame ilubunu cik ka Rwot Rubanga wu, do ikounu lokere tenge ki yongayo kame tin ango atie ciko wu pi lubo, di ikounu donyo woro rubangan mogo kalikame oudo ingeunu.

²⁹ Kame Rwot Rubanga wu otieko tero wu i lobo kame itienu ot donyo iye pi bedo iye, wun ibinunu tatamo ki wi moru me Gerisim winyo kame Rubanga bino mino wu, do ilam kame ibinunu udo kibute ibinunu tatamo ki wi moru me Ebal.

³⁰ (Bala kame wun ingeunu, mori nogi tie loka tetuca, i lobo me jo Kanan kame bedo i aditot me Yorodan. Gin kitie i bad tetu tim, kabedo kalikame bor kede ejinga me More, i nget bomba me Giligal.)

³¹ Ka ingolunu ecilet me Yorodan pi ot mano lobo kame Rwot Rubanga wu tie mino wu, di do itiekunu mane ikounu donyo bedo iye,

³² miero iketunu cunyu lubo iswilia kede cik dedede kame tin ango atie mino wu.