Isaya 29 - Baibuli I Leb Kumam 2013

Yerusalem bino Neno Can

¹ Can kame itie iye in Yerusalem! Bomba kame Daudi oudo oguro iye eema tie i can. Ber kong wun imeedenu kwero ibagai wu me buli mwaka pi mwakini are amoto adek anyim.

² Do ango abino kelo can i kom bomba kame kolwongo be “Alutari ka Rubanga”, di koko kede iturur ko bino bedo tie iye, di bomba nono ko bino doko cal bala wi alutari kame remo oumo.

³ Abino guro eema na luki; abino luki kede madalan aboco me turo apama, di ako kumemo kayito malo i wi apama nin.

⁴ Di do in iko bino yamo i lobo kakatut; ibino yamo i apua. Dwani bino winyere di wok ki piny bala dwan jwogi, ibino weweo i apua.

⁵ Do twon jokwor ni kobino kutaro gi bala apua, twon jo ager di kili kede kisa buti bino bedo bala cucung kame yamo tie tero.

⁶ Do cucuto i kare nono, Rwot me jo yi bino ngole laki kede mwoc acal bala me kot, kede yangere me piny, kede twon woo, kede yamo atek me apipiru, kede mac ager.

⁷ Di jo me atekerin koudo obedo yi kede Yerusalem, jo koudo obedo suro kateko mere di kimie neno can, gin dedede kibino doko bala lek, bala gimoro abino i tam me dano iwor di enino.

⁸ Atekerin dedede kame cokere pi suro Yerusalem bino bedo bala dano kame kec onuo kame leko be etie cam, di eko cei eko udo be kec pwodi oneke kamanono; arabo bala dano kame orio odio kame leko be etie mato pii, di eko cei eko udo be teko li ne, orio pwodi oneke kamanono.

Ikwenyar kame Jo Odagi Winyo

⁹ Bangerenu ikounu bedo jomingo, tounu wangu ikounu bedo imuduka! Merunu abongo mato bwini, getenu abongo mato kongo moro akec!

¹⁰ Pien Rwot otieko coro ne wu cuny me mito nino kitek; inabin poore bedo bala wangu, do en etieko umo wang gin; etieko umo wi joneno.

¹¹ Gianyuta dedede but inabin otieko doko ne wu bala baluwa kame komwono i bakasa. Ka komie but jo kame ngeo somo di oko waco negi be kisomi, gin kibino waco be likame kitwero some, pien komwone.

¹² Ka komie but jo kalikame ngeo isoma di oko waco negi pi somo, gin kibino waco be gin likame kingeo somo.

¹³ Rwot owaco be, “Jogi sidiko wora kede dog gi kenekene, do cuny gi bor kibuta; epone kame kiwora kede obedo wero kede wic cik kame dano en otimo.

¹⁴ Pi manono, ango bobo abino timo i kom jogi gi me aura aneko kom gi. Rieko me jo kame riek bino pirisar, doko da abino kano niang me jo kame ngeo poko gikaber kede gikarac.”

Gen pi Kare me Anyim

¹⁵ Kitie i can jo kame tamo kano iik gi kibut Rwot. Gin kitimo tice gi i mung di kiwaco be, “Likame tie ngat kame tie neno wa, doko da likame tie ngat kame ngeo gikame wan otie timo.”

¹⁶ Gin kiloko jame oluktuke! Mene kame pire tek, ngacwei agulu arabo agulu? Benyo, gikame dano ocweo twero waco ne be, “In likame icwea”? Arabo be, “In ili kede niang moro da”?

¹⁷ Odong kare acecek di abum me Lebanon lokere doko poti aceko cam, kede poti aceko cam ko lokere doko abum.

¹⁸ Kame ceng nono otuno, jo kame yit gi oudo oding bino twero winyo kop di kosomo i itabu adola, doko da jo kame wang gi oudo oto wang gi bino yabere.

¹⁹ Jo amwol bino udo kilel anyen i Rwot, kede jocan da bino lelo pi Ngat Kacil me Isirael.

²⁰ Pien jo kame ger di kili kede kisa bino do bedo li, kede jo kame tie kede acae i kom kop ka Rwot likame bino bedo tie. Jo dedede kame tam gi do tie cuto pi timo gikarac bino rwenyo,

²¹ gin jo kame mio pido lo dano aber, jo kame ciko obek ne jongolkop kame poko jo katie kede kop i erute me bomba, kede kame gengo abongo tien kop moro ngolo kop me ateni but dano ali kede raco.

²² Pi manono, nan Rwot, Rubanga me Isirael, kame bin olako Aburaam waco be, “Likame doko lewic bino mako ikwae ka Yakobo, likame doko nyim gi bino bedo luruluru.

²³ Pien kame gin kibino neno idwe gin kame ango en amio gi di tie i diere gi, gin kibino ngeno be ango abedo Rubanga Ngat Kacil me Isirael. Gin kibino bedo kede wor buta di kiko lwora.

²⁴ Jo kame kuo gi oparao bino udo niang, kede jo dedede kame ngunguro bino yei lubo pwony.”