Isaya 41 - Baibuli I Leb Kumam 2013

Rubanga Omoko be ebino Konyo Jo me Isirael

¹ Rubanga waco be, “Lingunu di ikounu ciko yitu buta, wun jo kame bedo i lobere atie i dog nam adwong! Mito atekerin ud teko anyen di kiko bino; mito ibinunu di ikounu yamo. Mito wan dedede ocokerenu karacel pi ngolo kop i diere wa.

² “Ngai en kame bin okelo ngapug moro ki bad tetu kide? Ngai kolwonge bino timo tic mere? En emie ebwono atekerin dedede, di eko nyonyono abakai kede tiene; en eneko gi kede epima mere di kiko doko cal bala apua. Emal mere mio gi kisasarun bala cucung kame yamo kuto.

³ En eriamere kede gi di eko meede kede ot mere abongo peko moro, edwir ineno bala tiene likame nyono piny.

⁴ Ngai inonono kame bin otimo manoni? Ngai en komio lwak me kare lung obedo tie cako i ageini? Ango Rwot, riki atie i ageini, doko abino bedo tie i ajikini.

⁵ “Jo kame tie i lobere atie i dog nam adwong otieko neno gikame ango atieko timo; lworo atek omako gi doko kom gi miel pi lworo; gin kicokere di kiko bino.

⁶ Ngat acelacel konyo ngat ocelu, di ewaco ne ngawote be, ‘Bed kede nwangcuny!’

⁷ Ngapac waco ne ngatet me saabu be, ‘Itimo tic aber!’ Ngat kame temuno cal ateta nono kede enyondo dio cuny ngat kame gure kede sumali di ewaco ne be, ‘Komwone kiber’; di gin kiko gure kede sumali kabedo mere tetekeny likame epoto.

⁸ “Do wun, jo me Isirael, jotic na, wun en jo kame ango atieko yero, wun ikwae ka Aburaam, adieruna.

⁹ Ango bin akwanyo wu ki atiekini me lobo; alwongo wu ki agolai me kakaboco twatwal, di ako waco ne wu be, ‘Wun jotic na.’ Ango atieko yero wu, likame auco wu tenge.

¹⁰ Kur ibedunu kede lworo, pien ango atie kede wu, kur ibedunu kede lworo moro, pien ango en Rubanga wu; ango abino mino wu teko, abino konyo wu, ango abino gwoko wu di ako lako wu kede twer na.

¹¹ “Jo kame cuny gi wang i komu, kobino mino lewic mako gi; jo kame yi kede wu bino doko gimoro li, doko kibino to.

¹² Ibinunu mono jo kame yi kede wu nogo, do likame ibinunu udo gi; jo kame yi kede wu nogo bino doko gimoro li atwal.

¹³ Pien ango Rwot Rubanga wu abino mino wu teko di awaco ne wu be, ‘Kur ibedunu kede lworo, ango abino konyo wu.’ ”

¹⁴ Rwot waco be, “Ateker me Isirael, bed bala in ititidi doko igoro, do kur ibed kede lworo; ango abino konyi. Ango, Ngat Kacil me Isirael, en kame abedo Ngalak nin.

¹⁵ Ango abino mini ibedo cal bala ikong me canyo, ebao kame lake me canyo nyen di bit. Ibino beo i mori di kiko doko bala alos kame kocanyo; ibino mino imukuran doko apua.

¹⁶ In ibino pieto gi bala alos di yamo ko tero gi tenge, yamo atek bino sasaro gi. Di do in iko bino kilel pi ango Rwot ni; ibino paka, ango Ngat Kacil me Isirael.

¹⁷ “Ka jocan kede jo kame piny oloo moo pii do likame kikaruno udo, di orio oneko gi dwan gi otuo, ango Rwot abino gamo kwac gin; ango Rubanga me jo me Isirael likame abino jalo gi.

¹⁸ Ango abino yabo icileta i wi moru kakaler di kiko mol, doko ataneko bino mol i aditoto. Ango abino loko wi tim doko ataparin me pii, kede lobo kotuo abino loko doko ataneko amol.

¹⁹ Ango abino mino yen seda dongo i wi tim, kede yen akasia, yen angwe kur, kede olibeti. Abino mino abum dongo i wi tim, abum me yen pain, saipuras kede yen ace apat.

²⁰ Abino timo manoni, tetekeny jo neni di kiko ngeno be ango Rwot en kame atimo gi noni. Gin kibino niang be Ngat Kacil me Isirael en komio gi noni otimere.”

Rwot Oningo Rubangan me Abe

²¹ Rwot abaka ka Yakobo waco be, “Wun rubangan me atekerin, kelunu pido wu, miunu kope kame gango pido wu!

²² Bianu kan di ikounu waco ne wa gikame bino timere, tetekeny wan ongei gi nono i kare kame ecobere kede. Wacunu ne wa gikame riki otimere i kare kasek, tetekeny wan otam kop i kom gi, di oko ngeno dwong gi.

²³ Wacunu ne wa gikame waru bino timere, di wan oko bino ngeno be wun ateteni rubangan! Timunu kong gimoro aber arabo arac, kame mio wan lworo atek arabo kame neko kom wa.

²⁴ Ateteni wun ibedunu gimoro li, doko tice wu da gimoro li; ngat kame woro wu cal bala gi me kwer.

²⁵ “Ango Rwot atieko yero icuo moro kame bedo i bad tetu kide; abino kele ewok ki bad tetu malo. En ebino nyonyono abakai bala nyono lobo, bala kame ngacwei agune nyono kede lobo.

²⁶ Ngai kikom wun riki omurao be gi noni bino timere, tetekeny wan owac be oudo en emurao kop kakare? Likame tie ngatamoro kikomu kame bin owaco kop moro amako gi noni; likame tie ngatamoro kowinyo di wun iwacunu kop moro akadi acel!

²⁷ Ango Rwot en kame ageo waco ne Sion rwonge noni; ango bin aoro jo Yerusalem pi gin ot waco be, ‘Nenunu jo wu tie bino! Gin kitie dwogo paco!’

²⁸ Ka ango aneno rubangan nogi, likame tie moro kame tie kede tam akadi acel; likame tie moro kame romo dwoko peny na.

²⁹ Gin rubangan nogi dedede gimoro li; likame tie gimoro kame kikaruno timo akadi acel; cal acwea gin obedo gimoro li, kical bala yamo abuko.”