Isaya 35 - Baibuli I Leb Kumam 2013

Dok me Jo kame Kolako Sion

¹ Wi tim kede kakotuo bino lelo, wi tim bino ilel, doko ature bino bwangun iye.

² Ature bino bwangun iye di tot, di ineno bala jo kame tie ilel di kiwero. Wi tim bino bedo kede deyo kame cal bala wi mori me Lebanon, ebino bedo ber bala poti me Kamel kede Saron. Gin kibino neno deyo ka Rwot, kibino neno dwongo kame Rubanga wa tie kede.

³ Miunu teko but jo kame bad gi odoko goro, kede jo kame cong gi miel pi lworo.

⁴ Wacenu jogo kame cuny gi lwor be, “Bedunu tek, kur ibedunu kede lworo! Rubanga wu tie bino. En ebino nyango gikame kotimo ne wu, en ebino culo kwor wu. En eyaro bino di eko lako wu.”

⁵ Di do wang imuduka ko bino yabere, kede yit idingoi da ko bino tuc.

⁶ Ingwalasa bino sosomo bala atil, di jo kame leb gi oto ko bino wer pi ilel. Pii bino tuc i wi tim di isamai ko mol;

⁷ Asinge kotuo bino doko atapar, di lobo kotuo ko bino pong kede ataneko. Kabedo kame oudo ikween bedo iye bino doko osamai, otol kede aladoi bino dongo iye.

⁸ Yongayo adwong bino bedo kunono, yongayo kame kolwongo be, “Yongayo Kacil”. Likame tie ngadubo moro kame bino lubo yongayo nono; en ebino bedo me jo ka Rubanga. Likame tie ngatamoro, akadi ngamingo, kame bino rwenyo yongayo nono.

⁹ Engu moro likame bino bedo tie kunono, akadi le moro ager likame bino tuno iye; likame kibino bedo tie kunono, do jo kame Rwot olako kenekene en kame bino lubo yongayo nono.

¹⁰ Jo kame Rwot olako bino dwogo, gin kibino donyo Sion di kiwero. Gin kibino bedo kede yomcuny kalikame tiek; kuo gi bino pong kede kilel kede yomcuny, cwercuny kede cur bino yai tenge ki kuo gi.