Isaya 5 - Baibuli I Leb Kumam 2013

Wer amako Poto Olok

¹ Wek kong awer ne wu wer ni, en wer i kom poto olok ka ngawota. Ngawota oudo tie kede poto olok, oudo etie i bad emukura kame lobo mere mio.

² En oudo eboko poto eko depo kiye ingaroi; en eko pito iye nyige olok kame eyero ayera. En eko gero gedo abor malo i dier poto pi dare, di eko kunyo bur me bino pige me olok. En eko donyo kuro olok pi cek, do anyakini dedede me olok oko bedo wac.

³ Aso, ngawota nan tie waco be, “Wun jo kame bedo Yerusalem kede Yuda, ngolunu kop i diere nango kede poto na me olok.

⁴ Nyo ace kame oudo ango apoore timo ne, do likame ako timo? Do pinyo komio en eko nyako nango anyakini awac akaka anyakini abeco kame ango oudo atie geno udo?

⁵ “Nan ango abino waco ne wu gikame ango abino timo ne poto me olok nono. Ango abino kwanyo tenge cel me poto nono; abino turo apama koluke tetekeny leini me obar dony iye di kiko camo olok kede kiko nyonyono gi piny.

⁶ Abino jalo poto nono kony mere doko li. Likame abino lwero olok nogo akadi boko dud gi, di okuto kede ocokocok ko bino umo gi. Doko abino gengo kot da likame cwei i kom gi.”

⁷ Isirael en poto olok ka Rwot me jo yi; jo me Yuda obedo olok abeco kame en epito. En oudo etie kede gen be gin kibino timo gikame ber, do gin kiko lokere timo nek. En oudo etie kede gen be gin kibino bedo kede tim kopoore but jo icegun, do akaka manono en etie winyo koko me jo kame kotero kirac.

Gikareco kame Jo Timo

⁸ Itienu i can! Wun iwilunu ude kede poti medo i wi apat kame itienu kede. Odong kare acecek di do kabedo doko li ne jo apat, di do wun kenu en ikounu dong i lobo noni.

⁹ Ango awinyo di Rwot me jo yi kwongere be, “Ateteni ude atot bino doko amejeko; ude adongodongo di cil bino dong abongo jo.

¹⁰ Poti me olok eka tomon bino woto bwini aromo lita kanyauni kenekene. Doko da kodi aromo kilo tol acel kede ot kanyauni bino woto nyige atie kilo tomon kiwie kanyauni kenekene.”

¹¹ Itienu i can wun jo kame dilo yai odiko mato kongo, di ikounu amata kede mer tuno i dier iwor.

¹² I ibagai wu igounu arigirigi, adungu, bule kede bilo, kede di komato bwini, do likame itamunu pi gikame Rubanga otimo, amoto neno gikame cinge otimo.

¹³ Pi manono, wun jo na kobino tero wu i lobo me kumbor bala mabus abongo wun ngeno; jotel wu bino to kec, kede jo atot ace apat ko bino to orio.

¹⁴ Pi manono, kabedo me jo oto ongamo doge ngam kalikame wacere kede twon imue; en ebino mwonyo alui jotel me Yerusalem kede twon jo kame celakino iye, karacel kede jo kame wakere pire.

¹⁵ Kobino mino lewic mako jo dedede, doko da kobino dwoko piny jo kame tingere.

¹⁶ Do Rwot me jo yi nyuto dwongo mere i yore me ngolo kop kakare, doko da enyuto be en ngat kacil i yore me timo gi kopoore.

¹⁷ Di do idwe romini kede idwe diegi ko bino camo lum kolot i ameje me Yerusalem.

¹⁸ Itienu i can. Kope me abe kame iyamunu cal bala tol kame wun iwaunu kede gikarac i komu; iwaunu dub i komu bala peno agadigadi kede aunoi.

¹⁹ Wun iwacunu be, “Wek Rwot susunyo timo gikame emito timo tetekeny wan onen kede wang wa; ber en ebubunyo cobo timo gikame eiko pi timo tetekeny wan ongei gi nono!”

²⁰ Itienu i can! Wun ilunyunu lwongo gikarac be gikaber, kede gikaber be gikarac. Wun ilokunu colo be odoko lero kede lero be odoko colo. Ilokunu gikakec be odoko gikamit kede gikamit be odoko gikakec.

²¹ Itienu i can! Wun iparunu be iriekunu, be iriekunu twatwal.

²² Itienu i can! Wun ibedunu jo kame kouro i mato bwini, kede kame cuny gi nwang nyalo giamata!

²³ Wun iyeunu gamo cemusana di ikounu weko aweka jo atie kede raco, di likame ikounu ngolo kop kede ateni ne jo kame li kede raco.

²⁴ Pi manono, wuda ibinunu wang bala arienge kame leb mac wango, kede bala lum otuo kame dopokin i mac; ibinunu doko bala yat kame aliasin mege otop di pote wu ko bino lokere doko apua, pien wun itiekunu dagi pwony ka Rwot me jo yi; idagunu kop ka Ngat Kacil me Isirael.

²⁵ Rwot cunye owang kede jo mege omio erieo cinge pi mino gi alola. En ebino rereto gi di mori ko bino yangere, di liele ko bino more i dier yote me bomba bala yugi. Do akadi ingei manono da gero ka Rwot pwodi likame bino tiek, en pwodi ebino meede mino jo mege alola kamanono.

²⁶ Rwot otieko kiarao gianena pi lwongo ateker me piny abor; en ewinyao pi lwongo jo kame tie i ajikini me piny. Gin nan kitie onyaro bino awakawaka!

²⁷ Likame ngatamoro kibut gi ol; likame ngatamoro gete. Likame kimemerun amoto nino mako gi. Likame tie dano moro kibut gi kame rakoba mere lagalaga, amoto kame ausi me amuka mere ocot.

²⁸ Leb imalia gi bit; yen kokude me gweno imalia gi tie cuto. Tien asigiran gi tek bala nyonyo, doko da tien cabalan gi me yi dwir di kiwire bala apipiru.

²⁹ Gin kidorano bala engu, bala inguon atino ager; kibino ngur di kiko mako cam gi kiko tere di likame ngatamoro bobo ko twero mano gi nono kibut gi.

³⁰ Ka ceng nono otuno, gin kibino dorano i kom jo me Isirael bala mor me nam. Ka ngatamoro oko neno lobo nono, likame tie gikame en ebino neno ace apat kwanyo kenekene colo kede can alit, pien idoun acol bino umo lero me iceng.