Isaya 36 - Baibuli I Leb Kumam 2013

Jo Asiria Ongato Suro Yerusalem

¹ I mwaka me tomon kiwie ongwon me apugan me Abaka Esekia, Abaka Senakerib me Asiria oko ot suro bomban dedede me Yuda, bomban kame oudo kocelo kede apama atek, di en eko mano gi.

² Abaka me Asiria bin oko ciko ngadwong me isirikalen mege pi yai ki Lakis, di eko ot kede twon isirikalen Yerusalem but Abaka Esekia pi waco ne rieno cinge. Ngadwong me isirikalen nono oko ot di eko cungo i yongayo adwong aoto i dukini me jokui igoen, i nget puleju kame kelo pii ki atapar me malo.

³ Jo adek me Yuda oko bino pi riamo kede en: Eliakim wot ka Kilikia, ngadwong me tice me paco me abaka; Sebena, ngat kame bin obedo kalani; kede Joa wot ka Asap, ngat kame bin gwoko kope kame kowandiko.

⁴ Ngadwong me isirikalen me Asiria oko waco negi be, “Wacenu Esekia be Abaka adwong, en abaka me Asiria penye be, ‘Gen kame in itie kede no cungo i kom nyo?

⁵ Benyo, in iparo be kop me dog kenekene obedo rieko arabo teko me yi? Ngai do en kame in itie keto gen ni i kome, en komio in iko jemo nango?

⁶ Neningo, in itie geno Misiri pi konyi. Manono cal acala bala mako magada bala ebela me cing; pien ka icatakino kede ebino tur di eko cobo cingi. Manono en kite kame Parao cal kede but jo dedede kame keto gen gi i kome.’

⁷ Do ka wun iwacunu na be, ‘Wan ogeno Rwot Rubanga wa.’ Benyo, mam kabedere kame kowore iye kede alutarin mege en kame Esekia orereto di ewaco ne jo me Yuda kede Yerusalem be, ‘Wun ibinunu woro Rubanga i alutari acel noni kenekene’?

⁸ Aso, nataman talunu gimoro kede ngadwong na abaka me Asiria. Ango abino mino wu asigiran tutumia are, ka wun ikarununu udo jo kame ringo kede gi.

⁹ Benyo benyo kame wun ikarununu bwono kede akadi ngatel me ruom apiny me isirikalen kikom jotic me ngadwong na, ka wun itienu geno Misiri pi cwano ne wu cabalan kede jo kame ringo kede asigiran?

¹⁰ Medo i wi manono, benyo, wun iparunu be ango abino suro lobo noni di ako muducaro en abongo Rwot konya? Rwot en kowaco nango be, ot isur lobo noni di iko muducaro en.”

¹¹ Di do Eliakim, Sebena, kede Joa oko waco ne ngadwong me isirikalen nono be, “Wan okwai iyam kede wa kede leb Aramaik. Wan owinyo leb nono. Kur iyam kede wa kede leb jo me Yuda, pien jo kame tie bedo i nget apama tie winyo.”

¹² Do en eko gamo dog gin be, “Benyo, iparunu be abaka na ocwa pi waco kope nogi but wun kede abaka wu kenekene? Li ba, ango atie waco kope nogi da but jo nogo kame tie bedo i nget apama, pien gida kibino camo cet gi di kiko mato lac gi, bala wun.”

¹³ Di do ngadwong me yi nono oko cungo di eko lelemo kede leb jo me Yuda be, “Winyunu kop me abaka adwong, en abaka me Asiria!

¹⁴ Abaka kwenyaro wu be kur imiunu Esekia ngalu, piento en likame ekaruno lako wu.

¹⁵ Kur igamunu kop ka Esekia me mino wu keto gen wu i kom Rwot, kop kame en ewaco ne wu kede be ateteni Rwot bino lako wu, doko bomba noni likame kobino mino i cing abaka me Asiria.

¹⁶ Kur iwinyunu kop ka Esekia! Abaka me Asiria ciko wu be iwokunu ooko bute di ikounu winyere kede en i kom kop amako anapakin. En ebino weko ngat acelacel camo olok mere kede epigi mere amake, di emato pii me atan mere,

¹⁷ tuno en bino tero wu i lobo kame cal bala meru, lobo kame engano me timo mugati kede olok me timo bwini dongo iye.

¹⁸ Gwokerenu kur imiunu Esekia ngalu be Rwot bino lako wu. Benyo, tie rubanga me ateker moro kotieko lako piny gi ki cing abaka me Asiria?

¹⁹ Rubangan me bomban me Kamat kede Arapad nataman tie tuai? Rubangan me bomba me Separabaim tie tuai? Benyo tie rubanga moro kame bin oko lako Samaria ki cinge?

²⁰ Rubanga mene kikom rubangan dedede me pinye nogi en kotieko lako piny gi ki cing abaka wan? Nyo do kame mio wun iparunu be Rwot romo lako Yerusalem?”

²¹ Do jo oko ling alinga likame kidwoko ne kop moro, pien Abaka Esekia oudo owaco negi be kur kigam doge.

²² Di do Eliakim, Sebena, kede Joa oko nyinyilo igoen me kom gi pi cwercuny, di kiko ot tatamo ne abaka kop kame ngadwong me isirikalen me Asiria oudo owaco.