Isaya 7 - Baibuli I Leb Kumam 2013

Kop kame Isaya Otero ne Abaka Akas

¹ I kare kame abaka Akas, wot ka Yotam, akwar Usia oudo pugo kede Yuda, yi oko poto. Resin abaka me Siria, kede Peka wot ka Remalia me Isirael oko ot pi koto suro Yerusalem, do likame kiko twero make.

² Kakame kop oko tuno kede but abaka me Yuda be Siria oudo otieko ribere kede Epuraimu, kom Akas kede jo mege oko donyo miel amiela bala yen me abum kame yamo puo.

³ Rwot oko waco ne Isaya be, “Kwany wodi Sear Yasub di iko upere kede pi ot riamo kede Abaka Akas. Ibinunu ude i yongayo kakame jo kame timo igoen tio iye, i ajikini me puleju kame molo pii wok ki atapar me malo.

⁴ Wac ne pi bedo di egwokere, di ekweo kome, kede di eli kede lworo moro; doko kur emi cunye nyote pi isikin are kame mac tie camo nogi, pi gero agwai kame Resin kede Aram kede wot ka Remalia tie kede.

⁵ Pien Siria, karacel kede Isirael kede abaka mere tie kede iik arac i komi.

⁶ Gin kitie mito suro Yuda, di kiko mane edoko mergi, di kiko keto wot ka Tabel doko abaka mere.

⁷ “Pi manono, ango Rwot atie waco be, iik nono likame bino cungo; likame ebino timere.

⁸ Pien bomba me Damasiko en kame tek lo Siria, doko da Abaka Resin en kame pugo Damasiko. I kom kop amako Isirael, di mwakini ot kanyape kiwie kany likame okato, udo Isirael otieko poto likame doko etwero cungo bala ateker.

⁹ Bomba me Samaria en kame tek lo Isirael, doko da wot ka Remalia en kame pugo Samaria. “Ka likame yei ni ocungo di tek, likame ibino twero.”

Gianena me Emanuel

¹⁰ Rwot oko bobo cwano ne Akas kop be,

¹¹ “Peny Rwot Rubanga ni pi mini gianena moro. Etwero bedo gianena moro atie kakatut i kabedo me jo oto, arabo atie malo kakabor.”

¹² Akas oko dwoko be, “Ango likame abino penyo pi gianena moro; likame abino tamo Rwot.”

¹³ Isaya oko dwoko be, “Winyunu wun ikwae ka Daudi. Iparunu be ebedo gikame titidi me wun olo jo, omio nan imitunu doko olo Rubanga na da?

¹⁴ Do Rwot pwodi bino mini gianena; tie nyako oyac kame bino nywalo atin awobi di eko cako nyinge Emanuel.

¹⁵ Tuno i kare kame atin nono odoko didit kede di engeo poko gikarac kede gikaber, udo jo ocako mato cak kede camo mokic.

¹⁶ Doko da akadi di kare kame en etwero poko kede gikarac kede gikaber likame pwodi otuno, lobo me abakai are kame tie mini lworo no udo otieko dong nono.

¹⁷ “Rwot bino kelo i komi kede i kom jo ni kede i kom jo dedede me ekeko ka kwaru ni peko adwong kame epone mere likame lem pwodi otimere cako i kare kame Isirael opokere kede ki kom Yuda; en ebino kelo abaka me Asiria.

¹⁸ “Kame kare nono otuno, Rwot bino winyao pi lwongo jo kame bedo i acakini me isamai me Misiri pi bwote bino bala lwangini, kede pi lwongo jo me Asiria bwangere bino ki lobo gi bala kic.

¹⁹ Gin kibino bino di kiko donyo bedo i aditoto atut, kede i kakobabarun me mori, kede i okuti koswapo, kede i dud lum kodongo.

²⁰ “Kame kare nono otuno, Rwot bino pango abaka me Asiria ki loka tetuca me ecilet me Eupurate pi bino lielo kede liedi yer me tiku, kede yer me wi wu, kede me komu.

²¹ “Kame kare nono otuno, akadi ka dano moroni oudo okano diang acel kenekene kede romini are,

²² gin kibino mine cak atot kame rome. Jo anonok kame bino dong i lobo nono bino mato cak kede camo mokic.

²³ “I kare nono, poti me olok kame oudo tie kede dud olok tutumia acel, kame romo kelo sente akaya me siliba tutumia acel, bino umere kede ocokocok kede okuti.

²⁴ Jo bino donyo ot dwar kunono kede imalia, pien lobo nono dedede bino swapo di eko umere kede ocokocok kede okuti.

²⁵ Bad imukuran dedede kame oudo jo puro likame doko ngatamoro bino sobolo tuno iye, pien udo ocokocok kede okuti otieko duko kugonogo; kibino doko kacam me dok kede romini.”