Isaya 3 - Baibuli I Leb Kumam 2013

Atotolun i Yerusalem

¹ Aso, nan Rwot, en Rwot me yi tie kwanyo ki Yerusalem kede ki Yuda kony me gi dedede kede jo dedede kame kuo ka jo cungo iye. En ebino kwanyo cam kede pii,

² jo yi kame kouro kede isirikalen, jongolkop kede inabin, jolam gagi kede joadongo,

³ jotel me isirikalen kede jo kame koworo, jo kame mio tam kede jo kame tie kede diru me timo tangu pi mino gimogo timere.

⁴ Rwot bino mino awobe apwodi tino kede imukerun en apugo jo.

⁵ Ngat acelacel bino tero jo ace apat kirac. Joatino likame bino woro joadongo gi, kede da jo me ruom apiny likame bino woro jo kame lo gi.

⁶ Kare bino tuno kame jo me ekeko moro bino mako kede wad gi moro di kiko waco ne be, “Twaratwara in itie kede egoe agwagwang, aso in do dok ngatel wa di iko pugo kiton atukit me ude kame korereto nogi.”

⁷ Do en eko bino dwoko be, “Ango likame akaruno cango peko wu; ango ali kede cam amoto igoen. Kur iketanu bedo ngatel wu!”

⁸ Ebo, Yerusalem ogete, Yuda otieko poto! Pien gi dedede kame gin kiwaco kede kame kitimo likame lubere kede mit ka Rwot; gin kijemo ne Rwot i deyo me tie mere.

⁹ Neeno me nyim gi da nyuto raco gi; gin kitimo dub obe bala bin jo me Sodoma, likame kipwono kede. Gin kibino neno can! Gin en kikelo peko i kom gi ken gi.

¹⁰ Jo kame li kede raco moro tie kede winyo aber, pien gin kibino udo bero pi gikame kitimo.

¹¹ Do jo areco tie i peko! Kitie kede winyo arac tin benyo, pien gikame gin kitimo ne jo apat en kame kobino timo ne gida.

¹² Rwot waco be, “Jo na, idwe en kame do tie tero wu kirac; mon en kame do pugo wu. “Okweunu jo na, jotel wu tie rwenyo wu, gin kitie totolo ne wu yongayo kame ipoorenu lubo.”

Rwot bino Ngolo Kop ne Jo mege

¹³ Rwot otieko yai pi peto pido mere; en etieko cungo pi ngolo kop ne jo mege.

¹⁴ En ebino ngolo kop ne joadongo kede jopug ka jo mege. En epeto pido mere i komu be, “Wun iyakunu poto na me olok. Ude wu opong kede jamini kame iyakunu kibut jocan.

¹⁵ Twero nyo kame wun itienu kede me tero jo na kirac di idiunu jocan? Ango Rwot Rubanga me jo yi en awaco.”

Ikwenyar but Mon me Yerusalem

¹⁶ Rwot waco be, “Mon me Yerusalem tingere twatwal! Gin kioto di kikiarao wi gi, di kingwengwenyo wang gi kede neeno; gin kicenyo ot acenya di irikoi kame kingapo piny i tien gi kok gwiling gwiling.

¹⁷ Do ango abino kiso wi anyira me Yerusalem nogo, di ako weko kom gi me lewic kakaler.”

¹⁸ Ceng tie bino kame Rwot bino kwanyo kede kibut mon me Yerusalem mwolere kame gin kingapo i atitinyo gi, kede i wi gi, mwolere kobedo cal me duwe kame kingapo,

¹⁹ kede mwolere me ngut aledo aleda, kede alung me ngut cing, kede igoen kame kodwadwalo i ngut,

²⁰ kede igoen me wic, kede mwolere me bad, ausin me tweno pier, cupan me moe me sut kede mukisa;

²¹ ebino da kwanyo mwolere kame kingapo i lwet gi kede i um gi;

²² igoen abeco me angapa i ceng adongo, igoen aboco, ikotin kede ikapun atino me cing.

²³ Ebino kwanyo igoen gi kicararai, igoen aliamaliam, igoen kame kodwadwalo i wic kede me umo wang.

²⁴ Akaka sut kede moe angwe kur, ngwece otop bino bedo tie i kom gi; akaka tweno pier gi kede ausin abatal abeco, gin kibino tweno pier gi kede tol; akaka bedo kede yer wic acil, wi gi bino bedo di okisere; akaka ngapo igoen abeco me wel, gin kibino ngapo ipukoi. Cilo kame kitie kede bino lokere doko lewic!

²⁵ Cuo me Yerusalem bino to to me epima; jo atek yi bino to i yi.

²⁶ Erute me bomba nono bino koko di etururo; bomba nono bino bedo cal bala dako kobedo piny i apua, di udo etieko dong nono abongo jo.