Isaya 49 - Baibuli I Leb Kumam 2013

Jo me Isirael obedo Lero but Atekerin

¹ Winyunu wun jo kame bedo i dog name, cikunu yitu, wun jo kame bedo kakaboco! Rwot olwonga di pwodi oudo likame konywala, eyera pi bedo ngatic mere di pwodi oudo atie i yi toto na.

² En emio kope me doga obedo bit bala epima, en egwoka kede cinge; emia abedo cal bala tong me emal kame kosuto kiber, kame en ekano i isau mere me mako tongini me emal.

³ En ewaco na be, “In en ngatic na, in ical bala Isirael, jo bino paka pi in.”

⁴ Do ango ako waco be, “Ango kom abedo cane timo tic nono, ango atieko teko na nono, doko i gimoro kame li. Do akadi bed kamanono da, ateteni gen nango tie but Rwot, Rubanga na bino mina giamia me pwoc pi gikame ango atimo.”

⁵ Di pwodi oudo likame konywala, Rwot oudo otieko yera; en emia abedo ngatic mere pi dwoko jo mege bute, pi coko jo kosasarun me Isirael dwoko bute, pien Rwot otieko mina wor; en emia teko.

⁶ Rwot oko waco be, “Ngatic na, ango atie mini tic atek. Likame ibino kenekene dwoko bero ne jo me Isirael kame pwodi odong kuo, do ango abino da mini ibedo lero but atekerin, tetekeny in iter alako na i wi lobo lung.”

⁷ Rwot Ngat Kacil, Ngalak me Isirael waco ne ngat kame kocao kitek, ngat kame atekerin dagi doko en ebedo epasoit me jopug be, “Abakai bino neni di gin kiko yai malo cungo pi mini wor, jopug bino neni, di gin kiko riebere piny i nyimi.” Manoni bino timere pien Rwot ngat kame genere, Ngat Kacil me Isirael otieko yeri.

Dwoko Yerusalem Kakare

⁸ Rwot waco be, “I kare me timo bero ango abino gamo kwac ni, i ceng me alako ango abino konyi; ango abino gwoki di ako bino timo isikan kede jo dedede kibuti. In ibino temuno lobo, ibino popoko ne jo lobo kame nataman odong kene.

⁹ In ibino waco ne mabus be, ‘Wokunu ooko,’ kede but jo kame tie i colo be, ‘Wokunu i lero!’ Gin kibino bedo cal bala romini kame camo i nget yote, i wi imukuran kakame ler, lum me acama bino bedo tie negi.

¹⁰ Kec arabo orio likame bino neko gi. Ceng arabo yamo aliet me wi tim likame bino wango gi, pien ngat kame tie kede kisa i kom gi en kame bino telo gi. En ebino telo gi kibeo i nget ataneko me pii.

¹¹ “Ango abino loko mori na dedede doko yongayo, di yote na adongo ko bino kiar malo.

¹² Neningo, jo na bino dwogo ki kakabor, ki bad tetu malo kede tetu tim, kede ki lobo me Siene.”

¹³ Wer kede yomcuny, Okwe in malo, leli, Okwe in lobo; dipunu wer, Okwe wun mori! Pien Rwot otieko kweno cuny jo mege, doko en ebino bedo kede kisa i kom jo mege kame tie neno can.

¹⁴ Do jo me Sion oko waco be, “Rwot otieko jalo wa! Wie otieko wil kede wa.”

¹⁵ Rwot oko gamo be, “Benyo, iparunu be dako wie romo wil kede atin mere kame edoto, arabo be likame etwero bedo kede cuny me kisa i kom atin kame en enywalo? Akadi bed bala toto me atin wie romo wil kede atin mere, do ango likame wia bino wil kede wu.

¹⁶ Yerusalem, ango likame wia twero wil kedi! Ango atieko wandiko nyingi i dier cinga.

¹⁷ “Jo kame bino geri bobo oyapunu tuno, di jo kotuturo in piny ko bino yai kiweki.

¹⁸ Ting wangi malo di iko ngoloro ngeti rimaro; jo ni tie cokere, gin kitie dwogo buti. Ango Rubanga akuo akwongere be, in ibino tubuso komi kede gin bala kame ateran ngapo kede mwolere.

¹⁹ “Ateteni kabedere ni kame oudo kodudubo di oko dong nono abongo jo, nataman do bino bedo diding ne jo ni kame tie dwogo bedo iye. Doko jo kame oudo odudubo in bino bedo kakabor kedi.

²⁰ Idwe ni kame konywalo i kare kame oudo idong kede nono bino waco di in iwinyo be, ‘Kabedo noni diding twatwal; nyane wan kabedo.’

²¹ Di in iko bino penyere i cunyi keni be, ‘Ngai konywalo idwe nogi dedede? Ango oudo akei idwe na, doko likame oudo do aromo nywal. Ango oudo kotera tenge bala mabus, kara ngai do kopito idwe nogi? Ango oudo koweka adong kena; kara idwe nogi do owok ki tuai?’ ”

²² Rwot Rubanga waco be, “Kare oyapuno tuno kame ango abino kiarao kede cinga but atekerin, di ako mino gin gianena, di gin kiko bino kelo awobe wu di kigwako gi i kor gi, kede anyira wu gin kibino yeno gi i epepet.

²³ Abakai bino gwoko wu bala papi wu; mon gi bino pito wu bala toti wu. Gin kibino riebere piny i nyimu pi mino wu wor, di kiko nango apua me tien wu. Di do wun ikounu bino ngeno be ango en Rwot; lewic likame bino mako jo kame keto gen gi buta.”

²⁴ Benyo, kokaruno mano ngat atek gikame etieko mako i cinge, arabo kokaruno mano mabus ki cing ngat ager?

²⁵ Rwot waco be, “Akadi mabus me ngat atek kobino mano, doko gikame ngat atek otieko mako i cinge da kobino mano; pien ango abino yi kede jo kame yi kede wu, di ako bino lako idwe wu.

²⁶ Ango abino mino jo kame tero wu kirac nekere ken gi ken gi, di kiko mer kede nek bala kimato bwini. Di do jo dedede ko bino ngeno be ango en Rwot, ngat kalako wu, Rubanga me Isirael Won Twer.”