Isaya 33 - Baibuli I Leb Kumam 2013

Ilega me Kwano Kony

¹ Itie i can in ngamuducaro, in ngat kalikame ngatamoro omuducaro in; in ngadupuro jo, do di in likame ngatamoro odupuro in! Kame in do ijiko muducaro, kobino muducaro ida; kede kame in do itieko dupuro jo, ida kobino dupuro in.

² Okwe Rwot, kisa maki i kom wa; wan oketo gen wa i komi. Bed teko wa buli piny aru, lak wa i kare me peko.

³ Kame in idorano, atekerin apat ringo tenge; kame in ilepun, atekerin keketun.

⁴ Di oko yako jamini gi bala kame ekutele camo kede cam i poto, amoto bala kame obonyo jwero kede piny.

⁵ Rwot dwong twatwal! En etie malo ebedo iye. En ebino mino jo me Yerusalem donyo ngolo kop i yore me ateni, kede kiko bedo tie kede tim kopoore.

⁶ Ebino mino icungunu di itekunu i kare wu. En ebino lako wu, di eko mino wu rieko kede ngec. Gikame pire tek kibut jo me Sion en bedo kede wor but Rwot.

⁷ Winyunu, isirikalen atek i yi tie kok i dier yote me bomba kimito kony; jo kame oudo kocwao pi ot nyamo kop me kelo anapakin tie kok kitek.

⁸ Jo otieko weko yote adongo, yote dedede otieko dong nono. Jo likame gwoko isikan gi, jo likame lubo kop kame kimoko i winyere gi, likame doko kotie kede wor but jo.

⁹ Lobo odong kene, doko kony mere otieko doko li; abum me Lebanon otieko tuo, Saron otieko doko bala wi tim, kede yen me Basan kede Kamel tie onyo pote gi.

Rwot Okwenyaro Jokwor mege

¹⁰ Rwot waco be, “Nan ango abino lepun timo gimoro, di oko bino mina dwongo.

¹¹ Iik wu cal bala arienge kede cucung kame wei wun kikomu en kame bino cwinyo di kiko wang.

¹² Atekerin bino liel dopodop paka doko buru, bala okuto kame kotongo di eko tuo di oko cwinye.

¹³ Wun jo dedede katie kakabor kede kakiyapi winyunu gikame ango atimo di ikounu bino ngeno twer kame ango atie kede.”

¹⁴ Lworo omako jodubo me Sion. Jo kalikame woro Rubanga kom gi tie miel amiela di kiwaco be, “Ngai kikom wa karuno bwot ki twon mac ager rom kano? Ngai kikom wa karuno bwot ki mac kame liel nakanaka?”

¹⁵ Jo kame bino bwot en jo kame kuo gi opoore kede jo kame yamo kope me ateni, jo kame dagi gikame koudo i yore me adiadia, jo kame dagi tim me cemusana, jo kame dagi nek kede tim areco me gero.

¹⁶ Gin kibino bedo malo kakabor; karingo gi ot gwokere bino bedo cel kobedo lela; kobino mino gi cam kede pii.

Deyo me Kare me Anyim

¹⁷ Ibinunu neno abaka kede deyo mere, kede lobo mere me ajakanut kopetere wiriwir.

¹⁸ Di do ikounu bino yutuno tim akelo lworo kame oudo ibeunu iye di ikounu bino penyere be, “Kitie tuai jo kame giro wel, jo kame oudo pimo rom me jame, kede jo kame oudo maro wel me gedo aboco malo?”

¹⁹ Likame doko ibinunu neno jokumbor awakere, jo kame dwalo leb kalikame wun itwerunu niang.

²⁰ Kong nenunu Sion, en bomba kame wan okwero iye ibagai me edini wa. Ibinunu neno Yerusalem, en kabedo okwei mot; en ecal bala eema kame loce mege likame kobino puputo, doko da aunoi me twene likame bino cocotun.

²¹ Do Rwot kede dwongo mere bino bedo ne wan bala icileta kede isamai adongodongo koluko wa, kame imerin atino amoto adongo me jokwor likame bino kwang lubo.

²² Pien Rwot en ngapug wa, en abaka wa, en ebino lako wa.

²³ Do jokwor wa cal bala emeri kame tol me kwange olalagun, likame ekaruno sipo epir kame kotweo iye egoe amio yamo kolo emeri, amoto mino egoe nono bedo di eyarere. Wan obino mako abar me isirikalen kobedo jokwor wa, di gikame oyako ko bino bedo tot, kiton ingwalasa da bino udo iner moro.

²⁴ Likame tie ngatamoro kame bedo kunono kame bino doko waco be etuwo, Rwot bino sasiro dub dedede kame jo otimo.