Isaya 20 - Baibuli I Leb Kumam 2013

Gianena me Enabi Aoto Nono

¹ Abaka Sagon me Asiria bin oko mino cik but ngadwong me isirikalen me Asiria pi suro bomba me Pilistia kame kolwongo be Asidod.

² Cecen di pwodi manono likame otimere, Rwot oudo owaco ne Isaya wot ka Amos pi gonyo amuka ki tiene kede epuko kame oudo engapo. En oudo eko timo kamanono di eko donyo ot nono abongo egoe, kede tiene da di tie nono.

³ Kakame komako kede bomba me Asidod, Rwot oko waco be, “Isaya ngatic na lem obedo ot nono abongo egoe, kede tiene da nono pi mwakini adek, manoni obedo gianena me gikame bino timere ne Misiri kede Abisinia.

⁴ Abaka me Asiria bino kolo mabus aoto nono kame emako ki lobere nogi etero gi obukui. Jo atino kede jo adongo bino ot nono abongo ngapo igoen, kede tien gi da nono, di kwon dud gi iparadad ooko; manono bino kelo lewic i kom Misiri.

⁵ Jo kame lem oketo gen gi i kom Abisinia di kiwakere pi Misiri, gen gi bino kwanyere di wi gi ko dubere.

⁶ Kame kare nono otuno, jo kame bedo i dog nam agongere kede Pilistia bino waco be, ‘Kong nenunu gikotimere ne jo kame wan oudo oketo gen wa i kom gi di oko ringo but gi pi gwoko wa kibut abaka me Asiria! Nan wan obinunu do bwot benyo?’ ”