Isaya 39 - Baibuli I Leb Kumam 2013

Joor Kobino ki Babilon

¹ I kare nono abaka me Babilon, Abaka Merodak Baladan wot ka Baladan oko winyo be Abaka Esekia oudo kome obedo lit do oudo etieko do cango. Aso, en eko oro jo bute pi tero ne baluwa kede giamia moro.

² Esekia oko gamo joor nogo di en eko nyuto negi abar mege dedede. En enyuto negi siliba, saabu, jamini angwe kur, moe me sut, kede jamini mege dedede me yi. Likame tie gimoro me ode arabo kame oudo tie karamoro i adul kame en epugo kame en likame eko nyuto negi.

³ Di do enabi Isaya oko ot but Abaka Esekia di eko penye be, “Cuo nogi owok ki tuai doko kop nyo kame gin kiwaco ni?” Esekia oko gamo be, “Gin kiyai ki piny abor, kiwok ki Babilon.”

⁴ Isaya bobo oko penye be, “Nyo kame gin kineno i odi?” Esekia oko gamo be, “Gin kitieko neno gi dedede kame tie i oda; likame tie gimoro i oda kalikame ango anyuto negi.”

⁵ Di do Isaya oko waco ne Esekia be, “Winy kop kame Rwot me jo yi tie waco. En ewaco be,

⁶ ‘Kare tie bino kame jamini dedede me odi kede jamini kame joakwari ni obedo kano tuno tin, kobino tero Babilon. Likame tie gimoro kame kobino weko dong.

⁷ Ikwae ni da, ace kikom gi kobino tero di oko mino gi kidoko abwocin kame timo tice me paco me abaka me Babilon.’ ”

⁸ Di do Esekia oko waco ne Isaya be, “Kop ka Rwot kame in itieko waco na nono ber.” En ewaco kamanono pien oudo eparo be mulem kede anapakin bino bedo tie i kare me kuo mere.