Isaya 50 - Baibuli I Leb Kumam 2013

¹ Rwot penyere be, “Ani bo baluwa kame ango ariamo kede toto wu? Arabo won banya mene kame ango acato wu bute? Nenunu, kocato wun pi dub wu, doko wun iturunu iswil en komio koriamo toto wu.

² “Pinyo bo komio i kare kame bin ango ako bino kede likame audo ngatamoro? Pinyo komio likame tie ngatamoro kogamo doga kakame alwongere kede? Benyo, iparunu be ango agoro likame akaruno lako wu? Arabo iparunu be ango ali kede twer me lako wu? Ango atwero ciko nam di eko tuo, doko ango atwero loko icileta doko wi tim, di aporogon gin ko to pi li me pii di kiko top.

³ Ango atwero mino malo doko col cucucuc, bala egoe kame kongapo me iturur pi dano oto.”

Wor kame Ngatic ka Rwot tie kede

⁴ Rwot Rubanga otieko pwonya gikame apoore waco, tetekeny ango akaruno mino teko but jo ool. Buli odiko en ecea pi mina winyo gikame en emito pwonya.

⁵ Rwot Rubanga otieko yabo yita, doko ango likame oudo ajemo ne, arabo aloko ne ngea.

⁶ Ango ako jalo ngea ne jo kobunga, kede lema da ajalo ne jo kopuputo yer me tika; likame ako kano wanga kakame oudo koyeta kede di kongungulo lau iye.

⁷ Rwot Rubanga en kame konya; pi mano, lewic likame bino maka. Ango abino mino wanga bedo tek twatwal. Ango angeo be likame kobino mina lewic,

⁸ pien ngat kame bino nyuto ateni na tie iyapiyapi. Ngai kame bino pido keda? Mito ecung keda i nyim ekiko. Alu kara en kobedo jokwor na? Mito gin kipida.

⁹ Rwot Rubanga en kame konya; ngai kame bino ngolo kop loa? Jo dedede kame pida bino ti bala egoe; gin kibino doko li bala egoe kame ajekel ocamo.

¹⁰ Alu kikomu kame lworo Rwot di kilubo timo gikame ngatic gi waco? Mito wun jo kame iotunu ki piny acol, jo kame lero li ne gi, iketunu gen wu i kom Rwot doko igongerenu but Rubanga wu.

¹¹ Do wun dedede kame ibedunu jocwiny mac, lubunu lero me mac wu nono! Gikame ango abino timo ne wu ine: ibinunu buto di itienu kede aramo atek.