Isaya 18 - Baibuli I Leb Kumam 2013

Rubanga bino Mino Abisinia Alola

¹ Itie i can in lobo kame bwom lwangini mor kiye, kame tie loka tetuca me icileta me Abisinia,

² kame cwao joor wok ki ecilet me Nail di kikwango yede kame kotimo kede aladoi. Dokunu cen, wun joor akom gi mit, but ateker me jo abocoboco di kom gi pwot, jo kame kolworo i wi lobo lung, ateker atek kame singo bwono yi, jo kame icileta opoko lobo gi.

³ Wun jo dedede kame tie i piny, wun jo dedede kame bedo i wi lobo, miunu wangu bed bit pi neno imendera kame kobino kiarao i wi moru! Cikunu yitu kiber pi winyo agwara kame kobino kuto!

⁴ Pien Rwot owaco na be, “Ango gira abino ngibuco neeno mot i kabedo na bala ceng kame lieto mere pwolpwol i dier i ceng, bala ekuna kame timere kame piny liet i kare me kac.

⁵ Pien di pwodi kare me ngwedo olok likame otuno, kakame ature otieko ony kede di do anyakini me olok tie cek, Rubanga bino tic kede pala me lwero yen pi totongo tenge cuny gi kede jang gi koyarere.

⁶ Kobino weko liele gi ne winy me wi mori kede ne leini me obar pi camo gi; i kare me iporo winy en kame bino camo kom gi, kede i kare me ngico leini en kame bino donyo camo kom gi.”

⁷ I kare nono, jo odongo di bocoboco nogo bino donyo kelo ne Rwot me jo yi giamia, gin jo kame kolworo i wi lobo lung, ateker atek kame singo bwono yi, jo kame icileta opoko lobo gi. Gin kibino bino i moru me Sion kakame koworo kiye Rwot me jo yi.