Isaya 19 - Baibuli I Leb Kumam 2013

Rwot bino Mino Misiri Alola

¹ Man en kop i kom Misiri. Nenunu, Rwot tie bino Misiri, en etie i wi edou adwir bino. Caljwogi me Misiri kom gi bino miel i nyime, di cuny jo ko bino nyote pi lworo.

² Rwot waco be, “Ango abino twaruno yi i Misiri di jo ko donyo yi ken gi ken gi, ngati kede ngat ca, bomba ni kede bomba ca, ajakanut ni kede ajakanut ca.

³ Ango abino totolo iik kame jo me Misiri tie kede di cuny gi ko kwanyere. Gin kibino pepenyo tam kibut caljwogi, kede kibut tipere me jo oto, kede kibut imuroko atio kede yamere.

⁴ Ango abino jalakino jo me Misiri i cing ngaloc acunye kec; abaka ager en kame bino pugo gi; ango ngapug adwong, Rwot me jo yi en awaco.”

⁵ Pii me ecilet me Nail bino dwono di eko tuo edoko tek baba.

⁶ Wang itaun kame pii mol lubo bino doko ngwe; ajange dedede me ecilet me Nail atie Misiri bino tuo, doko da aladoi kede otol mege bino tuo di kiko nyote.

⁷ Dog ecilet me Nail bino dong di ler alera; gi dedede kame kopuro bino tuo di yamo ko tero gi tenge.

⁸ Jo kame ciko i ecilet me Nail bino koko; jo kame ciko bwoini i pii bino kuro kwe di cuny gi ko kwanyere.

⁹ Jo kame timo ausin me pulak cuny gi bino kwanyere, gin jo kame cweo igoen aliamaliam.

¹⁰ Jo kame cweo ausin doko igoen cuny gi bino dubere, kede jo dedede kame pakaso bino bedo kede cwercuny.

¹¹ Jopug me bomba me Soan ming adikinicel; jo ariek kame mio Parao tam, mie tam me mingo kenekene. Benyo benyo kame gin kitwero waco ne kede Parao be gin kibedo jo ariek twatwal, doko da gin kibedo jo me erionget me abakai kariki sek?

¹² Parao, jo ni ariek nogo tie tuai? Ber mi gi kiwaci gikame Rwot me jo yi oiko pi timo ne Misiri.

¹³ Jopug me Soan otieko doko jomingo, doko da kongalaro jopug me Mempi. Jo kame oudo poore bedo jotel i Misiri olokere rwenye arwenya.

¹⁴ Rwot otieko mino wi gi ototolun; pi manono kitie mino Misiri tagere i gi dedede kame etimo bala kame dano omer cer kede ngok mere.

¹⁵ Likame tie ngatamoro Misiri me ruom amalo amoto me ruom apiny, dano kobaro amoto angacan, kame twero mino Misiri kony.

Misiri bino Donyo Woro Rwot

¹⁶ Kare tie bino kame jo me Misiri bino doko luruluru kede bala mon. Kom gi bino miel kede lworo ka kineno di Rwot me jo yi okiarao cinge pi mino gi alola.

¹⁷ Gin kibino bedo kede twon lworo i kom lobo me Yuda; kame kowaco ne ngatamoro me kunono nying Yuda, en ebino bedo kede lworo pi gikame Rwot me jo yi oiko timo i kom gi.

¹⁸ Kame kare nono otuno, bomban kany i lobo me Misiri bino donyo yamo leb Eburania. Jo me kunono bino donyo kwongere i nying Rwot me jo yi. Acel kikom bomban nogo kobino lwongo be, “Bomba me Ceng”.

¹⁹ Kame kare nono otuno, kobino gero alutari ne Rwot i cuny lobo me Misiri, kede kobino sipo epir me kidi kame kokwero bute i ikor mere.

²⁰ Magonogi bino bedo anen kame nyuto be Rwot me jo yi tie Misiri. Kame kotie tero jo kirac di kiko kok but Rwot, en ebino cwano negi ngat kame lako gi di en eko bino konyo gi.

²¹ Rwot bino nyutere but jo me Misiri di jo me Misiri ko bino ngene i kare nono, di kiko donyo wore di kimie giayala awanga; doko da kibino donyo kwongere but Rwot di kicobo kwongere gi nogo.

²² Ingei Rwot mino jo me Misiri alola, gin kibino dok bute di en eko gamo ilega gi di eko cango gi.

²³ Kame kare nono otuno, yongayo adwong bino bedo tie ayai ki Misiri ot Asiria; jo me Asiria bino donyo bino Misiri, kede jo me Misiri da bino donyo ot Asiria, doko da atekerin are nogo bino donyo woro Rubanga karacel.

²⁴ Kame kare nono otuno, Isirael bino ribere kede Misiri kede Asiria, di atekerin adek nogi ko doko gikame bino kelo winyo i wi lobo lung.

²⁵ Rwot me jo yi bino mino gi winyo di ewaco be, “Winyo bed Misiri, gin jo na; kede Asiria, gin cwec na; kede Isirael, gin jo na kame maka.”