Isaya 42 - Baibuli I Leb Kumam 2013

Ngatic ka Rwot

¹ Rwot waco be, “Ngatic na kame ango akonyo ine, en ngat kame ango atieko yero kame cunya yom i kome. Ango atieko keto tipo na i kome; en ebino kelo tim kame poore but atekerin dedede.

² En likame ebino lelemo arabo redo, amoto yamo kede dwan amalo i dier gudo me bomba.

³ En likame ebino turo magada ka ogom arabo neko etala kame liel midumidu. En etie bino kelo tim kopoore.

⁴ En likame ekwanyo gen mere arabo ekwanyo cunye, tuno di etieko keto tim kame poore i lobo. Lobere kame tie kakaboco tie kuro pwony mere.”

⁵ Rubanga ocweo malo di eko yararo en; en etimo lobo kede gi dedede kame tie iye; en emio wei kede kuo but jo me wi lobo. Nataman Rwot Rubanga waco ne ngatic mere be,

⁶ “Ango Rwot en kame atieko lwongi pi poore na, abino maki kede cingi di ako gwoki; atieko mini bala isikan but jo dedede, pi bedo lero but atekerin.

⁷ In ibino yabo wang imuduka, ibino gonyo jo kame kotweo i bur acol cucucuc, kede jo kame bedo i otkol kakacol.

⁸ Ango nyinga obedo Rwot; likame anywako deyo na kede rubanga moro, akadi pak kame komia likame anywako kede caljwogi.

⁹ Jamini kame riki ango awaco be bino timere nataman otieko cobere. Nataman ango abino tuco ne wu jamini anyen di pwodi likame kitimere.”

Wer me Pak

¹⁰ Werunu wer anyen but Rwot, pakenu wun jo me wi lobo lung! Pakenu wun jo kame kwango nam; pakenu wun giacwea dedede me nam! Pakenu wun jo kame bedo i lobere atie i dog nam adwong!

¹¹ Jo kame bedo i wi tim kede i bomban mege miero pak Rubanga; mito jo me Kedar pake! Jo kame bedo i bomba me Sela miero wer kede kilel di kilelemo ki wi mori!

¹² Mito gin kimi deyo but Rwot, kede kipake kiton i lobere kame tie i dog nam adwong!

¹³ Rwot tie ot i yi bala sirikale, en edoko ger bala ngayi; en elelemo kede dwan amalo, en enyuto teko mere i kom jokwor mege.

Rubanga Ocikere pi Konyo Jo mege

¹⁴ Rubanga waco be, “Ango abedo ling tieko kare kalac; abedo mot di adio cunya. Do nataman abino kok bala dako kame tie ramere me nywal, abino ngamo doga di aomo wei.

¹⁵ Ango abino muducaro mori kede imukuran, di ako mino lum kede yen gi tuo. Abino mino icileta tuo kidoko kakame tek kangakang, di ako mino ataparin da tuo.

¹⁶ “Abino telo jo na awang gi oto i yongayo kame gin likame kingeo, abino beo kede gi i yote kame gin lem pwodi likame kibeo iye. Ango abino loko colpiny doko lero i nyim gi, kabedere kame gwai abino mino doko pwot. Magonogi en gikame ango abino timo negi, likame abino jalo gi.

¹⁷ Jo dedede kame keto gen gi i kom cal apaa, jo kame waco ne cal ateta be, ‘In en rubanga wan,’ kobino mino lewic mako gi adikinicel.”

Jo me Isirael likame Opwonyere

¹⁸ Rwot waco be, “Winyunu wun jo kame yitu oding; kede wuda jo kame wang wu oto, tingunu wangu malo di ikounu neno!

¹⁹ Benyo, tie ngatamoro kame wange oto bala ngatic na, arabo kame yite oding bala ngaor kame ango acwao? Ngai kame wange oto bala dano na komire buta, arabo kame wange oto bala ngatic ka Rwot?

²⁰ Jo me Isirael, wun itiekunu neno jamini atot, do likame kitimo gimoro i kuo wu; wun yitu twolo, do likame iwinyunu kop.”

²¹ Rwot pi poore mere, oudo cunye obedo yom, pi mino iswilia mege dwongo di kiko bedo gikame ber twatwal.

²² Do nataman kotieko yako jo mege; gin dedede kogoloro gi i bure, kede da kokano gi i udekol. Gin koyako gi abongo ngatamoro kame lako gi, likame tie dano moro akadi acel kame waco be, “Dwok negi jame gi.”

²³ Ngai kikomu kame bino ciko yite i gi nogi, ngat kame bino ciko yite di egwokere cako nataman ot anyim?

²⁴ Ngai en kojalo jo me Isirael i cing joyak? Rwot kikome en kotimo, en ngat kame wan otimunu dub bute! Wan likame okounu twero bedo i ekite kuo kame en oudo emito ne wa, arabo lubo iswil kame en oudo emio wa.

²⁵ Aso, en eko mino wa obilunu eupa me lilo mere, di okounu beno i can me yi. Lilo mere oko wango Isirael dedede bala mac, do wan likame okounu niang gikame oudo tie timere; lilo mere owango wa, do wan likame oko mino kop nono odonyo i cuny wa.