Isaya 4 - Baibuli I Leb Kumam 2013

¹ I kare nono, mon kanyaare bino mako icuo acel di kiko waco ne be, “Wan obino pitere ken wa, doko da obino ngapere ken wa, kenekene in yei ne wa lwongi be cwar wa, tetekeny okwany lewic me bedo abongo icuo.”

Yerusalem bino Dok i Deyo mere Kasek

² Kare tie bino kame Rwot bino mino kede yen kede giapita atie i lobo mere dongo libaliba di kicil. Jo me Isirael kame bino dong kuo bino bedo tie kede yomcuny kede ewaka pi kodere kame lobo gi ceko.

³ Jo dedede kame bino dong Yerusalem, gin jo kame Rubanga oyero pi dong kuo, kobino lwongo gi be jo kacil.

⁴ Rwot bino ngolo kop di eko lonyo ateker me Isirael, di eko lwoko tenge raco me Yerusalem kede remo kame koonyo kunono.

⁵ Di do Rwot ko bino umo wi moru me Sion kede jo dedede kocokere kunono kede edou acol cucucuc i isawan me iceng, kede mac alialia i isawan me iwor. Deyo ka Rubanga bino umo bomba nono.

⁶ Deyo mere nono bino galao lieto me ceng likame tuno i bomba, doko ebino mine edoko karingo kede kagwokere ki kot acwei kede twon yamo.