Isaya 65 - Baibuli I Leb Kumam 2013

Rubanga mio Jojemo Alola

¹ Rwot owaco be, “Ango oudo atieko iikere pi gamo kwac ka jo na, do gin likame kiko kwana. Ango oudo atieko iikere pi gin wuda, do gin likame kiko mona. Bed bala ateker nono likame okwaa, do ango abedo waco negi be, ‘Ango ine, ango ine.’

² Ango abedo tango cinga piny yuluyul but jojemo, pi kwano gi be kidwog buta, gin jo kame kilubo yongayo kalikame ber di kilubo iik gin ken gi.

³ Gin kibedo wango cunya abongo lewic. Gin kimio giayala but caljwogi i poti, doko kiwango odok angwe kur i wi alutari me caljwogi.

⁴ Gin kioto bedo i atesin, doko iwor gin kioto bedo kabedere me mung. Gin kicamo ringo me epege, doko kimato cwe me ringo me kwer kame tie i sepulan gi.

⁵ Di do kiko waco ne jo icegun be, ‘Cungunu tenge, kur inokunu wa; wan jokacil twatwal, likame wun ipoorenu mulo wa!’ Jo nogi cal bala yiro kame kwikwio uma. Lilo na i kom gi cal bala mac kame liel piny yuluyul.

⁶ “Neningo, ango atieko wandiko kop piny kamane: Ango likame abino ling alinga, do abino culo gi; abino culo gi cul kame romo gi

⁷ pi dub gi kede me joakwari gi. Gin kitieko wango odok angwe kur i wi mori di kiko yamo kirac i koma. Ango abino mino gi alola kame romo pi dub gi.”

⁸ Rwot waco be, “Bala kame bwini udere kede ki anyakini me olok, jo waco be, ‘Kur idudubo en, pien gikame ber tie iye,’ ango da abino timo kamanono pir jotic na, di likame ako muducaro gin dedede.

⁹ Ango abino mino jo me Isirael ikwae kame yai ki ekeko ka Yuda, di gin kiko bino mino lobo na kame mori tie iye doko mergi. Jo na kame ayero, jotic na, bino bedo kanono.

¹⁰ Gin kibino wora. Di do elet me Saron i bad tetu tim kede aditot me Akor i bad tetu kide ko bino doko kakwat gin, kakame doke kede romini gi camo iye di kiko urako.

¹¹ “Do likame ebino bedo kamanono ne wun jo kame idaganu, wun jo kame wi wu wil kede moru na kacil, di ikounu mino giayala wu me cam kede bwini but rubangan kame wun iwacunu be mio jo winyo.

¹² Ango abino mino koneko wu kede epima, pien kakame ango alwongo wu kede, wun likame ikounu gamo doga, akadi winyo kop na kakame ango oudo ayamo kede. Wun itimunu gikarac i wanga, doko iyerunu timo gikame cunya dagi.

¹³ Pi mano, ango awaco ne wu be jotic na bino bedo tie kede giacama kede giamata kame romo gi, do wun ibinunu kanyo kec kede orio. Jotic na bino ilel do wun lewic bino mako wu.

¹⁴ Jotic na bino wer pi yomcuny, do wun ibinunu boroboro koko kede aramacuny atek.

¹⁵ Jo na kame ayero bino tic kede nyingu me timo ilam. Ango Rwot Rubanga abino neko wu, do abino mino jotic na nying anyen.

¹⁶ Di do ngatamoroni kame kwao winyo i lobo ko bino kwano winyo i nyinga, ango Rubanga kame genere. Doko ngat kame kwongere, ko bino kwongere i nyinga, ango Rubanga kame genere. Peko wu me kare kasek udo otiek, doko wia udo otieko wil kede gi.”

Cwec Anyen

¹⁷ Rwot waco be, “Ango atie cweno malo anyen kede lobo anyen. Gikame otimere i kare kasek likame bobo kobino yutuno, doko likame kibino bino i tam ka ngatamoro.

¹⁸ Do bedunu kede yomcuny di ikounu ilel nakanaka pi gikame ango atie cweno. Yerusalem anyen kame ango atie cweno ilel dwong iye, doko jo mege yomcuny dwong negi.

¹⁹ Ango abino ilel pi Yerusalem, doko cunya bino bedo yom pi jo mege. Dwan moro me koko likame bino winyere iye, arabo koko moro me can.

²⁰ Idwe kame konywalo di ko bedo kuo pi ceng anonok di kiko to likame bino bedo tie iye, akadi dano adwong kalikame bino tieko kare me kuo mere lung. Dano kame bino to di mwakini mege me dongo tie tol acel, kobino tero be en oudo pwodi eponga. Doko ngat kame bino to di pwodi mwakini mege me dongo likame oromo tol acel kobino tero be oudo kolame.

²¹ Jo bino gero ude di kiko bedo i yi gi; kibino pito olok di gin kiko camo anyakini gi.

²² Jo likame bino gero ude di jo apat en kame ko bino bedo i yi gi. Doko likame kibino pito olok gi di jo apat en kame ko bino camo. Jo na bino bedo kuo tieko kare kalac bala yen. Jo na kame ayero bino udo bero me tic me cing gi.

²³ Likame kibino cane timo tic nono, doko idwe gi likame bino riamo kede peko. Ango abino mino gi winyo karacel kede ikwae gi.

²⁴ Di pwodi gin likame kikwaa, ango abino gamo kwac gi, doko di pwodi gin likame kitieko waco gikame kitie kwano, ango abino winyo kwac gi.

²⁵ Ipeon kede idwe me romini bino cam karacel; inguon bino camo arienge bala dok, doko cam me twole bino bedo apua. Gin likame kibino kakao jo arabo mino ngatamoro awanon i wi moru na kacil.”