Isaya 38 - Baibuli I Leb Kumam 2013

Tuwo ka Abaka Esekia kede Cango mere

¹ I kare nono tuwo oko mako Esekia kame oudo otuno do neke. Enabi Isaya wot Amos oko ot bute di eko waco ne be, “Rwot waco be in likame ibino cango, in iyaro to. Pi manono, poore itemuno epone kame ibino weko kede jo me odi.”

² Esekia oko loko nyime oneno apama di eko lego but Rwot kaman:

³ “Okwe Rwot, ango akwai iyutuno epone kame ango abedo timo kede tic ni kede cunya lung kede genere, doko abedo timo gikame poore i wangi.” Esekia oko kok adikinicel.

⁴ Di do Rwot oko waco ne Isaya pi

⁵ dok but Esekia di eko waco ne be, “Ango Rwot Rubanga ka kwaru ni Daudi atieko winyo ilega ni doko atieko neno pigewangi; ango abino medi mwakini tomon kiwie kany me bedo kuo.

⁶ Ango abino laki karacel kede bomba noni ki cing abaka me Asiria, di ango ako bino donyo gwoko bomba noni.”

²¹ Isaya oko waco ne Esekia pi kwanyo epigi kame konyonyoto di eko keto i akwoti mere di eko bino cango.

²² Di do Abaka Esekia oko penyere be, “Gianena nyo kame bino nyuto be ango abino karuno ot i ot ka Rwot?”

⁷ Isaya oko gamo be, “Man en gianena kame Rwot bino mini, kame bino nyuto nin be en ebino timo gi noni kame en etieko cikere iye pi timo.

⁸ Neningo, Rwot bino mino tipo kame ceng timo i wi kayito kame Abaka Akas ogero, lokere nyiko cen tien tomon.” Di tipo oko nyiko cen tien tomon.

⁹ Ingei Esekia cango ki tuwo kame oudo omake, en eko wandiko wer me pak noni be:

¹⁰ Ango oudo ako paro be kom i diere me mwakini me kuo na en kame oudo atie to iye; ango oudo atie ot bedo i kabedo me jo oto pi kare kodong me kuo na dedede.

¹¹ Ango oudo ako paro be likame bobo abino neno Rwot i lobo me jo akuo; oudo aparo be likame bobo abino neno dano moro kikom jo kame bedo i wi lobo.

¹² Kuo na oudo kokwanyo kibuta bala eema me ngakwai romini kame koputo. Ango oudo aparo be kongolo kuo na bala egoe kame ngacwei igoen ngolo tenge ki ecuma; cako iceng tuno iwor in imio kuo na doko gikame kony mere li.

¹³ Ango akok pi mito kony iwor kiakia; en oudo etuturo cogo na ineno bala engu; cako iceng tuno iwor in oudo imio kuo nango ojik.

¹⁴ Ango oudo akok bala acilagwec arabo owalu kame celakino, akok koko me iturur bala awele. Wanga ojony pi ngino malo. Okwe Rwot, ango atie irac, konya.

¹⁵ Do nat kop nyo kame ango aromo waco? Rwot otieko timo nango kamanoni. Ango atie kede cwercuny atek, likame akaruno nino.

¹⁶ Okwe Rwot, jo kuo kede kope kede tice nin; doko tipo nango da udo kuo i gi nogi. Okwe, canga di iko mina abed kuo!

¹⁷ Ateteni cwercuny atek kame oudo ango atie kede oudo tie pi kelo nango bero; in pi amara ni ilako kuo nango ki to, pien itieko sasiro dub nango dedede.

¹⁸ Jo kame tie i kabedo me jo oto likame karuno paki; jo kame donyo i ates likame tie kede gen moro i kom genere nin.

¹⁹ Jo akuo kenekene en kame karuno paki, bala kame tin ango atie timo; jonywal tatamo ne idwe gi kite kame in igenere kede.

²⁰ Rwot in ibino laka, di wan oko bino gono were me paki kede adungu, obino wer i odi pi kare me kuo wa lung.