Isaya 60 - Baibuli I Leb Kumam 2013

Deyo me Yerusalem i kare me Anyim

¹ Yai, Yerusalem, di iko rieny bala ceng; deyo ka Rwot tie rieny i komi!

² Colpiny bino umo lobo, doko colpiny kacucucuc bino umo atekerin; do lero ka Rwot bino rieny i kom in, doko deyo mere bino neeno buti.

³ Atekerin bino bino i lero kame in itie kede, doko abakai da bino bino i lero kame tie yabere buti bala ru me piny.

⁴ Ting wangi malo di iko ngoloro ngeti rimaro; jo ni tie cokere, gin kitie dwogo buti; awobe ni bino bino ki kakabor, doko idwe ni anyira kobino tingo atinga bala idwe atitino.

⁵ In ibino neno manoni di cunyi ko pong kede ilel; ebino lelepo cunyi di iko ilel, pien kobino kelo ni abar me atekerin; kobino kelo gi di kongolo kede gi i nam.

⁶ Aguraguran bino umi, aguraguran kame pwodi dongo adonga me Midian kede Epa. Gin kibino bino ki Seba di kikelo saabu kede odok angwe kur, di kiko bino pako Rwot pi gikame en etimo!

⁷ Romini dedede me Kedar, kede imerekekin me Nebaiot kobino kelo buti bala giayala; kobino yalo gi i wi alutari pi yomo cuny Rwot, di Rwot ko bino mino ode me deyo dwongo.

⁸ Alu ige kame por kede imerin bala idoun, arabo kame cal bala amam kame tie dok i ude gi?

⁹ Jo ni kame tie i lobere atie i dog nam adwong tie kuro Rwot. Imerin me Tarusi en kame bino cako bino, pi kelo idwe ni ki kakaboco. Gin kibino mako siliba kede saabu gi kibino kede, pi woro Rwot Rubanga ni, Rubanga kacil me Isirael, piento en etieko mini dwongo.

¹⁰ Rwot waco kop i kom Yerusalem be, “Jokumbor bino gero apama ni bobo, doko abakai gi bino timo ni tic. Ango oudo alilo en komio ako mini alola, do nataman pi bero na, ango atieko bedo kede cuny me kisa i komi.

¹¹ Irutei ni likame kobino cego; iwor kede iceng gin kibino bedo twolo, tetekeny atekerin bed kelo ni abar gi, di kotelo abakai gi i esirit me jo kame kobwono.

¹² Atekerin kalikame bino timo nin tic kobino muducaro gi atwal.

¹³ “Yerusalem, deyo me Lebanon kobino kelo buti; yen mege abeco kobino kelo me tubuso Tempulo na, di kabedo kame ango ateno iye tiena ko bedo ibus.

¹⁴ Ikwae me jo kame bin teri kirac bino bino di gin kiko luro wi gi piny buti pi nyuto wor gi. Jo dedede kame bin cai bino riebere piny i tieni. Gin kibino lwongi be, ‘Sion, Bomba ka Rwot, Ngat Kacil me Isirael.’

¹⁵ “Bed bala jo otieko weki, doko cuny gi dagi, dano moro kame beo buti da li, do ango abino mini dwongo nakanaka, iko doko kabedo me ilel ikar kede ikar.

¹⁶ Atekerin adongodongo kede abakai atek me wi lobo bino gwoki, di in iko bino ngeno be ango Rwot en ngalak ni, ango Won Twer me Isirael.

¹⁷ “Ango abino kelo ni saabu akaka nyonyo buronsi, siliba akaka nyonyo ayon; nyonyo buronsi akaka ebao, nyonyo ayon akaka kide. Abino mino mulem bedo bala ngapug ni, kede tim kopoore ko bedo bala ngatel ni.

¹⁸ Tim me gero likame bobo bino winyere i lobo ni, peko kame yi kelo arabo amuducar likame bobo bino bedo tie i lobo ni. ‘Alako’ en nying kame in ibino mino apama ni me cel, ‘Pak’ en nying kame in ibino mino irutei ni.

¹⁹ “Ceng en kalikame bobo bino mini lero i esawa me iceng, akadi duwe da likame en kame bino mini lero iwor; ango Rwot, en kame abino bedo lero ni nakanaka, di ako kelo ni deyo.

²⁰ Kare ni me iturur bino jik, ango Rwot en kame abino bedo lero ni kame bedo nakanaka. Ceng nin likame bobo bino donyo, duwe ni da likame bino to.

²¹ Jo ni dedede bino timo gikame poore; lobo bino doko mergi atwal. Gin en jange kame ango oudo apito, tic me cinga, tetekeny gin kimi deyo na ngere but jo dedede.

²² Akadi jo ni me diakal atitidi, bino doko twon ateker. Ka kare otuno, ango abino mino manoni timere awakawaka. Ango en Rwot!”