Isaya 63 - Baibuli I Leb Kumam 2013

Rwot Obwono Atekerin

¹ “Ngai ino kame tie bino di ewok ki bomba me Bosira kame tie i piny me Edom? Ngai inonono kame tie bino kede teko kede twer adwong di engapo igoen kobokere bubu?” Rwot kom inonono kame tie bino pi waco kop me alako, en ngat kame ekaruno lako jo piento en etek.

² “Pinyo bo komio igoen mege obokere bala me ngat kame nyonyono olok pi bino bwini?”

³ Rwot gamo be, “Ango atieko nyonyono atekerin bala olok abongo ngatamoro konya. Ango anyonyono gi di alilo, omio remo gi opwoko igoen na dedede.

⁴ Ango atimo kamanoni pien kare me lako jo na oudo otieko tuno, doko ceng me timo onyanga pirgi oudo tie i cunya.

⁵ Ango angoloro piny, di ako udo be likame oudo tie ngatamoro kame twero konya. Anganyo wanga pi mito neno, do likame oudo tie ngatamoro kame twero mina teko. Aso, ango ako tic kede teko na di ako lako gi, doko lilo na en komia teko me timo manoni.

⁶ Ango ako nyonyono atekerin dedede di ako nyinyito gi pien oudo alilo. Ango aonyo remo gi piny i lobo.”

Bero ka Rwot but Jo me Isirael

⁷ Ango abino tatamo gikame Rwot otieko timo pi kisa mere, jamini kame mio wan poore opake. En etieko timo bero adwong but jo me Isirael pi cuny me kisa mere kede pi amara mere kalikame lokere.

⁸ Rwot owaco be, “Ateteni gin en jo na; likame kibino ngala.” Di en eko lako gi

⁹ ki can dedede kame oudo kitie iye. Likame malaika en kame bin olako gi, do Rwot kikome. En elako gi pi amara kede cuny me kisa mere. I kare kasek en oudo egwoko gi nakanaka,

¹⁰ do gin kiko jemo ne di kiko wango cuny tipo kacil mere. Pi mano, Rwot oko doko ngakwor gi, di en kikome eko yi kede gi.

¹¹ Di do gin kiko yutuno gikame bin otimere i kare kasek, i kare ka Musa, ngatic ka Rwot, di kiko penyere be, “Kara Rwot ngat kame bin olako jo kede jotel gi di kibeo i dier nam, nataman do tie tuai? Rwot kara tie tuai, en ngat kame bin emio Musa tipo kacil mere?

^12-13 Rwot kara tie tuai, en ngat kame pi twer mere bin etimo jamini adongodongo di etio kede Musa? En bin epoko pii me nam i diere di eko telo jo mege beo ki dier nam. Manono en bin etimo pi mino nyinge bedo iruo nakanaka.” Rwot bin otelo gin ngolo nam di kioto bala asigira kame tie ot ki wi tim. Gin bin likame kigete akadi acel.

¹⁴ Bala kame kotero kede dok cam i aditot, kamanono da Rwot bin oko mino jo mege wei. En bin etelo jo mege di manono oko kelo ne wor.

Ilega me Kwano Kisa kede Kony

¹⁵ Okwe Rwot, ngoloro wa ki malo kabedo ni kacil, en kabedo me deyo, di iko neno gikame tie timere. Cunyi kame paro pirwa do tie tuai? Twer ni kara tie tuai? Ani amara ni kede cuny me kisa ni? In itieko kwanyo gi kibut wa.

¹⁶ In en papa wa. Bed bala joakwari wa Aburaam kede Yakobo kwia wa, do in, Okwe Rwot, ibedo papa wa; cako riki sek in ibedo Ngalak wa.

¹⁷ Okwe Rwot, pinyo bo komio in imio wan oparao tenge ki yote nin? Pinyo komio in imio wan obedo joepali, tetekeny likame olwori? Lokere idwog but wa pir jotic ni, kede pir jo me ikekon kobedo megi.

¹⁸ Wan jo ni kacil, jokwor wa oudo oriamo wa tenge pi kare katitidi; gin kitieko reto piny kabedo ni kacil.

¹⁹ Wan otieko kare kalac di obedo bala jo kalikame in en ipugo, ineno do bala wan likame obedo jo ni.