Isaya 31 - Baibuli I Leb Kumam 2013

Rubanga bino Gwoko Yerusalem

¹ Kitie i can jo aoto Misiri kwano kony. Gin kitie keto gen gi i kom asigiran, kede i kom cabalan me yi pien kitot, kede i kom isirikalen wegi asigiran pien gin kitek yi. Gin kidagi geno Rwot Ngat Kacil me Isirael, arabo penyo tam kibute.

² Do Rwot da riek, en ecobo gikame ewaco di eko mino can poto. En ebino yai ne jo areco kede jo kame konyo jo atimo tice areco.

³ Jo me Misiri obedo jo ajoa, likame Rubanga; asigiran gi tie kom kobedo ringo aringa, likame tipo. Kame Rwot okiarao bade malo pi mino alola, ngat kame tie mino kony bino gete, di ngat kame kotie konyo ko poto, di do gin dedede kiko bino to karacel.

⁴ Rwot owaco na be, “Bala kame engu amoto atin engu ngururo kede i kom le kame emako abongo lworo, akadi di jokwat ocokere redo ne, kamanono da, ango Rwot me jo yi likame tie gimoro kame bino genga yi pi gwoko moru me Sion kede imukuran mege.

⁵ Bala kame winyo por wire kede i wi ode pi gwoko idwe mege, kamanono da ada Rwot me jo yi abino gwoko Yerusalem; ango abino gwoke, doko abino lake, abino kone di ako mine ebwot.”

⁶ Okwe wun jo me Isirael, dwogunu but ngat kame itiekunu weko kitek ateka.

⁷ Kare tie tuno kame wun ibinunu uco kede tenge caljwogi kame itimunu kede siliba kede saabu, gikame obedo dub.

⁸ Kobino neko jo me Asiria, likame kede teko ka dano, arabo kede epima kame dano otimo. Gin kibino ringo ki yi di oko bino mako awobe gi kidoko mabus kame kodio timo tic tetek.

⁹ Teko gi bino tiek pi lworo, di jodongo me isirikalen ko bino ringo kede mielkom ka kineno imendera me yi. Manoni en gikame Rwot owaco, en ngat kame mac mere liel i Sion, kede kame epipa mere me cwako lilim tie Yerusalem.