Isaya 32 - Baibuli I Leb Kumam 2013

Abaka Atie kede Ekite Kopoore

¹ Abaka kame pugo i yore kopoore bino bedo tie, karacel kede jopug mege kame pugo di kitimo gi dedede i yore me ateni.

² Ngat acelacel kibut gi bino bedo bala kakame jo gaikin iye kame yamo tie buko, kede kagwokere ka kot tie bololo. Gin kibino bedo bala pii kame mol i wi tim, kede bala lela abor malo atie kede tipo i piny otuo.

³ Gin kibino yabo wang gi kede yit gi i kom peko me jo.

⁴ Jo kame core acora timo gimoro kong bino donyo tamo pire di kiko timo gikame ber, doko kibino yamo kope me ateni abongo angalo.

⁵ Likame doko kobino tero ngamingo bala dano me awora, kede da dano atie kede ikiteso areco likame kobino tero bala dano adwong.

⁶ Pien jomingo yamo kope me mingo, doko tam gin tie kede iik me timo gikareco. Gin kitimo gi kalikame nyuto wor but Rubanga, doko kiyamo kope areco i kome. Gin likame kimio jo akec oneko cam, akadi mino jo kame orio oneko pii.

⁷ Jo aming obedo jo areco doko tice gi da reco; gin kitimo iik areco me turo jocan kede kope me abe, akadi bed bala koko me jocan obedo koko me ateni.

⁸ Do jo me awora tie kede iik me timo gikame jo woro, doko da gin kicungo di kitek gango gikame jo woro.

Ngolo Kop kede Dok i Kuo Kasek

⁹ Yaunu wun mon kame tie i mulem, winyunu dwana; wun anyira kalikame paro gimoro, winyunu kop na.

¹⁰ Nan ber kong wun itienu kiber, do ingei kare aromo bala mwaka acel, komu bino cako miel amiela, wun mon kalikame iparunu gimoro, pien anyakini me olok bino bedo li ne wu me angweda.

¹¹ Lem wun itienu kede kuo ajabajaba abongo par moro, do nan miunu komu cak miel! Gonyunu igoen wu di ikounu tweno ipukoi i pieru.

¹² Babapunu koru pi paro poti amio kede olok alem nyak kitek;

¹³ pi okuto kede ocokocok kolokere do dongo i lobo ka jo na, kede pi ude dedede kame yomcuny oudo tie iye i bomba kame jo oudo lelo kiye.

¹⁴ Pien abaka bino weko ture, bomba kame jo opong iye bino dong nono; wi emukura kede gedo abor malo me ngico piny bino doko kabedo me leini atwal. Ebino doko kakame punda me obar rimo iye, kede kacam me romini.

¹⁵ Do Rubanga bino cwano ne wa tipo mere, di lobo koudo kony mere li ko bino doko poti aceko cam, di poti aceko cam ko bino mwone bala abum.

¹⁶ Tim kopoore kede me ateni en kame bino bedo tie kabedo dedede i lobo noni.

¹⁷ Tim kopoore bino kelo anapakin kede bedo abongo alola moro i kare dedede.

¹⁸ Wun jo ka Rwot ibinunu bedo i kabedo me anapakin, kakame alola li kiye, kabedo me wei mot.

¹⁹ (Do akako bino dano abum, di bomba ko popoto.)

²⁰ Jo kame bino pur i dog isamai bino bedo kede yomcuny, doko pundan gi kede doke gi bino cam ken gi di kilatao atatai.