Isaya 37 - Baibuli I Leb Kumam 2013

Abaka Openyo Tam kibut Isaya

¹ Kakame Abaka Esekia owinyo kede kop kame gin kitero bute, en eko nyinyilo igoen me kome pi cwercuny, eko ngapo epuko, di eko ot i ot ka Rwot.

² Di en eko ooro Eliakim ngadwong me paco me abaka, Sebena kalani, kede josaseredoti adongo but enabi Isaya wot Amos. Gida oudo kitie ngapo ipukoi.

³ Gin kiko ot di kiko waco ne Isaya be, “Esekia waco kaman: ‘Tin en ceng me neno can, ceng me cokocoko wa, kede me mino wa lewic. Wan ocalunu bala mon kame esawa me nywal gi otuno, do kili kede teko me dinyo idwe.

⁴ Abaka me Asiria otieko cwano ngadwong me isirikalen mege pi bino yeyeto Rubanga akuo. Cengemogo Rwot owinyo kope kame en ewaco, doko ebino timo gimoro iye. Pi mano, legunu pi donge me jo wa kame pwodi odong kuo.’ ”

⁵ Kakame jotic me Abaka Esekia otieko waco ne kede Isaya kop kame abaka oudo ocwao gi kede,

⁶ Isaya oko waco negi be, “Oti iwacunu ne ngadwong wu be, ‘Rwot waco kaman: Kur lworo maki pi kope me acae kame itieko winyo di ngatic me abaka me Asiria waco i koma.

⁷ Ango kikoma abino mine cuny moro, tetekeny en ebino winyo Rwonge moro, di eko dok i lobo mere. Ango abino mino koneke kede epima i lobo mere kunono.’ ”

Jo Asiria Omedo Ngato bobo

⁸ Ngadwong me isirikalen me Asiria oko winyo be abaka gi oudo otieko yai ki Lakis etie do yi i bomba me Libina. Aso, en eko ot kunono bute.

⁹ I kare nono abaka me Asiria oko winyo be Abaka Tiraka me Abisinia oudo tie telo isirikalen me Misiri pi bino yi kede gi. Kakame en bin ewinyo kede kop nono, en eko cwano baluwa but Esekia di ewaco ne be,

¹⁰ “Kur imi Rubanga ni kame in itie keto gen ni i kome nono ngalu be Yerusalem likame bino poto i cinga.

¹¹ In itieko winyo gikame abaka me Asiria otieko timo ne lobere dedede, di emuducaro gi atwal atwala. Benyo, iparo be wun ikarununu bwot?

¹² Abakai me Asiria kame ango alunyo cen ngei gi bin omuducaro bomban me Gosan, Aran, kede Resep, kede jo me Eden kame oudo tie Telesar. Kony nyo do kame rubangan gi oko timo negi?

¹³ Abakai me bomban me Kamat, Arapad, Separabaim, Kena kede Iba tie tuai?”

¹⁴ Abaka Esekia oko gamo baluwa ki cing jo kame oudo ooro di eko somo. Di do en eko ot i ot ka Rwot di eko keto baluwa nono i nyim Rwot.

¹⁵ Esekia oko lego but Rwot di ewaco be,

¹⁶ “Okwe Rwot me jo yi, Rubanga me jo me Isirael, in ngat kame ibedo i kom ni me ajakanut i wi cerubim, in keni en Rubanga, kame pugo ajakanuto dedede me wi lobo. In icweo lobo kede malo.

¹⁷ Cik yiti, Okwe Rwot di iko winyo wa. Yab wangi, Okwe Rwot, di iko neno gikame tie timere. Winy kope dedede kame Senakerib ocwao me yeti, in Rubanga akuo.

¹⁸ Okwe Rwot, ateteni wan ongeo be abakai me Asiria otieko muducaro atekerin dedede kede lobere gi,

¹⁹ di kiko kwikwito rubangan gi i mac, bed bala gin oudo likame rubangan, do kibedo gikame jo otimo kede cing gi; gin oudo kibedo cal apaa kame kotimo kede yen kede kide. Omio gin kiko muducaro gi.

²⁰ Aso nataman, Okwe Rwot Rubanga wa, lak wa ki cinge, tetekeny atekerin dedede me wi lobo ngei be in keni en ibedo Rwot.”

