Isaya 2 - Baibuli I Leb Kumam 2013

Anapakin kame Bedo Nakanaka

¹ Man en kop kame Rubanga omio Isaya wot ka Amos i kom Yuda kede Yerusalem.

² I kare me anyim, moru kame tempulo cungo i wie bino bedo moru abor malo kalamo mori dedede, ebino bedo bor malo kalamo imukuran dedede. Atekerin dedede bino sirito iye.

³ Jo atot bino ot iye di kiko waco be, “Ootunu i wi moru ka Rwot, i tempulo ka Rubanga me Isirael. En ebino pwonyo wa gikame en emito ne wa timo di wan oko lubo kop mere.” Pien pwony ka Rwot bino wok ki Sion; kope mege bino wok ki Yerusalem.

⁴ En ebino ngolo kop i diere me atekerin di eko bino poko jo atot atie kede twomere. Gin kibino teto ipimai gi doko leb kwei me dok, kede tongini gi kibino teto doko pale me lwero yen. Atekerin likame bobo bino yi, akadi pwonyere yi bobo.

⁵ Okwe, wun ikwae ka Yakobo, nan do bia ootunu ki lero ka Rwot!

Kobino Jiko Ewaka me Jo

⁶ Okwe Rubanga, in itieko weko jo ni, gin ikwae ka Yakobo! Pien lobo gi opong kede tim me lamo gagi kede tice me tangu kowok ki bad tetu kide kede ki Pilistia. Gin kitieko moko lubo itok me jokumbor.

⁷ Lobo gi opong kede nyonyo siliba kede saabu, ajikini me abar gi likame tie; lobo gi odure kede asigiran, ajikini me cabalan gi likame tie.

⁸ Lobo gi odure kede caljwogi; gin kiworo gikame cing gi en otimo.

⁹ Pi manono, jo dedede kobino dwoko dwongo gi piny di oko mino lewic mako gi. Rwot, kur itim gi kisa.

¹⁰ Jo bino pwono i abo me lela, kede kibino gogoro asinge kipwono iye pi lworo kame bino ka Rwot bino kelo, kede pi ringo deyo me dwongo mere.

¹¹ Tingere kame jo tie kede kobino dwoko piny, kede ewaka me jo kobino tieko. Di Rwot kenekene en kame oko bino mino dwongo i ceng nono.

¹² Pien Rwot me jo yi otieko moko ceng kame en ebino dwoko kede piny jo dedede kame wakere kede kame tingere.

¹³ En ebino dudubo yen seda aboco me Lebanon. Kamanono da ebino dudubo yen oak me lobo me Basan,

¹⁴ mori kede imukuran aboco,

¹⁵ gedo dedede aboco malo kede apamai kobedo cel.

¹⁶ Ebino tuturo imerin me Tarusi kede yede kibus.

¹⁷ Tingere kame jo tie kede kobino dwoko piny, kede ewaka me jo kobino tieko. Di Rwot kenekene en kame oko bino mino dwongo i ceng nono.

¹⁸ Caljwogi bino rwenyo atwal.

¹⁹ Jo bino pwono i abo me lela, kede kibino gogoro asinge kipwono iye pi lworo kame bino ka Rwot bino kelo, kede pi ringo deyo me dwongo mere, kakame en ebino yai kede pi kelo twon lworo i wi lobo.

²⁰ I ceng nono jo bino uco ne inunuk kede ne olikolik caljwogi kame kitimo kede nyonyo siliba kede saabu pi awora.

²¹ Kame ceng nono otuno, jo bino donyo i abo me lela, kede kakobarere me mori kipwono iye pi lworo kame bino ka Rwot bino kelo, kede pi ringo deyo me dwongo mere, kakame en ebino yai kede pi kelo twon lworo i wi lobo.

²² Wekunu keto gen wu i kom dano adana, kame tie kede wei i ume kenekene. Kara kony me dano tie tuai?