Isaya 26 - Baibuli I Leb Kumam 2013

Rubanga bino Mino Jo mege Bwono Yi

¹ Kare tie tuno kame jo bino wero kede wer i lobo me Yuda be: Wan otie kede bomba atek! Rwot tie bala apama wan atek me cel, doko da en emio wa obwono yi.

² Yab irutei me bomba, tetekeny ateker kopoore kame gwoko yei gi donyi i yie.

³ Rwot, in imio jo kame yei gi osipakin anapakin, pien udo gin kigeni.

⁴ Genunu Rwot i kare dedede, piento en etie bala lela kame gwoko wa nakanaka.

⁵ En etieko dwoko jo kame oudo tingere piny, ereto bomba acil kame gin oudo kibedo iye, apama mege oko rwacakin piny odoko apua.

⁶ Nan do jo koudo obedo jocan beo i wie di kinyonyono en, jo kame piny oudo oloo tien gi dero wie.

⁷ Yongayo me jo kopoore pioropior. Rwot, in itimo gi dedede i yore me ateni, in imio yongayo kame jo kopoore lubo bedo di pwot.

⁸ Rwot, wan olubo mit ni di oketo gen wa buti, cuny wan tie i komi.

⁹ Cunya pari iwor kiakia; ango amoi kede kuo na. Pien ka in ingolo kop ne lobo kede jo kame bedo iye, gin kibino niang dwong me gi kopoore.

¹⁰ Akadi bed bala in itim ne jo areco mwolo, do gin likame kipwonyere timo gi kopoore. Akadi i lobo me jo kopoore kan, gin pwodi kitimo gikarac; likame kineno dwongo nin.

¹¹ Okwe Rwot, in itingo badi malo pi mino gi alola, do likame gin kitie neno. Mi gi kinen epone kame in imaro kede jo ni, di lewic ko mako gi; mi mac kame in i iiko pi jokwor ni muducaro gi.

¹² Rwot, in ibino kelo ne wa anapakin, pien i ateteni, gi dedede kame wan otieko timo in en itimo ne wa.

¹³ Rwot Rubanga wa, rwode ace apat kede in otieko pugo wa, do in keni en ibedo Rwot wa.

¹⁴ Nan gin kitieko totoun likame bobo kibino kuo, tipere gi likame doko bino yai, pien in imio gi alola di iko muducaro gi. Likame doko tie ngatamoro kame bino yutuno gi.

¹⁵ Rwot, in imio ateker wa odongo, in imio ateker wa odongo; wan omii wor; in inyao ikor me lobo wa.

¹⁶ Rwot, in ibitaro jo ni, di gin kiko moni di kiko lego buti.

¹⁷ Rwot, in imio wa odwilao koko, bala kame dako atie ramere me nywal dwilao kede kame esawa mere me nywal otuno.

¹⁸ Wan obedo bebelo kede aramo me nywal, do oko lokere nywalo yamo kenekene. Likame tie yi moro kame wan otieko bwono i wi lobo, doko da oli kede idwe kame bino lunyo wang wa bedo i piny.

¹⁹ Jo wa kotieko to bino kuo bobo! Kom gi bino yaruno. Jo kame buto i apua, yaunu ikounu wero wer me kilel! Bala kame toyo me odiko mio kede lobo kuo anyen, kamanono da Rwot bino dwoko kuo me jo kotieko to sek.

Ngolo Kop kede Dok i Kuo Kasek

²⁰ Jo na, donyunu i ude wu di ikounu cego ikekon. Pwonunu pi kare moro acecek tuno di gero ka Rubanga otiek.

²¹ Pien Rwot tie bino ki kabedo mere pi mino jo me wi lobo alola pi dub gi. Wi lobo bino nyuto nek kame kotimo iye, doko da likame ebino kano jo kame koneko.