Isaya 58 - Baibuli I Leb Kumam 2013

Kanyo Kec me Ateteni

¹ Rwot waco be, “Lelemo kitek, kur iling akadi acel! Lelemo kede dwani amalo bala agwara! Wace jo na jemo gi; tuc ne jo me ot ka Yakobo dub gi.

² Gin kiwora buli ceng, di kiwaco be cuny gi mito kitek ngeno yote na. Gin kom kitimere bala ateker kame timo gi kopoore, ateker kalikame oweko iswilia ka Rubanga gi. Kipenya pi ngolo negi kop kakare, doko cuny gi yom pi wora.”

³ Jo penyere be, “Ka Rwot likame neno kanyo kec wa, pinyo kame mio wan okanyo kec? Pinyo kame mio wan omio kom wa neno can ka en likame eparo gimoro iye?” Rwot waco negi be, “Nenunu, ceng kame wun ikanyunu kede kec nogo en bobo kame wun iparunu kede piru kenekene, di ikounu tero jotic wu kirac.

⁴ Kanyo kec wu mio wun ibedunu ger, di ikounu lok kede ikounu yi. Akodi kanyo kec wu nono likame mia awinyo kwac wu.

⁵ Iparunu be akodi kanyo kec wu nono en kame ango amito, ceng kame wun imiunu kede komu neno can di ikudunu wi wu piny bala emusala? Arabo iparunu be ngapo igoen me iturur kede bebelo i buru en kame ango amito? Benyo, mam manono en gikame wun ilwongunu be kanyo kec? Iparunu be cunya bino bedo yom iye?

⁶ “Epone me kanyo kec kame ango amito en ine: wekunu tero jo kirac, kede gonyunu jo kame kotweo di ikounu weko gi kioti.

⁷ Nywakunu cam wu kede jo kame kec oneko kede iterunu jocan kame li kede miere i ude wu. Miunu igoen but jo kame li kede gi me angapa, doko kur idagunu konyo joawade wu.

⁸ “Di do lero na ko yabere butu bala lero me obai, di ikounu cango awakawaka. Ango abino bedo kede wu nakanaka pi gwoko wu; abino telo ne wu yongayo, doko da abino gwoko wu ki cen ngei wu.

⁹ Ka ibinunu lego buta, ango abino gamo dog wu. Ka ibinunu koko buta pi konyo wu, ango abino waco ne wu be, ‘Ango ine!’ “Ka wun ijikunu tero jo kirac, cicimo jo, yamo areco;

¹⁰ ka wun imiunu cam but jo kame kec oneko kede imiunu jo kame tie kede rem jamini kame mitere ne gi, lero bino rieny butu di colo kame itienu iye ko lokere doko bala lero me i dier iceng.

¹¹ Ango abino telo wu nakanaka di ako mino wu gikame mitere ne wu i kabedere kotuo. Abino mino ibedunu tek di itienu kede yotkom. Ibinunu bedo cal bala poto kame pii oromo kiber, bala atan kalikame tuo.

¹² Ibinunu bobo gero kabedere kame oudo obedo amejeko pi kare kalac. Ibinunu gero gi i kom acakini acon. Kobino lwongo wu be joik apama, jo kame odwoko ude kame bin kodudubo.”

Giamia me Pwoc pi Gwoko Sabato

¹³ Rwot waco be, “Ka wun iterunu Sabato bala gikacil di likame imounu gikame ber piru kenu i ceng kacil nono; ka wun iterunu Sabato bala ceng me yomcuny, kede bala ceng kacil ka Rwot, ceng me awora kalikame poore lubo iye mit me cunyu kenu, arabo mono gikame mako wu kenu, arabo yamo atatai,

¹⁴ ibinunu udo yomcuny i timo tic na. Ango abino mino koworo wu i wi lobo lung, di ikounu bedo kede yomcuny i lobo kame bin ango amio kwaru wu, Yakobo.” Ango Rwot atieko waco.