Kop kame Isaya Owaco ne Abaka

²¹ Di do Isaya wot ka Amos oko cwano kop but Esekia di ewaco ne be, “Rwot Rubanga me jo me Isirael waco kaman: Piento in ilego buta pi kop kame mako Abaka Senakerib me Asiria,

²² manoni en kop kame ango Rwot atie waco i kome: Jo me bomba me Yerusalem nyeri, doko kicai in Senakerib.

²³ Benyo, iparo be ngai en kame in oudo itie yeyeto di icao? Ngai en kame in oudo ilelemo i wie? Ngai en kame in oudo ineno kede ewaka kame cal kamano? Magonogo in oudo itimo i kom ango Rubanga kacil me Isirael!

²⁴ In icwao jotic ni wakere na di iwaco be in itieko bwono yi kede cabalan ni dedede kiton malo i wi mori me Lebanon. In iwakere be ki kunono in iko tongo yen seda mege kame bocoboco twatwal kede yen saipuras kame beco kalamo, kede be iko tuno i cuny abum mege kame okodo adikinicel.

²⁵ In iwakere be in iko kunyo ataneko di iko mato pii gi, kede be iko nyonyono icileta me Misiri kede tieni paka tuo.

²⁶ “Benyo, in pwodi likame iwinyo be ango oudo atieko iiko kamanono sek? Ango oudo atieko iiko i kare kasek gikame nataman amio ocobere. Ango oudo atieko iiko be in ibino mino bomban kame kocelo kede apama atek doko amejeko.

²⁷ Pi manono, jo kame oudo bedo i bomban nogo oudo li kede teko; oudo kitie kede inonong atek doko oudo kibedo di wi gi ototolun. Gin oudo kical bala amel arabo lum kame tie dongo i wi ot, lum kame yamo aliet me bad tetu kide kuto di kiko ner di pwodi likame kitieko dongo.

²⁸ “Ango angeo kope dedede kame maki, gi dedede kame in itimo kede kabedere dedede kame in ioto iye. Ango angeo gero kame in itie kede i koma.

²⁹ Do pien in itie kede gero i koma, doko atieko winyo kite kame in iwakere kede, ango abino kodo umi kede golu na di ako rwako lilim i dogi, di ako wiri idok cen ilubo yongayo kame oudo iwok kiye.”

³⁰ Di do Isaya oko waco ne Abaka Esekia be, “Manoni en gianena kame bino nyuto ni gikame bino timere. Mwaka noni wun ibinunu camo kodere kame bwangun tui ken gi, di i mwaka me are ikounu bino camo kodere kame bwangun tui ken gi kakame oudo ikwanyunu kiye cam me mwaka okato. Do i mwaka me adek wun ibinunu cuno kodere wu di ikounu bedo kede kac, ibinunu puro olok di ikounu camo anyakini gi.

³¹ Donge me jo me ot ka Yuda kame bino bwot di kiko dong kuo bino bedo cal bala yat kame rieo aliasin mege i lobo kakatut di eko nyak.

³² Jo kame bino bwot di kiko dong kuo bino bedo tie Yerusalem kede i moru me Sion, pien Rwot me jo yi otieko keto cunye pi mino gi noni timere.

³³ “Pi mano, Rwot waco kaman i kom abaka me Asiria: ‘En likame ebino donyo i bomba noni arabo gweno akadi tong me emal acel iye. Likame tie sirikale moro kame mako ebuku, kame bino tuno i nget bomba noni, arabo kame bino mukuro lobo rimaro apama mere pi sure.

³⁴ Yongayo kame en oudo elubo me bino, yongayo nono en kame ebino lubo me dok; likame ebino donyo i bomba noni; ango Rwot en awaco.

³⁵ Ango abino yi pi bomba noni di ako gwoke pira kede pir ngatic na Daudi.’ ”

³⁶ Di do malaika ka Rwot oko ot i kimere me isirikalen me Asiria di eko neko isirikalen tutumia tol acel kede ot kanyauni kiwie kany (185,000). Oru mere odiko sek kakame piny oru kede, kom jo oto oudo orade piny.

³⁷ Di do Abaka Senakerib me Asiria oko yai edok paco, di eko donyo bedo Ninebe.

³⁸ Ceng moro acel di en oudo etie lego i tempulo ka rubanga mere Nisirok, awobe mege are Adaramelek kede Sareser oko neke kede epima, di gin girgi kiko lwi kioto i lobo me Ararat. Esarakadon, wode ace, oko lunyo wange bala abaka.