Isaya 6 - Baibuli I Leb Kumam 2013

Rubanga Olwongo Isaya pi bedo Enabi

¹ I mwaka kame abaka Usia oto iye, ango ako neno Rwot di etie bedo i wi kom mere me ajakanut, di ediede malo, di lak ekanso mere oyarere oromo yi tempulo lung.

² Serapim oudo tie cungo i ngete, acelacel kikom gi oudo tie kede bwome kanyape; bwome are oudo eumo kede wange, bwome are oudo eumo kede tiene, kede bwome are oudo epor kede.

³ Oudo kitie lwongere ken gi ken gi di kiwaco be, “Ecil, ecil, ecil Rwot me jo yi; wi lobo lung opong kede deyo mere.”

⁴ Gato me dwan gi oko mino dud apama me tempulo oyangere, di yiro oko pongo yi tempulo lung.

⁵ Ango ako waco be, “Atie i can! Abino to, pien kope awok ki doga obedo kope areco, doko da ango abedo i diere me jo kame kope awok ki dog gi reco; do di wanga otieko neno Abaka, en Rwot me jo yi.”

⁶ Di acel kikom giakuo nogo oko por buta di emako itonge me mac kame oudo ekwanyo ki alutari kede iluma.

⁷ Di eko mino itonge me mac omulo doga, eko waco be, “Bala kame nan mac noni otieko mulo kede dogi, raco ni otieko kwanyere, doko da kotieko weno tenge dub ni.”

⁸ Di ako winyo di Rwot penyere be, “Abino cwano ngai? Ngai kame bino bedo aor wa?” Ango ako dwoko be, “Ango ine; cwaa!”

⁹ En eko waco na be, “Oti iwace jogo be, ‘Akadi imeedenu winyo benyo, do likame ibinunu niang; akadi imeedenu ngino benyo, do likame ibinunu ngeno gikame tie timere.’ ”

¹⁰ Di eko waco na be, “Mi tam ka jogo dok bangabanga; mi yit gi dingi; kede da imi wang gi totoun, tetekeny likame wang gi ko karuno neno piny, kede yit gi da likame ko twero winyo kop, kede tam gi da likame ko karuno niang gimoro, me wek kur kilokere buta di ako cango gi.”

¹¹ Ango ako penyere be, “Rwot, ebino bedo kamanoni tuno awene?” En eko dwoko be, “Tuno di bomban otieko doko amejeko; tuno di ude otieko dong nono abongo jo; tuno di lobo noni otieko dong nono abongo gimoro iye.

¹² Ango abino cwano jo dedede kakabor di lobo noni ko dong kene.

¹³ Akadi bed bala acel kikom tomon me jo dong iye, gida kobino wango gi bala isiki me yat oak kame kotieko tongo piny.” Isiki nono bino bedo acakini anyen me jo ka Rubanga.