Isaya 64 - Baibuli I Leb Kumam 2013

¹ Okwe koto di in iko yabo malo iko bino piny, tetekeny mori neni di gin kiko yayangun!

² Gin koto kiyayangun bala pii kame gugunyo i mac kodop. Bia imi jokwor ni ngei, tetekeny kineni di kiko bedo kede mielkom!

³ I kare moro in bin ibino di iko timo jamini kame kelo lworo, gikame wan oudo likame ogeno be twero timere; mori bin oneni di gin kiko yayangun.

⁴ Cako riki sek, likame tie ngatamoro kotieko neno arabo winyo kop i kom Rubanga moro apat kame cal bala in, ngat kame timo gikame cal kamagonogo ne jo kame gene.

⁵ Nakanaka in igamo jo kame cuny gi yom i timo gi kopoore, jo kame yutuno bedo iepone kame in imito negi. In oudo cunyi owang kede wa, do wan oko meede kede timo dub; bed bala in ibedo tie kede gero adwong, do wan obedo meede timo dub cako i kare kasek.

⁶ Wan dedede otieko doko cal do bala jo kopwokere; akadi tim wan kopoore dedede cal do bala egoe kimodokok. Dub wa otieko mino odoko cal bala boke kame ner di yamo ko kuto gi tero gi tenge.

⁷ Likame tie ngatamoro kame lego buti, arabo kame moko i komi pi mito kony. In itieko kano ne wa wangi di iko jalo wa i dub wa.

⁸ Do di in, Okwe Rwot, en papa wa. Wan ocal bala elupe, do in ngacwei agune. Wan obedo tic me cingi.

⁹ Pi mano, kur cunyi wang kede wa kitek ateka, Okwe Rwot, doko kur ibed yutuno dub wa nakanaka. Neningo, wan dedede obedo jo ni.

¹⁰ Bomba ni kacil otieko doko wi tim; Yerusalem do tie ameje kame jo otieko weko.

¹¹ Tempulo wa, odi acil, kakame bin joakwari wa paki kiye, kotieko wango. Kabedere wa dedede kame oudo omaro otieko doko amejeko.

¹² Ingei neno magonogi dedede, Okwe Rwot, benyo, iyaro kanyo kop di likame iko timo gimoro, doko di iko mino wa alola atek ateka?