Isaya 22 - Baibuli I Leb Kumam 2013

Kop i kom Yerusalem

¹ Man en kop kame Rubanga owaco i kom Aditot me Gianyuta. En ewaco be, “Pinyo komio wun dedede itienu camo ebaga i wi ude wu?

² Bomba dedede tie woo, di jo celakino kede yomcuny. Jo wu oto i yi noni likame koneko gi aneka i yi.

³ Jopug wu dedede oringo karacel, di oko mako gi abongo gweno emal moro, bed bala oudo kiringo kakabor.”

⁴ Pi manono, ango nan awaco be, lokunu wangu tenge kibuta; wekanu akok kede pigewanga pi jo na me amaro oto; kur idiunu cunya.

⁵ Pien Rwot Rubanga me jo yi oudo oiko ceng me icelakin kede me nyonyono jo piny kede me atotolun i Aditot me Gianyuta. Kotieko mumuko apama atek koluko bomba, doko da koko me jo akwao kony tie winyere i mori.

⁶ Isirikalen kowok ki Elam obino kede cabalan di kiriongo isaun me mako tongini me emal; isirikalen kowok ki Kir omako ibukui gi cuto.

⁷ Cabalan me yi oudo oumo aditoto alobo gi mio i Yuda; isirikalen aoto kede tien ocungo i irutei me Yerusalem.

⁸ Kotieko tieko teko ka Yuda me gagao ebela ki wie. Kakame manono otimere kede, wun ikounu omo jamini me yi kame oudo ikanunu i Ot me Abum.

⁹ Ikounu neno be kabedo tie tot komukumukun ki apama atek koluko bomba me Yerusalem kame poore aika, ikounu weko pii ki atapar me piny.

¹⁰ Imarunu wel me ude atie Yerusalem di ikounu tiatiao mogo pi udo ingaroi me iiko apama me cel aluko bomba.

¹¹ Ikounu gero epipa adwong acoko pii i dierediere me apama me yie kede me ooko, pi coko pii kame mol wok ki atapar kacon. Do likame ikounu keto tam wu i kom Rubanga ngat komio gi nogi otimere, arabo ngat koudo oiko cako sek be gi nogi poore timere.

¹² Rwot Rubanga me jo yi oudo owaco ne wu be ikokunu kede di itururunu, be ilielunu wi wu di ikounu ngapo igoen me cola.

¹³ Do akaka manono, wun oudo itienu kilel kede camo ibagai, oudo itienu ngongolo twonin kede romini, camo ringo kede mato bwini, pien oudo iwacunu be, “Ocamunu, doko da omatunu, pien esawa me to li.”

¹⁴ Rwot me jo yi owaco nango kop be, “Likame abino sasiro gi ki gikarac noni tuno to gi, ango Rwot Rubanga me jo yi en awaco.”

Ikwenyar but Sebena

¹⁵ Rwot Rubanga me jo yi oko waco na pi ot but Sebena, en ngat kame lo jame me paco ka abaka, di ako waco ne be,

¹⁶ “Twer nyo kame in itie kede kan? Wade ni mege en atie kan komio ikunyo ates ni i bad lela kan?

¹⁷ Akadi di itek benyo, do Rwot oyaro kapakino in di eko kwiti tenge.

¹⁸ En ebino wiwiro in di eko kwiti bala mupira i piny alac. Ibino to kunono, di cabalan ni me deyo nogo ko bino buto i ngeti, Okwe, in ngat kame ikelo lewic i ot ka ngadwong ni.

¹⁹ Rwot bino kwanyi ki wang tic ni di eko dwoki piny.”

²⁰ Rwot owaco ne Sebena be, “I ceng nono, ango abino lwongo ngatic na Eliakim wot ka Kilikia,

²¹ di ako bino ngapo ne angapito nin me ajakanut di ako mine akarunikin kame in oudo itie kede. En ebino bedo bala papa me jo kame bedo Yerusalem kede Yuda.

²² Abino mine isumilito me ot ka Daudi; ka en eyabo likame tie ngat kame bino cego, doko da ka en ecego likame tie ngat kame bino yabo.

²³ Abino mine ecungo di etek i ajakanut mere bala loc kame koguro, di eko bino kelo deyo i ot ka papa mere.

²⁴ “Joawade mege kede jo ace apat kame kuo i cinge bino bedo ne bala yec, bala ikopon kede jagin kame liero i iteku kame kotweo i yat atek.

²⁵ Yat kame kotweo iye iteku nono tek nan, do cengemoro ebino doko yagayaga di eko poto, di yec dedede kame oudo okode iye ko bino amuducar.” Rwot en owaco.