Isaya 27 - Baibuli I Leb Kumam 2013

¹ I ceng nono Rwot bino tic kede twon epima mere atek di bit adikinicel, pi mino Lebiatan alola, en twol kame maro pikiro, di en eko bino neko twol kiyiliyili abedo i nam adwong.

² I ceng nono Rwot bino waco be, “Werunu wer i kom poto me olok akelo yomcuny.

³ Ango Rwot en kame agwoke; abwongo ne pii nakanaka. Adare iwor kede iceng tetekeny kur ngatamoro dub gimoro kiye.

⁴ Ango likame pwodi doko atie kede gero i kom poto olok nono. Ka koto okuto kede ocokocok oko wok iye, koto ango adipo yi kede gi di ako wango gi dopodop.

⁵ Do ka jokwor ka jo na mito be ango agwok gi, poore gin kidwog i anapakin kede ango; ebo poore gin kidwog i anapakin kede ango.”

⁶ I kare kame tie bino, ikwae ka Yakobo bino bedo bala yat kame cibo aliasin mege, di kiko bino lot di kiko tuuro; anyakini gi bino pongo wi lobo lung.

⁷ Likame Rwot omio jo me Isirael alola kitek ateka bala kame emio kede jokwor gi alola, doko da likame eneko gi bala kame eneko kede jokwor gi.

⁸ Rwot omio jo mege alola i yore me cwano gi bala mabus obukui. En emio yamo agwai me bad tetu kide ojwango gi kunono.

⁹ Do dub me Isirael kobino sasiro kenekene kame konyonyoto kide me alutarin me woro caljwogi paka doko purupuru, di alutarin me dunyo odok angwe kur kede ipirin kame kosipo pir rubanga adako anyinge Asera likame doko odong cungo.

¹⁰ Bomba kame oudo kocelo di tek jo otieko weke edong kene bala wi tim; etieko doko kacam me doke, gin kiurako kanono. Dok gwero ajange me yen atie iye.

¹¹ Kame ajange me yen kotuturun otuo di kiko popoto piny, mon coko gi me moko mac. Pi kite kame jo nogi likame tie kede niang moro, Rubanga ngat kocweo gi likame bino bedo kede kisa but gi, en likame ebino nyuto negi mwolo.

¹² Kare tie bino kame Rwot bino coko kede jo mege me Isirael acelacel, cako ki ecilet me Eupurate tuno i ikor me Misiri, bala kame koyeko kede kal ki gari.

¹³ Kame kare nono otuno, kobino kuto agwara me lwongo jo me Isirael katie bala mabus Asiria kede Misiri. Gin kibino dwogo di kiko donyo woro Rwot i Yerusalem, ki wi moru mere kacil.