Isaya 54 - Baibuli I Leb Kumam 2013

Amara ka Rwot but Jo me Isirael

¹ Weri, Okwe in ngat kame ical bala adonge ngat kalikame oudo onywal; dip wer di ilelemo pi kilel, in ngat kalikame ibilo aramo me nywal! Pien idwe me dako kame oudo cware oweke bino bedo tot kalamo idwe me dako kame tie kede cware. Manoni Rwot en owaco.

² Nyai eema ni dok lac; med boro me aunon mege di iko guro loc mege di tek!

³ In ibino nyiko ikor ni i bad tetu dedede; jo ni bino dwoko lobo kame atekerin apat nataman tie bedo iye. Jo bino donyo bedo i bomban kame nataman jo li iye.

⁴ Kur ibed kede lworo, pien likame bobo lewic bino maki; kur imi cunyi dwono, pien likame kobino mini lewic. Wi bino wil kede lewic me kare me aponga ni, doko lewic kame oudo itie kede me bedo apuserut likame ibino yutuno bobo.

⁵ Ngat kocwei bino bedo bala cwari; nyinge Rwot me jo yi. Ngat Kacil me Isirael en Ngalak ni; en Rubanga me wi lobo lung.

⁶ Isirael, in ical bala nyako kame cware oweke di eko bedo tie kede cwercuny. Do Rwot tie lwongi pi dok bute di ewaco be,

⁷ “Ango oudo ajali pi kare katitidi, do abino dwoki buta kede amara adwong.

⁸ Ango oudo akano wanga ki buti, pi kare katitidi pi lilo atek, do ango abino bedo kede cuny me kisa i komi di ako mari nakanaka; manoni en kop kame Rwot Ngalak ni owaco.

⁹ “I kare ka Nua bin ango akwongere be likame bobo abino mino pii mwonyo lobo. Kamanono da nataman ango akwongere be likame bobo abino bedo kede wangcuny i komu; likame abino bunano wu.

¹⁰ Mori twero kobo, imukuran da kotwero kwanyo tenge, do amara nango kalikame lokere likame bino yai tenge ki buti, doko isikan na me mulem likame kobino kwanyo tenge.” Manono en kop kame Rwot ngat kame tie kede cuny me kisa i komi owaco.

Yerusalem me Kare me Anyim

¹¹ Rwot waco be, “Okwe in Yerusalem, jo ni tie neno can, kili kede anapakin, doko likame tie ngat kame kweo cuny gi, neningo, ango abino gero acakini ni kede kide me wel.

¹² Ango abino gero ot ni abor malo kede kide kame kolwongo be rubis, irutei ni abino gero kede kide ameny milimili, kede apama ni ako gero kede kide me wel.

¹³ “Ango kikoma abino pwonyo jo ni di gin kiko bino bedo kede mulem me aura.

¹⁴ Timo gi kopoore bino mino icungo di itek; ibino bedo bor kede jo kame teri kirac, doko likame ibino bedo kede lworo moro; jo kame teri kirac likame bino noki.

¹⁵ Ka dano moro osuri, likame udo ango en kame acwae; dano moroni kame suri bino udo peko pi in.

¹⁶ “Neningo, ango en kame acweo ngatet, ngat kame dopo mac di eko teto kede jamini me yi. Ango en kame acweo sirikale da, ngat kame tio kede jamini me yi pi timo nek.

¹⁷ Likame tie gi me yi moro kame koiko pi suri kame bino cobo timo tic mere, doko in ibino lono kope me pido dedede kame kokelo i komi. Manoni en gikame jotic ka Rwot udo bala mergi; lono kop gin wok ki buta.” Manoni Rwot en owaco.