Isaya 46 - Baibuli I Leb Kumam 2013

¹ “Rubangan Bel kede Nebo okudo wi gi piny, leini tie yeno cal gi kobedo yen kame kopao; cal apaa nogi odoko peko but leini ool atie yeno gi.

² Gin kikudo wi gi piny, kiriondiko karacel; likame kikaruno lako cal gi nogo, do gida komako gi kotero gi bala mabus.

³ “Winyunu kop na, Okwe wun jo me ot ka Yakobo, donge dedede me jo me ot ka Isirael. Ango abedo tingo wu cako ki yi toti wu, cako i kare kame konywalo wu kede.

⁴ Ango en Rubanga wu akadi i kare me tio wu, akadi di do wi wu odoko tar kede lwar ango abino tingo wu. Ango en acweo wu, doko abino gwoko wu; ango abino tingo wu di ako lako wu.

⁵ “Ngai kame wun ibinunu pora kede di ikounu mina abedo rom kede? Benyo, tie ngatamoro kame cal bala ango?

⁶ Jo yabo isaun gi di kiko onyo saabu kame oudo tie yi gi, di kiko pimo nyonyo siliba i misani. Gin kiko culo sente but ngatet pi timo negi rubanga; di do gin kiko riebere piny wore!

⁷ Gin kirionge i epepet di kiko yene; gin kisipe kabedo mere, di eko dong cungo kanono, likame ekaruno nyiko ki kabedo mere nono. Ka ngatamoro olego bute, likame egamo doge, doko likame elako ngatamoro ki peko.

⁸ “Yutununu manoni di ikounu bedo kede tam iye, kur wi wu wil kede, wun jodubo.

⁹ Yutununu gikame riki otimere i kare kasek; pien ango en Rubanga, likame bobo tie moro ace; ango en Rubanga, doko likame tie rubanga moro kame cal bala ango.

¹⁰ Cako i ageini ango awaco kakaler gikame bino timere i ajikini; cako riki sek ango atuco gikame oudo bino timere di pwodi likame kitimere, di awaco be, ‘Iik na likame poto akadi acel, doko abino cobo timo gikame oudo aiko pi timo.’

¹¹ Ango atie lwongo icuo moro ki bad tetu kide; en ebino bino bala ekokom di eko cobo timo gikame ango atieko iiko. Ango atieko waco, doko abino mino ecobere; atieko iiko, doko abino time.

¹² “Winyunu kop na, wun joepali, wun jo kame alako wu pwodi bor.

¹³ Ango atie bino lako wu i kare kiyapiyapi, likame alako wu bor. Ango likame abino gal bino lako wu; abino lako bomba me Sion, pien jo me Isirael obedo deyo na.”